ជាតិ
សង្គមជាតិ
សិស្សទី១ ដល់ទី១២ អាចរៀនតាម E-Learning និង E-School Cambodia ដោយឥតគិតថ្លៃ លោកគ្រូ ជ័យ ថាវី សាស្រា្តចារ្យផ្នែកគីមីវិទ្យា នៅសាកលវិទ្យាល័យភូមិន្ទភ្នំពេញ និងនៅសាសាជ័យថាវី រូបភាពពីក្រសួងអប់រំ យុវជន និងកីឡា
× ភ្នំពេញ៖ ក្រសួងអប់រំ បានបង្កើតកម្មវិធីសិក្សាតាមប្រព័ន្ធអេឡិចត្រូនិក E-Learning ឲ្យសិស្សចាប់ពីថ្នាក់ទី៩ ដល់ថ្នាក់ទី១២ សិក្សាដោយឥតគិតថ្លៃ។ បន្ទាប់ពីប្រកាសបិទសាលាទូទាំងប្រទេស ក្រសួងអប់រំ បានបង្កើតកម្មវិធីសិក្សាដោយឥតគិតថ្លៃ E-School Cambodia មួយទៀត សម្រាប់ឲ្យសិស្សចាប់ពីថ្នាក់ទី១ ដល់ថ្នាក់ទី១២ ទៅតាមបណ្តាខេត្ត សិក្សាតាមផ្ទះ។
ក្រសូងអប់រំ បង្កើតកម្មវិធីសិក្សាតាមអនឡាញបច្ចេកវិទ្យាបង្រៀនពីចម្ងាយ E-School Cambodia បន្ថែមពីកម្មវិធីសិក្សាតាមអនឡាញ E-Learning មួយទៀត ដែលអាចឲ្យសិស្សចាប់ពីថ្នាក់ទី១ ដល់ថ្នាក់ទី១២ ដែលឈប់សម្រាកវិស្សមកាលតូច ដើម្បីទប់ស្កាត់ការឆ្លងជំងឺកូវីដ-១៩។
កម្មវិធីសិក្សាតាមប្រព័ន្ធអេឡិចត្រូនិក E-Learning និង E-School Cambodia ទាំងពីរនេះ នឹងជួយសម្រួលដល់សិស្សានុសិស្សទាំងអស់ អាចរៀននៅផ្ទះ ឬនៅកន្លែងណាមួយផ្សេងទៀត ហាក់ដូចជាបានទៅសិក្សានៅតាមសាលារៀនទូទៅដែរ។ នៅពេលរៀនតាមអនឡាញ សិស្សានុសិស្សអាច ចូល Comment សួរពីមេរៀនដែលឆ្ងល់ និងមិនទាន់យល់ចំណុចណាមួយ ដោយមានគ្រូប្រចាំមុខវិជ្ជានីមួយៗ រង់ចាំពន្យល់ និងផ្តល់ចម្លើយនៅតាមការផ្សាយផ្ទាល់ (Live) លើទំព័រហ្វេសប៊ុក MOEYs Cambodia របស់ក្រសួងអប់រំ យុវជន និងកីឡា Youtube និង មជ្ឈមណ្ឌលសិក្សាអេឡិចត្រូនិករបស់ក្រសួងអប់រំ។ ជាពិសេសពួកគេអាចសិក្សាឡើងវិញ ក្រោយពេលក្រសួងបង្រៀនចប់ ដោយបង្ហោះនៅក្នុងYoutube ផងដែរ។
