WHO ព្រមានថាអាមេរិក អាចជាទីតាំងផ្ទុះ COVID-19 ថ្មី

COVID-19

អន្តរជាតិ

WHO ព្រមានថាអាមេរិក អាចជាទីតាំងផ្ទុះ COVID-19 ថ្មី

25, Mar 2020 , 2:27 pm

រូបភាព

ប្រជាជនអាមេរិក ឈរតម្រង់ជួរ ដើម្បីធ្វើតេស្តរកមើល COVID-19 នៅក្នុងទីក្រុងញូវយ៉ក, រូបភាព៖ Getty Image

ដោយ: ធៀន ភារិន្ទ

អង្គការសុខភាពពិភពលោក (WHO) នាថ្ងៃទី២៤ ខែមីនា បានព្រមានថា អាមេរិក អាចក្លាយជាទីតាំងផ្ទុះថ្មីនៃជំងឺរលាកសួត ដែលបង្កដោយកូរ៉ូណាវីរុស (COVID-19)។ ការវាយតម្លៃរបស់អង្គការអន្តរជាតិបែបនេះ ធ្វើឡើងបន្ទាប់ពីល្បឿន នៃការឆ្លង COVID-19 នៅអាមេរិកគឺវាលឿនពេក។

គិតត្រឹមថ្ងៃទី២៤ ខែមីនា អាមេរិកមាន COVID-19សរុបលើសពី ៥ម៉ឺនករណី។ គ្រាន់តែថ្ងៃទី២៤ ខែមីនា អាមេរិកមានករណីឆ្លងចំនួន ១១០៧៤ករណី និងអ្នកស្លាប់ជិត៨០០ករណី។

តាមរយៈតួលេខនេះ អាមេរិក គឺជាប្រទេសមានអ្នកឆ្លងជាងគេបំផុត ក្នុងមួយថ្ងៃ ពោលគឺលើសអ៊ីតាលី ដែលមានចំនួនជាង ៥ពាន់ករណី និងអេស្ប៉ាញ មានជិត ៧ពាន់ករណី។

ទាក់ទងនឹងបញ្ហានេះ លោកស្រី Margaret Harris អ្នកនាំពាក្យអង្គការសុខភាពពិភពលោក បានបញ្ជាក់យ៉ាងដូច្នេះថា៖ «ឥឡូវនេះ យើងមើលឃើញមានករណីឆ្លងយ៉ាងលឿន នៅក្នុងទឹកដីអាមេរិក»។ បើតាមលោកស្រី Margaret បើទោះបីជាអាមេរិកមិនទាន់មានករណីធ្ងន់ធ្ងរខ្លាំងក៏ពិតមែន ប៉ុន្តែអាមេរិក ក៏អាចក្លាយជាទីតាំងផ្ទុះ COVID-19 ថ្មីដែរ។

បន្ទាប់ពីព្រមានអាមេរិករួច លោកស្រីអ្នកនាំពាក្យក៏បានលើកឡើងពីចំនុចវិជ្ជមានរបស់អាមេរិកដែរ ដូចជា ការធ្វើតេស្តទ្រង់ទ្រាយធំនៅអាមេរិក ការវិធានការដាក់ចត្តាឡីស័កអ្នកជំងឺ និងការព្យាយាមរបស់អាជ្ញាធរអាមេរិក ក្នុងការរកប្រភពចម្លង COVID-19។

ពេលនេះ អ៊ីតាលី គឺជាចំនុចផ្ទុះ COVID-19 ថ្មី បន្ទាប់ពីចិនមានស្ថានភាពថមថយយ៉ាងខ្លាំង។ គិតត្រឹមថ្ងៃទី២៤ ខែមីនា អ៊ីតាលីមានអ្នកស្លាប់ដោយសារកូរ៉ូណាវីរុសសរុប ៧ពាន់ករណី។

សូមបញ្ជាក់ថា បន្ទាប់ពីបិទរដ្ឋមិនទាន់បានប៉ុន្មានថ្ងៃផង ពេលនេះប្រធានាធិបតីអាមេរិក ដូណាល់ ត្រាំ ចង់ប្រកាសបើកចំហប្រទេសឡើងវិញ នៅចំថ្ងៃពិធីបុណ្យ Easter ដែលគ្រោងនឹងប្រារព្ធនៅថ្ងៃទី ១២ ខែមេសា។ បើតាមលោកត្រាំនៅក្នុងសារព័ត៌មាន Fox News ការបិទរដ្ឋបែបនេះ បានធ្វើឲ្យអាមេរិកខាតបង់សេដ្ឋកិច្ចជាច្រើន ហើយវាជាវិធានការបំផ្លាញសេដ្ឋកិច្ចរបស់អាមេរិក៕