COVID-19
អន្តរជាតិ
ឥណ្ឌូណេស៊ី ប្រកាសជំងឺ COVID-19 ជាមហន្តរាយជាតិ បុគ្គលិកសុខាភិបាលឥណ្ឌូណេស៊ី វាស់កម្ដៅប្រជាជនក្នុងទីក្រុងហ្សាការតា។ រូបភាព Xinhua
× ប្រធានាធិបតីឥណ្ឌូណេស៊ី ចូកូ វីដូដូ បានចេញសេចក្ដីសម្រេចមួយចាត់ទុកជាជំងឺផ្លូវដង្ហើមធ្ងន់ធ្ងរ COVID-19 ជាមហន្តរាយជាតិ បន្ទាប់ពីបានប្រកាសភាពអាសន្នដោយសារជំងឺនេះរួចមក។ មិនមានការប្រែប្រួលគោលនយោបាយអ្វីទេក្រោយការប្រកាសនេះ។ នេះបើតាមការបញ្ជាក់របស់មន្ត្រីឥណ្ឌូណេស៊ីនៅថ្ងៃទី១៤ ខែមេសា ដោយរដ្ឋាភិបាលតាមតំបន់ នឹងត្រូវគោរពគោលនយោបាយរបស់រដ្ឋាភិបាលកណ្ដាលឲ្យកាន់តែខ្ជាប់ខ្ជួន។
«ប្រកាសគ្រោះមហន្តរាយមិនមែនធម្មជាតិដែលបង្កដោយការរាលដាលជំងឺ COVID-19 ជាគ្រោះមហន្តរាយថ្នាក់ជាតិ។» នេះជាការសម្រេចក្នុងក្រឹត្យចេញដោយប្រធានាធិបតីឥណ្ឌូណេស៊ី ចូកូ វីដូដូ នៅថ្ងៃទី១៣ ខែមេសា។ ក្នុងក្រឹត្យនេះ ការទប់ស្កាត់ជំងឺផ្លូវដង្ហើមបង្កដោយកូរ៉ូណាវីរុស (COVID-19) ដឹកនាំដោយក្រុមការងារប្រឆាំង COVID-19 ដោយសហការជាមួយរដ្ឋាភិបាលតំបន់ទាំងអស់ រដ្ឋមន្ត្រី និងទីភ្នាក់ងាររដ្ឋាភិបាល។
បើតាមក្រឹត្យដែលផ្សាយដោយកាសែត The Jakarta Post វិធានការទាំងឡាយរបស់រដ្ឋបាលថ្នាក់ខេត្តនានា ត្រូវតែស្របតាមគោលនយោបាយរបស់រដ្ឋាភិបាលកណ្ដាល។ កន្លងទៅ រដ្ឋបាលថ្នាក់ក្រោមជាតិរបស់ឥណ្ឌូណេស៊ី បានអនុវត្តវិធានការតឹងរ៉ឹងទៅតាមស្ថានភាពរៀងៗខ្លួន។ ជាក់ស្ដែង រដ្ឋធានីហ្សាការតា និងទីក្រុងប៊ូហ្ក័រជាដើម បានប្រើវិធានការរឹតត្បិតសកម្មភាពសង្គមខ្លាំងព្រោះមានករណីឆ្លងច្រើនជាងតំបន់ដទៃ។
លោក Doni Monardo ប្រធានទីភ្នាក់ងារគ្រប់គ្រងគ្រោះមហន្តរាយឥណ្ឌូណេស៊ី និយាយថា ខណៈរដ្ឋាភិបាលបន្តអនុវត្តតាមការរឹតត្បិតប្រជាជននោះ ក្រុមការងារប្រឆាំង COVID-19 នឹងមានអំណាចកាន់តែច្រើនដើម្បីដោះស្រាយវិបត្តិសុខាភិបាលមួយនេះ។ បើតាមមន្ត្រីរូបនេះ ក្រុមការងារនេះ នឹងមានអំណាចលើការកិច្ចការដូចជាការទទួលបានធនធានមនុស្សបន្ថែម ការចល័តមនុស្ស និងគ្រឿងបរិក្ខារ អន្តោប្រវេសន៍ គយ និងការទិញទំនិញជាដើម។
គិតត្រឹមថ្ងៃទី១៣ ខែមេសា ឥណ្ឌូណេស៊ីមានករណីឆ្លងទាំងអស់ចំនួន៤៥៥៧នាក់ និងស្លាប់៣៩៩នាក់ ដែលជាតួលេខច្រើនជាងគេនៅអាស៊ាន ខណៈមនុស្ស៣៨០នាក់ បានសះស្បើយ៕
© រក្សាសិទ្ធិដោយ thmeythmey.com