កម្មវិធីសិក្សាតាមអនឡាញទាំងនេះ សិស្សានុសិស្សថ្នាក់ទី១ ដល់ថ្នាក់ទី៦ អាចសិក្សាលើមុខវិជ្ជា គណិតវិទ្យា ភាសាខ្មែរ និង ភាសាអង់គ្លេស។ សម្រាប់សិស្សថ្នាក់ទី៧ ដល់ថ្នាក់ទី៩ អាចសិក្សាលើមុខវិជ្ជា គណិតវិទ្យា រូបវិទ្យា គីមីវិទ្យា ភាសាខ្មែរ និង អង់គ្លេស។ សម្រាប់សិស្សថ្នាក់ទី១០ ដល់ថ្នាក់ទី១១ ពួកគេអាចសិក្សាលើមុខវិជ្ជា គណិតវិទ្យា រូបវិទ្យា គីមីវិទ្យា ជីវវិទ្យា ភាសាខ្មែរ ភាសាអង់គ្លេស និង ថ្នាក់សិស្សពូកែ។ ដល់សិស្សថ្នាក់ទី១២ វិញ ពួកគេសិក្សាលើមុខវិជ្ជា គណិតវិទ្យា រូបវិទ្យា គីមីវិទ្យា ជីវវិទ្យា ភាសាខ្មែរ ភាសាអង់គ្លេស ថ្នាក់សិស្សពូកែ និង វិញ្ញាសាត្រៀមប្រឡងសញ្ញាបត្រមធ្យមសិក្សាទុតិយភូមិ។
មុខវិជ្ជាសម្រាប់សិស្សរៀនតាមអនឡាញនេះ គឺបង្រៀនដោយគ្រូនៅសាលាជ័យថាវី វិទ្យាល័យបាក់ទូក វិទ្យាល័យបឹងត្របែក វិទ្យាល័យព្រះស៊ីសុវត្ថិ ដែលមានបទពិសោធន៍ក្នុងការបង្រៀនអស់ជាច្រើនឆ្នាំ។ គ្រូនីមួយៗនឹងចែកវេនគ្នាបង្រៀនទៅតាមម៉ោង ដោយពេលព្រឹកបង្រៀនមុខវិជ្ជាសម្រាប់សិស្សថ្នាក់ទី៩ និងពេលថ្ងៃសម្រាប់សិស្សថ្នាក់ទី១២។ ក្រសួងអប់រំបង្រៀនមុខវិជ្ជាសម្រាប់សិស្សថ្នាក់ទី៩ និងទី១២ ដែលជាសិស្សត្រូវប្រឡងសញ្ញាបត្រមធ្យមសិក្សាបឋមភូមិ និងសញ្ញាបត្រមធ្យមសិក្សាទុតិយភូមិ។ ទៅមុខទៀត ក្រសួងនឹងពង្រឹងការបង្រៀនសម្រាប់សិស្សថ្នាក់មេត្តយ្យ និងមុខវិជ្ជាវិទ្យាសាស្ត្រសង្គមផងដែរ។
មុននឹងអាចរៀនតាមកម្មវិធីទាំងនេះ សិស្សានុសិស្សត្រូវទាញយកកម្មវីធីតាម PlayStore សម្រាប់អ្នកប្រើប្រព័ន្ធទូរសព្ទ Android និងISO ដោយវាយពាក្យ E-School Cambodia និងចុច Install។ ទាញយកកម្មវិធីហ្នឹងបានហើយ សិស្សត្រូវបំពេញលេខទូរសព្ទ និងបញ្ចូលលេខកូដសម្រាប់សិក្សាដោយឥតគិតថ្លៃពេញមួយឆ្នាំ។
កម្មវិធីសិក្សាតាមប្រព័ន្ធអេឡិចត្រូនិកទាំងនេះ ត្រូវបានបង្កើតឡើងដោយក្រសួងអប់រំ សហការជាមួយនឹងសហភាពសហព័ន្ធយុវជនកម្ពុជា និង ក្រុមហ៊ុន A.Z.E Innovation Tech Co, LTD៕
Tag:
សិស្ស
សិក្សា
អប់រំ
អនឡាញ
កូវីដ-១៩
E-School Cambodia
© រក្សាសិទ្ធិដោយ thmeythmey.com