COVID-19
ជាតិ
សេដ្ឋកិច្ច
COVID-19៖ ក្រសួងពាណិជ្ជកម្ម ស្នើពលរដ្ឋកុំជ្រួលច្របល់ ដែលនាំឲ្យអាជីវករឆ្លៀតឱកាសដំឡើងថ្លៃទំនិញ
រូបភាពពីអគ្គនាយកដ្ឋានកាំកុងត្រូល
×![]()
ភ្នំពេញ៖ ក្រសួងពាណិជ្ជកម្ម អំពាវនាវដល់ពលរដ្ឋកុំស្លន់ស្លោរ និងជ្រួលច្របល់ហួសហេតុពេក ដែលនាំឲ្យអាជីវករមួយចំនួនឆ្លៀតឱកាសដំឡើងថ្លៃទំនិញ ដើម្បីយកផលចំណេញពីពលរដ្ឋ។ ការអំពាវនាវនេះ ធ្វើឡើងស្របពេលពលរដ្ឋកំពុងព្រួយបារម្ភពីបញ្ហាជំងឺCOVID-19 ហើយនាំគ្នាទៅទិញទំនិញស្តុកទុក សម្រាប់បរិភោគប្រចាំថ្ងៃ។ 
តាំងពីជំងឺកូវីដ-១៩ ផ្ទុះឡើងមក ក្រសួងពាណិជ្ជកម្ម កត់សម្គាល់ថា អាជីវករដែលលក់ទំនិញតាមអនឡាញ និងឱសថស្ថាននានា ដែលលក់ម៉ាស់ ជែលលាងដៃ ទឹកអាល់កុល ម៉ាស៊ីនវាស់កម្តៅ និងគ្រឿងឧបភោគ រួមទាំងចំណីអាហារ និងទំនិញផ្សេងៗ គឺសុទ្ធនាំគ្នាដំឡើងថ្លៃហួសពីទីផ្សារលក់កន្លងមក។ ក្រសួងចាត់ទុកទង្វើនេះ អាចនឹងបង្កឲ្យចលាចល និងប៉ះពាល់ដល់សង្គមជាតិ។
ជាមួយគ្នាដែរ ក្រសួងពាណិជ្ជកម្ម បានអំពាវនាវឲ្យអាជីវករទាំងអស់ ត្រូវបិទស្លាកតម្លៃជាប្រាក់រៀលលើគ្រប់មុខទំនិញ ដែលសំដៅធានាបាននូវយន្តការ សេដ្ឋកិច្ចទីផ្សារសេរី ការប្រកួតប្រជែងដោយសមធម៌ និងលើកស្ទួយ ដល់ចរាចររូបិយវត្ថុក្នុងស្រុក ក្នុងគោលបំណងបម្រើផលប្រយោជន៍ប្រជាជនទូទៅ។
ជាពិសេសទឹកអាល់កុល ម៉ាស់ ម៉ាស៊ីនវាស់កម្តៅ ជែលលាងដៃ ដែលកំពុងតែចរាចរនៅទីផ្សារ ត្រូវលើកស្លាកថ្លៃជាប្រាក់រៀលឲ្យមានទំហំធំ ដើម្បីរួមគ្នាលើកស្ទួយរូបិយវត្ថនៅកម្ពុជា។ នេះជាការបញ្ជាក់របស់ក្រសួងពាណិជ្ជកម្ម។
កន្លងមកនេះក្រសួងពាណិជ្ជកម្ម ដែលសហការជាមួយនឹងអគ្គនាយកកាំកុងត្រូល បានចុះទៅត្រួតពិនិត្យនៅកន្លែង អាជីវករលក់ទំនិញមួយចំនួន ដោយបានប្រមូលយកសម្ភារក្លែងក្លាយ ក្នុងនោះមានទឹកអាល់កុលជាច្រើនលីត្រផងដែរ ។
កាលពីថ្ងៃទី២៥ ខែមីនា នាកិច្ចសំណេះសំណាលជាមួយនឹងគ្រូពេទ្យស្ម័គ្រចិត្តចំនួន៤២២នាក់នៅវិមានសន្តិភាព សម្តេច ហ៊ុន សែន នាយករដ្ឋមន្ត្រីកម្ពុជា បានព្រមានថា បើមានកន្លែងណាលក់ម៉ាស់ថ្លៃ កន្លែងនោះនឹងត្រូវរឹបអូសម៉ាស់ ឬឈានដល់ការបិទអាជីកម្មអស់មួយជីវិតតែម្ដង។
ត្រឹមថ្ងៃទី២៨ មីនានេះ កម្ពុជា មានអ្នកឆ្លងជំងឺCOVID-19 មានចំនួន១០២នាក់ ក្នុងនោះជាសះស្បើយ១៣នាក់ហើយ។ ក្នុងចំណោមអ្នកជាសះស្បើយនេះ មានជនជាតិខ្មែរ១១នាក់ អង់គ្លេស១នាក់ និងចិន១នាក់៕
Tag:
COVID-19
© រក្សាសិទ្ធិដោយ thmeythmey.com
