COVID-19
អន្តរជាតិ
COVID-19៖ កូរ៉េខាងត្បូង ដែលធ្លាប់រងគ្រោះខ្លាំងបន្ទាប់ពីចិន ទើបមានអ្នកស្លាប់២០០នាក់
×![]()
ដោយ: តន ចាន់រិទ្ធារ៉ា
កូរ៉េខាងត្បូង នៅថ្ងៃទី៨ ខែមេសា បានប្រកាសពីករណីស្លាប់បន្ថែមដោយជំងឺរលាកសួតធ្ងន់ធ្ងរបង្កដោយកូរ៉ូណាវីរុសថ្មី (COVID-19) ចំនួន៨នាក់ ដែលធ្វើឲ្យតួលេខអ្នកស្លាប់នៅប្រទេសនេះកើនដល់២០០នាក់។ នេះជាចំនួនដ៏តិចបំផុតសម្រាប់កូរ៉េខាងត្បូងដែលជាប្រទេសរងគ្រោះខ្លាំងជាងគេបន្ទាប់ពីចិនកាលពីប៉ុន្មានសប្ដាហ៍កន្លងទៅ បើប្រៀបធៀបទៅនឹងប្រទេសមួយចំនួនដែលផ្ទុះករណីឆ្លងក្រោយ តែមានករណីស្លាប់ និងឆ្លងច្រើនជាង។
កូរ៉េខាងត្បូង ជាប្រទេសទីពីរបន្ទាប់ពីចិនដែល COVID-19 ចាប់ផ្ដើមរាលដាលខ្លាំង។ ករណីទីមួយរបស់កូរ៉េខាងត្បូង ត្រូវបានរាយការណ៍នៅចុងខែកុម្ភៈ ប៉ុន្តែករណីឆ្លងបែរជាមានតិចទៅវិញ។ គិតត្រឹមថ្ងៃទី៨ ខែមេសា កូរ៉េខាងត្បូងមានករណីឆ្លង COVID-19 ទាំងអស់១០៣៨៤នាក់ និងស្លាប់២០០នាក់។ ចំនួនអ្នកស្លាប់នេះ គឺជាអត្រាទាបបំផុតប្រៀបធៀបនឹងចំនួនអ្នកឆ្លង ហើយវាក៏តិចដែរ បើប្រៀបធៀបនឹងប្រទេសផ្សេងដែលមានករណីឆ្លង COVID-19 ក្រោយកូរ៉េខាងត្បូងនោះ។
បីសប្ដាហ៍ចុងក្រោយ កូរ៉េខាងត្បូងរាយការណ៍ពីការឆ្លងប្រចាំថ្ងៃប្រហែលមួយរយ ឬក្រោមមួយករណីប៉ុណ្ណោះ។ អាជ្ញាធរកូរ៉េខាងត្បូង បានបន្តទទូចឲ្យប្រជាជនអនុវត្តគម្លាតសង្គមបន្ថែមទៀត សំដៅកាត់ផ្ដាច់ការឆ្លងថ្មីៗ បន្ថែមពីលើវិធានការរបស់រដ្ឋាភិបាលដែលត្រូវបានប្រទេសជាច្រើនសរសើរថា មានប្រសិទ្ធភាពក្នុងការទប់ស្កាត់ COVID-19 មិនឲ្យរាលដាលនោះ។ អនុរដ្ឋមន្ត្រីសុខាភិបាលកូរ៉េខាងត្បូង Kim Ganglip និយាយថា គម្លាតសង្គម ជាវ៉ាក់សាំងតែមួយគត់។
ផ្ទុយពីកូរ៉េខាងត្បូង ប្រទេសជាច្រើននៅប៉ែកខាងលិច បានកត់ត្រាពីករណីឆ្លងយ៉ាងច្រើន ទោះប្រទេសទាំងនោះមានករណីឆ្លង COVID-19 ក្រោយ ឬមានតិចតួចពេលកូរ៉េខាងត្បូងរងគ្រោះខ្លាំងនោះ។ អាមេរិក មានករណីឆ្លងបួនសែននាក់ ស្លាប់ជាង១២៨០០នាក់, អេស្ប៉ាញឆ្លងជាង១៤ម៉ឺននាក់ ស្លាប់១៤០០០នាក់, អ៊ីតាលីឆ្លងជាង១៣៥០០០នាក់ ស្លាប់ជាង១៧១០០នាក់ និងអាល្លឺម៉ង់ឆ្លងជិត១១ម៉ឺននាក់ ស្លាប់ជាងមួយម៉ឺននាក់។
អ្វីដែលកូរ៉េខាងត្បូង កំពុងធ្វើដើម្បីទប់ស្កាត់ការឆ្លង COVID-19 មានការអភិវឌ្ឍការធ្វើតេស្តរកវីរុសឲ្យបានលឿនបំផុត ការធ្វើតេស្តជនសង្ស័យ និងការដាក់ដាច់ដោយឡែកអ្នកឆ្លង និងអ្នកសង្ស័យ។ លើសពីនោះ អាជ្ញាធរកូរ៉េខាងត្បូង ក៏បានប្រកាសព័ត៌មានទាក់ទងជំងឺនេះ និងអ្នកជំងឺទៅកាន់ប្រជាជនតាមរយៈការបង្កើត App ជាដើម។ ការចូលរួមរបស់ប្រជាជន ក៏ជាផ្នែកមួយដែលជួយឲ្យករណីឆ្លងនៅកូរ៉េខាងត្បូង មានមិនច្រើនដែរ។
មិនត្រឹមមានអត្រាស្លាប់តិចឡើយ កូរ៉េខាងត្បូងក៏មានអត្រាសះស្បើយច្រើនផងដែរ។ មកទល់ពេលនេះ មនុស្សចំនួន៦៧៧៦នាក់ដែលច្រើនជាងពាក់កណ្ដាលនៃអ្នកឆ្លងទាំងអស់ ត្រូវបានព្យាបាលសះស្បើយ ហើយចាកចេញពីមន្ទីរពេទ្យ៕
Tag:
កូរ៉េខាងត្បូង
ចិន
COVID-19
© រក្សាសិទ្ធិដោយ thmeythmey.com
