ថៃដាក់បម្រាមគោចរពេលយប់៦ម៉ោង ខណៈអ្នកល្មើសអាចជាប់គុករហូត២ឆ្នាំ

COVID-19

អន្តរជាតិ

ថៃដាក់បម្រាមគោចរពេលយប់៦ម៉ោង ខណៈអ្នកល្មើសអាចជាប់គុករហូត២ឆ្នាំ

03, Apr 2020 , 3:58 pm

រូបភាព

នាយករដ្ឋមន្ត្រីថៃ ប្រាយុទ្ធ ចន្ទអូចា ប្រកាសពីបម្រាមគោចរ កាលពីថ្ងៃ២ មេសា ឆ្នាំ២០២០

ដោយ:

រដ្ឋាភិបាលថៃ បានសម្រេចដាក់បម្រាមគោចរ ដែលហាមឃាត់ពលរដ្ឋនៅទូទាំងប្រទេសពីការចាកចេញពីផ្ទះពួកគេ ចាប់ពីម៉ោង១០យប់ ដល់ម៉ោង៤ព្រឹក។ វិធានការនេះ នឹងចូលជាធរមានចាប់ពីយប់ថ្ងៃទី៣ ខែមេសាតទៅ ក្នុងគោលដៅទប់ស្កាត់ការរីករាលដាលនៃជំងឺ COVID-19 ។

ថ្លែងលើកញ្ចក់ទូរទស្សន៍កាលល្ងាចពីថ្ងៃទី២ ខែមេសា នាយករដ្ឋមន្ត្រី ប្រាយុទ្ធ ចន្ទអូចា ប្រកាសពីបម្រាមគោចរនេះ ដែលនឹងបន្តអនុវត្តរហូតដល់ជូនដំណឹងនាពេលក្រោយទៀត។ តាមការចុះផ្សាយរបស់កាសែតបាងកកប៉ុស្តិ៍ ប្រមុខរដ្ឋាភិបាលរូបនេះ ក៏បានអំពាវនាវឲ្យពលរដ្ឋស្ងប់ចិត្ត និងស្នើឲ្យពួកគេកុំទិញចំណីអាហារស្ដុកទុក។ ត្រង់ចំណុចនេះ លោក ប្រាយុទ្ធ សង្កត់ធ្ងន់ថា ប្រជាជននឹងនៅតែបន្តអនុញ្ញាតចាកចេញពីផ្ទះអំឡុងពេលថ្ងៃ ក៏ប៉ុន្តែពួកគនឹងត្រូវប្រកាន់ខ្ជាប់ជានិច្ចនូវការគម្លាតសង្គម។

បុគ្គលិកពេទ្យនិងធនាគារ ក៏ដូចជាកម្មករដឹកជញ្ជូនផ្នែកគ្រឿងបរិភោគ, ផលិតផលកសិកម្ម និងថ្នាំពេទ្យ, បរិក្ខារពេទ្យចាំបាច់, កាសែត, ឥន្ធនៈ ព្រមទាំងផលិតផលសម្រាប់នាំចេញនិងនាំចូល ត្រូវបានលើកលែងសម្រាប់ការរឹតត្បិតនេះ។ ការដឹកមនុស្សទៅដាក់ទីតាំងធ្វើចត្តាឡីស័ក ក៏នៅតែបន្តអនុញ្ញាតដដែល។

ម្យ៉ាងវិញទៀត បម្រាមគោចរនេះ ក៏ត្រូវលើកលែងចំពោះបុគ្គលិកបម្រើការវេនយប់, ប្រជាជនដែលធ្វើដំណើរទៅ ឬមកពីព្រលានយន្តហោះដោយមានឯកសារចាំបាច់បង្ហាញគោលបំណងពួកគេ, មន្ត្រីដែលទទួលកាតព្វកិច្ច និងអ្នកដែលទទួលការអនុញ្ញាតជាមុនពីមន្ត្រីឲ្យចាកចេញសម្រាប់កិច្ចការបន្ទាន់។

បើតាមការចុះផ្សាយរបស់កាសែតបាងកកប៉ុស្តិ៍ អ្នកល្មើសបម្រាមនេះ នឹងប្រឈមទោសជាប់គុករហូតដល់២ឆ្នាំ និង/ឬ ពិន័យជាប្រាក់រហូតដល់ ៤ម៉ឺនបាត (ជាង១២១៥ដុល្លារ)។ ដោយឡែក លោកនាយករដ្ឋមន្ត្រី ប្រាយុទ្ធ បញ្ជាក់ទៀតថា បទបញ្ជារឹតត្បិតការដើរហើរដែលមានស្រាប់ក្នុងបណ្ដាខេត្តដទៃ នឹងបន្តអនុវត្តដដែល។

សូមបញ្ជាក់ថា គិតត្រឹមថ្ងៃទី៣ ខែមេសា ប្រទេសថៃ មានករណីឆ្លង COVID-19 ចំនួន ១៩១៨ករណីហើយ ក្រោយរកឃើញករណីឆ្លងថ្មីបន្ថែមចំនួន ១០៣នាក់។ ចំណែក អ្នកស្លាប់សរុបឡើងដល់ ១៩នាក់ ក្នុងនោះ៤នាក់ទើបរាយការណ៍ថ្មី។ នេះបើតាមក្រសួងសុខាភិបាលថៃ៕