ជាតិ
ទណ្ឌិតជិត៤០០នាក់ ស្ថិតក្នុងបញ្ជីសុំលើកលែងនិងបន្ថយទោស ក្នុងពិធីបុណ្យចូលឆ្នាំ
រូបពីហ្វេសប៊ុករបស់លោក នុត សាវនា អ្នកនាំពាក្យពន្ធនាគារ
×![]()
ដោយ: ឡាយ សុភាវតី
ភ្នំពេញ៖ ទណ្ឌិតជិត៤០០ ពីពន្ធនាគារចំនួន២២ និងមណ្ឌលអប់រំកែប្រែចំនួន៤ ត្រូវបានបញ្ចូលឈ្មោះទៅក្នុងបញ្ជីសុំលើកលែងនិងបន្ធូរបន្ថយទោស នៅក្នុងឱកាសបុណ្យចូលឆ្នាំថ្មីប្រពៃណីខ្មែរ។
លោក អង្គ វង្សវឌ្ឍានា រដ្ឋមន្រី្តក្រសួងយុត្តិធម៌ និងមន្ត្រីពាក់ព័ន្ធ កាលថ្ងៃទី១៩ ខែមីនា ឆ្នាំ២០២០ បានពិនិត្យបញ្ជីឈ្មោះទណ្ឌិតជិត៤០០នាក់ ដែលស្នើសុំបន្ធូរបន្ថយ និងលើកលែងទោស ក្នុងឱកាសបុណ្យចូលឆ្នាំខ្មែរ។ ទណ្ឌិតជិត៤០០នាក់នេះ គឺមានស្រីជាង៤០នាក់។
លោក គឹម សន្តិភាព អ្នកនាំពាក្យក្រសួងយុត្តិធម៌ ប្រាប់សារព័ត៌មានថ្មីៗតាម Telegram ថា ទណ្ឌិតដែលស្នើសុំនោះ បានប្រព្រឹត្តបទល្មើសផ្សេងៗគ្នា ក្នុងនោះក៏មានបទល្មើសគ្រឿងញៀនដែរ។ ប៉ុន្តែគណៈកម្មាធិការជាតិបន្ធូរបន្ថយ និងលើកលែងទោស មិនយកបទល្មើសគ្រឿងញៀន និងបទល្មើសសាហាវយង់ឃ្នងមកពិនិត្យនោះទេ។
លោក បន្ថែមថា ទណ្ឌិតដែលប្រព្រឹត្តបទល្មើសស្រាល និងអនុវត្តទោសបានត្រឹមត្រូវតាមច្បាប់ ហើយមានរយៈពេលខ្លី រួមទាំងទណ្ឌិតដែលមានភាពចាស់ជរា ជំងឺរ៉ាំរ៉ៃឬពិការភាព ទើបអនុគ្រោះនិងលើកលែងទោស។ លោក បញ្ជាក់ថា៖«ការពិនិត្យលើការស្នើសុំបន្ធូរបន្ថយ និងលើកលែងទោសមិនបានគិតពីទណ្ឌិតមកពីបក្សនយោបាយណានោះទេ គឺថាទណ្ឌិតមកពីណាក៏ពិនិត្យ ព្រោះអ្នកនោះមានសិទ្ធិស្មើគ្នាចំពោះមុខច្បាប់ ហើយច្បាប់មិនបានចែងថាទណ្ឌិតមកពីបក្សណានោះទេ»។
សូមរម្លឹកកាលពីបុណ្យអុំទូក ក្នុងឆ្នាំ២០១៩ គណៈកម្មាធិការជាតិបន្ធូរបន្ថយ និងលើកលែងទោស បានពិនិត្យបញ្ជីស្នើសុំបន្ធូរបន្ថយនិងលើកលែងទោសរបស់ទណ្ឌិត ដែលស្នើសុំអនុគ្រោះជាង៥០០នាក់។ គណៈកម្មាធិការជាតិបន្ធូរបន្ថយ និងលើកលែងទោស បានដាក់សំណើទៅរដ្ឋាភិបាលដើម្បីពិនិត្យ និងសម្រេចថ្វាយព្រះមហាក្សត្រ ដោយទទួលបានការលើកលែងនិងបន្ធូបន្ថយទោសដល់ទណ្ឌិតសរុប៩០នាក់៕
© រក្សាសិទ្ធិដោយ thmeythmey.com
