COVID-19
អន្តរជាតិ
វៀតណាម ផ្ដល់ជំនួយតម្លៃរាប់ម៉ឺនដុល្លារឲ្យជប៉ុន រុស្ស៊ី និងអាមេរិកដើម្បីទប់ទល់ COVID-19
× វៀតណាម នៅថ្ងៃទី១៦ ខែមេសា បានប្រគល់ជំនួយជាសម្ភារវេជ្ជសាស្ត្រតម្លៃរាប់ម៉ឺនដុល្លារ និងម៉ាស់ជាច្រើនសន្លឹកឲ្យមហាអំណាចអាមេរិក រុស្ស៊ី និងជប៉ុនដើម្បីទប់ទល់នឹងការរាលដាលជំងឺផ្លូវដង្ហើមបង្កដោយកូរ៉ូណាវីរុស (COVID-19) ។
នៅថ្ងៃទី១៦ ខែមេសា អនុរដ្ឋមន្ត្រីអចិន្ត្រៃយ៍ក្រសួងការបរទេសវៀតណាម Bui Thanh Son បានប្រគល់ម៉ាស់ និងសម្ភារវេជ្ជសាស្ត្រតម្លៃ១០ម៉ឺនដុល្លារឲ្យអគ្គរដ្ឋទូតជប៉ុនដែលតំណាងរដ្ឋាភិបាលក្រុងតូក្យូ។ ដំណាលគ្នានោះ រដ្ឋមន្ត្រីការិយាល័យនាយករដ្ឋមន្ត្រី Mai Tien Dung ក៏ប្រគល់ម៉ាស់វេជ្ជសាស្ត្រចំនួន៥ម៉ឺនសន្លឹកសម្រាប់ការិយាល័យនាយករដ្ឋមន្ត្រីជប៉ុនប្រើប្រាស់ផងដែរ។
បើតាមកាសែតអនឡាញរបស់រដ្ឋាភិបាលវៀតណាម VGP អគ្គរដ្ឋទូតរងជប៉ុនប្រចាំហាណូយ លោក Asaduma Sinnichi បានអរគុណរដ្ឋាភិបាលវៀតណាមចំពោះជំនួយទាំងនេះ ហើយក៏អរគុណវៀតណាមដែលមើលថែជនជាតិជប៉ុនប្រមាណ២ម៉ឺននាក់ដែលរស់នៅវៀតណាមផងដែរ។ កន្លងទៅ ជប៉ុន ក៏សន្យាផ្ដល់ជំនួយប្រមាណ២០០លានយ៉េនសម្រាប់វៀតណាមក្នុងការដោះស្រាយនឹងជំងឺដែលរាលដាលយ៉ាងរហ័សនេះ។
ក្រៅពីជប៉ុន លោក Bui ក៏បានប្រគល់ម៉ាស់វេជ្ជសាស្ត្រផលិតនៅវៀតណាមផ្ទាល់ដែលមានតម្លៃ២០ម៉ឺនដុល្លារឲ្យអាមេរិកផងដែរ។ អគ្គរដ្ឋអាមេរិក លោក Daniel J. Kritenbrink ជាអ្នកទទួលជំនួយនេះ។ ដោយឡែក លោករដ្ឋមន្ត្រី Mai ក៏បានផ្ដល់ជំនួយជាម៉ាស់ចំនួន៥ម៉ឺនទៀតឲ្យសេតវិមានអាមេរិកផងដែរ។
អាមេរិក ជាប្រទេសរងគ្រោះធ្ងន់ធ្ងរជាងគេដោយសារ COVID-19 ដោយនាំមុខគេទាំងចំនួនអ្នកឆ្លង និងចំនួនអ្នកស្លាប់។ គិតត្រឹមថ្ងៃទី១៧ ខែមេសា អាមេរិកមានករណីឆ្លងចំនួនជាង៧១ម៉ឺននាក់ និងស្លាប់ជាង៣៧ពាន់នាក់។ នេះបើតាមវេបសាយ Worldometers ។
នៅថ្ងៃដដែល រដ្ឋមន្ត្រីការិយាល័យនាយករដ្ឋមន្ត្រីដដែល ក៏ប្រគល់ម៉ាស់ចំនួន៥ម៉ឺនសន្លឹកឲ្យការិយាល័យប្រធានាធិបតីរុស្ស៊ីផងដែរ។
តាមពិតទៅ វៀតណាមបានផ្ដល់ជំនួយវេជ្ជសាស្ត្រ និងម៉ាស់ដល់ប្រទេសច្រើនរួចមកហើយដែរដូចជា កម្ពុជា ឡាវ ស៊ុយអែត បារាំង អាល្លឺម៉ង់ និងអ៊ីតាលីជាដើម។
© រក្សាសិទ្ធិដោយ thmeythmey.com