COVID-19
អន្តរជាតិ
កូរ៉េខាងត្បូងបើកការស៊ើបអង្កេត ក្រោយករណីលាប់ជំងឺ COVID-19 កើនឡើង រូបភាព Xinhua
× ករណីកើតជំងឺ COVID-19 ឡើងវិញ ដែលហៅសាមញ្ញថា លាប់ កំពុងក្លាយជាក្ដីបារម្ភសម្រាប់កូរ៉េខាងត្បូង។ ការលាប់ជំងឺ COVID-19 នេះ បានកើនឡើងច្រើនករណី ស្របពេលដែលករណីឆ្លងថ្មីនៅកូរ៉េខាងត្បូង បានបន្តថយចុះ។ អាជ្ញាធរសុខាភិបាលកូរ៉េខាងត្បូង កំពុងស៊ើបអង្កេតករណីបែបនេះដើម្បីរកមូលហេតុឲ្យច្បាស់លាស់។
មជ្ឈមណ្ឌលកូរ៉េសម្រាប់ការទប់ស្កាត់ និងគ្រប់គ្រងជំងឺឆ្លង (KCDC) អះអាងថា ត្រឹមថ្ងៃទី១៣ ខែមេសា មនុស្សចំនួន១១៦នាក់ ត្រូវបានបញ្ជាក់ថា លាប់ជំងឺ COVID-19 នេះ។ ក្នុងចំណោមករណីលាប់នេះ មាន៨៣ករណី កើតឡើងនៅទីក្រុង Daegu និងខេត្ត North Gyeongsang ដែលជាតំបន់ផ្ទុះករណីឆ្លងធំជាងគេនៅកូរ៉េខាងត្បូង។
បើតាមការផ្សាយរបស់ទីភ្នាក់ងារព័ត៌មាន Yonhap មជ្ឈមណ្ឌលខាងលើ កំពុងរកមូលហេតុនៃការលាប់នេះ ដោយពិនិត្យមើលអ្នកជំងឺធ្វើតេស្តវិជ្ជមានម្ដងទៀតថា ពួកគេឆ្លងវីរុសម្ដងទៀត ឬក៏វីរុសនៅក្នុងខ្លួនប្រាណមិនទាន់អស់។ ប្រធាន KCDC លោក Jeong Eun-kyeong និយាយនៅថ្ងៃទី១៣ ខែមេសា ថា មជ្ឈមណ្ឌលរបស់លោក ក៏កំពុងស្រាវជ្រាវថា ករណីលាប់នេះ អាចជាការឆ្លងវីរុសទីពីរឬយ៉ាងណា (Secondary Infection)។
លោក Jeong បន្តថា កូរ៉េខាងត្បូង ក៏សហការជាមួយអង្គការសុខភាពពិភពលោកពាក់ព័ន្ធការធ្វើតេស្តវិជ្ជមាននេះឡើងវិញដែរ។ លើសពីនោះ KCDC ក៏សិក្សាពីលទ្ធភាពដែលអ្នកសះស្បើយពី COVID-19 អាចមានប្រព័ន្ធភាពស៊ាំទល់នឹងជំងឺនេះ និងរយៈពេលដែលប្រព័ន្ធភាពស៊ាំដំណើរការផងដែរ។ មកទល់ពេលនេះ គេក៏មិនទាន់ឃើញមានករណីអ្នកជំងឺលាប់ ចម្លងដល់អ្នកផ្សេងឡើយ។
យ៉ាងណាមិញ ក្រុមមន្ត្រីសុខាភិបាលកូរ៉េខាងត្បូង ជឿថា មានភាគរយច្រើនដែលវីរុស ទំនងជាមានសកម្មភាពឡើងវិញជាជាងការឆ្លងម្ដងទៀត ព្រោះពេលដែលអ្នកជំងឺលាប់ទាំងនោះ មានលទ្ធផលវិជ្ជមានជាថ្មី គឺមានរយៈពេលខ្លីប៉ុណ្ណោះក្រោយអនុញ្ញាតឲ្យចេញពីមន្ទីពេទ្យ។ នៅកូរ៉េខាងត្បូង អ្នកជំងឺ COVID-19 ត្រូវមានលទ្ធផលតេស្តអវិជ្ជមានពីរដងក្នុងរយៈពេល២៤ម៉ោង ទើបត្រូវបានអនុញ្ញាតឲ្យចេញពេទ្យ៕
Tag:
កូរ៉េខាងត្បូង
COVID-19
© រក្សាសិទ្ធិដោយ thmeythmey.com