COVID-19
អន្តរជាតិ
បុរសម្នាក់ស្តាប់ការប្រកាសការបន្តបិទប្រទេសរបស់នាយករដ្ឋមន្រ្តីនារិន្រ្ទា ម៉ូឌី។ រូបភាព៖ Reuters
×![]()
ដោយ: ធៀន ភារិន្ទ
នាយករដ្ឋមន្ត្រី នារិន្ទ្រា ម៉ូឌី នាថ្ងៃទី១៤ ខែមេសា បានប្រកាសបិទប្រទេសឥណ្ឌារហូតដល់ថ្ងៃទី៣ ខែឧសភា ដើម្បីទប់ស្កាត់ការរាតត្បាតនៃជំងឺរលាកសួត ដែលបង្កដោយកូរ៉ូណាវីរុស (COVID-19)។ ការបិទប្រទេសលើកទី១ ដែលមានរយៈពេល ៣សប្តាហ៍ នឹងអស់សុពលភាពនៅយប់នេះ។ 
ចាប់តាំងពីថ្ងៃទី២៥ ខែមីនា មក ឥណ្ឌាបានស្ថិតក្នុងស្ថានភាពបិទប្រទេស ដើម្បីបង្ការករណីឆ្លងនៃ COVID-19 នៅក្នុងប្រទេស។ ដោយមើលស្ថានភាព COVID-19 ហាក់ដូចជាមិនថយចុះ នាយករដ្ឋមន្ត្រីឥណ្ឌា លោក នារិន្ទ្រា ម៉ូឌី បានសម្រេចបិទប្រទេសបន្តទៀត ដើម្បីទប់ស្កាត់ COVID-19 មិនឲ្យកើនឡើងបន្តទៀត។
ថ្លែងតាមរយៈកញ្ចក់ទូរទស្សន៍ប្រាប់ប្រជាជនទូទាំងប្រទេស លោក ម៉ូឌី និយាយយ៉ាងដូច្នេះថា៖ «រហូតដល់ថ្ងៃទី៣ ខែឧសភា យើងទាំងអស់គ្នាត្រូវតែស្ថិតក្នុងស្ថានភាពបិទប្រទេស។ អំឡុងពេលនេះ យើងត្រូវតែស្តាប់តាមបទបញ្ជាដដែល ដូចដែលយើងធ្លាប់បានអនុវត្តកន្លងមក»។ ជាមួយគ្នានេះ លោកនាយករដ្ឋមន្ត្រី ក៏បានថ្លែងសារគោរព និងអរគុណចំពោះប្រជាជនឥណ្ឌាទាំងអស់ ដែលគាំទ្ររដ្ឋាភិបាលឥណ្ឌា ក្នុងការប្រយុទ្ធប្រឆាំងជាមួយកូរ៉ូណាវីរុសផងដែរ។
បើតាមលោកម៉ូឌី ការបិទប្រទេស អាចធ្វើឲ្យប្រជាជនជាច្រើនរងគ្រោះ ប៉ុន្តែការចម្លង COVID-19 ពីមនុស្សម្នាក់ទៅមនុស្សម្នាក់ទៀត គឺកាន់តែអាក្រក់ទៅទៀត។ ការបិទប្រទេសនេះ គឺវាសំខាន់ ដើម្បីទប់ស្កាត់មិនឲ្យកូរ៉ូណាវីរុសជះឥទ្ធិពលអាក្រក់ទៅដល់ផ្នែកផ្សេងទៀតរបស់ប្រទេស។ ទន្ទឹមនេះ លោកម៉ូឌី ក៏បានអំពាវនាវឲ្យប្រជាជនប្រុងប្រយ័ត្ន និងចេះការពារខ្លួងពីការឆ្លងវីរុសថ្មីនេះដែរ។ នេះបើតាមការចុះផ្សាយរបស់សារព័ត៌មាន Aljazeera។
មុនពេលលោក ម៉ូឌី ប្រកាសបន្តបិទប្រទេសបន្ត មានរដ្ឋ និងតំបន់ចំនួន៧ បានប្រកាសបន្ថែមរយៈពេលបិទប្រទេសរួចហើយ ពោលគឺដើម្បីឆ្លើយតបទៅនឹងការផ្ទុះឡើងនៃ COVID-19។ គិតមកត្រឹមថ្ងៃនេះ ឥណ្ឌាមានករណី COVID-19 សរុបចំនួនជាង ១ម៉ឺនករណី អ្នកស្លាប់ ៣៥៨ករណី និងអ្នកជាសះស្បើយមានចំនួន ១២០០ករណី។
សូមបញ្ជាក់ថា ជាប្រទេសមានប្រជាជនជាង ១,៣ពាន់លាននាក់ ឥណ្ឌា ត្រូវបានក្រុមអ្នកជំនាញព្រួយបារម្ភជាខ្លាំង ព្រោះប្រទេសនៅក្នុងតំបន់អាស៊ីខាងត្បូងមួយនេះ គឺមានដង់ស៊ីតេប្រជាជនខ្ពស់នៅក្នុងទីក្រុង ឯប្រព័ន្ធសុខាភិបាលមានលក្ខណៈទន់ខ្សោយ ដែលអាចរងគ្រោះខ្លាំងដោយសារ COVID-19 ៕
Tag:
ឥណ្ឌា
COVID-19
© រក្សាសិទ្ធិដោយ thmeythmey.com
