ជាតិ
សហព័ន្ធស្រូវអង្ករ ស្នើរោងម៉ាស៊ីនកិនស្រូវ និងម្ចាស់ឃ្លាំងស្ដុក ជួយទិញស្រូវពីកសិករក្នុងតម្លៃសមរម្យ រូបភាពពីសហព័ន្ធស្រូវអង្ករកម្ពុជា
× ភ្នំពេញ៖ សហព័ន្ធស្រូវអង្ករ បានជំរុញ និងលើកទឹកចិត្តដល់សមាជិកទាំងអស់ ពិសេសបណ្ដារោងម៉ាស៊ីនកិនស្រូវ និងក្រុមហ៊ុនដែលមានឃ្លាំងស្ដុកទុក បន្តទិញស្រូវពីកសិករដែលផលិតបាន ក្នុងតម្លៃមួយសមរម្យតាមតម្លៃទីផ្សារ។ ការស្នើនេះធ្វើឡើង ក្រោយរដ្ឋាភិបាលកម្ពុជា ប្រកាសផ្អាកនាំចេញស្រូវ និងអង្ករស ទៅក្រៅប្រទេសបណ្ដោះអាសន្នដើម្បីធានាសន្តិសុខស្បៀងក្នុងស្រុក។
បើតាមសហព័ន្ធស្រូវអង្ករកម្ពុជា ដើម្បីជួយកសិករដែលមានស្រូវលក់ រាជរដ្ឋាភិបាលកម្ពុជា នឹងប្រើថវិការបស់ក្រសួងសេដ្ឋកិច្ច និងហិរញ្ញវត្ថុជាឥណទាន តាមរយៈធនាគារអភិវឌ្ឍន៍ជនបទ និងកសិកម្ម ជូនដល់រោងម៉ាស៊ីនកិនស្រូវ និងក្រុមហ៊ុនដែលខ្វះខាតទុនបង្វិលក្នុងការទិញស្រូវ។
ក្នុងស្ថានភាពបែបនេះ សហព័ន្ធស្រូវអង្ករកម្ពុជា បានជំរុញ និងលើកទឹកចិត្តដល់សមាជិកទាំងអស់ ពិសេសបណ្ដារោងម៉ាស៊ីនកិនស្រូវ និងក្រុមហ៊ុនដែលមានឃ្លាំងស្ដុកទុក បន្តទិញស្រូវ IR85, IR504, OM5451 និងស្រូវប្រភេទផ្សេងទៀតពីកសិករដែលផលិតបាន ក្នុងតម្លៃមួយសមរម្យតាមតម្លៃទីផ្សារ។ ជាមួយគ្នានេះ សម្រាប់រោងម៉ាស៊ីនកិនស្រូវ និងក្រុមហ៊ុនដែលមិនមានទុនបង្វិលគ្រប់គ្រាន់ អាចទាក់ទងស្នើសុំកម្ចីពីធនាគារអភិវឌ្ឍន៍ជនបទ និងកសិកម្ម។
សហព័ន្ធស្រូវអង្ករ បញ្ជាក់ទៀតថា ដើម្បីបង្កើនផលចំណេញសេដ្ឋកិច្ចសម្រាប់ពេលខាងមុខ សម្រាប់ប្រជាកសិករ និងឈ្មួញដែលទិញស្រូវទុកតាមមូលដ្ឋាន សូមកុំប្រញាប់លក់ស្រូវចេញឲ្យឈ្មួញអ្នកនាំចេញនៅពេលនេះ៕
Tag:
កសិកម្ម
ស្រូវ
អង្ករ
© រក្សាសិទ្ធិដោយ thmeythmey.com