COVID-19
អន្តរជាតិ
នយោបាយអន្តរជាតិ
ចិន៖ ការមិនបង់វិភាគទានរបស់អាមេរិកឲ្យWHO គឺជាការបំពានករណីកិច្ចសមាជិក អ្នកនាំពាក្យក្រសួងការបរទេសចិន លោក Geng Shuang។ រូបភាព៖ ក្រសួងការបរទេសចិន
×
ការមិនបង់វិភាគទានរបស់អាមេរិក ទៅអង្គការសុខភាពពិភពលោក(WHO) ជុំវិញជំងឺរលាកសួត ដែលបង្កដោយកូរ៉ូណាវីរុស(COVID-19) គឺជាការបំពានករណីកិច្ចជាសមាជិក។ មិនតែប៉ុណ្ណោះ ការផ្អាកវិភាគទានបែបនេះ មានតែបង្កឲ្យបណ្តាប្រទេស ដែលមានប្រព័ន្ធសុខាភិបាលទន់ខ្សោយ កាន់តែរងគ្រោះថែមទៀត។ នេះបើតាមការឆ្លើយតបរបស់អ្នកនាំពាក្យក្រសួងការបរទេសចិន លោក Geng Shuang នាថ្ងៃទី២៤ ខែមេសា ទៅនឹងការលើកឡើងរបស់ប្រមុខការទូតអាមេរិក លោក ម៉ៃ ប៉ុមប៉េអូ ពីការផ្អាកជំនួយឲ្យ WHO។
ក្នុងមួយឆ្នាំៗ អាមេរិក បានបង់វិភាគទានទៅអង្គការសុខភាពពិភពលោកជាច្រើនលានដុល្លារ។ គ្រាន់តែឆ្នាំ២០១៩ អាមេរិកផ្តល់ជំនួយដល់អង្គការអន្តរជាតិមួយនេះ រហូតដល់ ៤០០លានដុល្លារឯណោះ ដែលស្មើនឹង ១៥ភាគរយនៃថវិការសរុបរបស់អង្គការ។ ប៉ុន្តែនៅថ្ងៃទី១៥ ខែមេសា ប្រធានាធិបតីអាមេរិក ដូណាល់ ត្រាំ បានប្រកាសផ្អាកជំនួយដល់ WHO បន្ទាប់ពីលោកមើលឃើញ អង្គការមួយនេះ មិនមែនតម្លាភាព និងជួយចិនលាក់បាំងព័ត៌មាន COVID-19។
ពាក់ព័ន្ធនឹងបញ្ហានេះ លោក ម៉ៃ ប៉ុមប៉េអូ រដ្ឋមន្ត្រីការបរទេសអាមេរិក បានលើកឡើងនៅក្នុងកិច្ចសម្ភាសជាមួយទូរទស្សន៍Fox News នាថ្ងៃទី២២ ខែមេសា ថា អាមេរិកប្រហែលជាមិនអាចផ្តល់ជំនួយដល់អង្គការសុខភាពពិភពលោកឡើងវិញបានទេ បើទោះបីជាមានការផ្លាស់ប្តូរការដឹកនាំ ឬផ្លាស់ប្តូរច្រើនជាងនេះក៏ដោយ។
បន្ទាប់ពីមានការលើកឡើងរបស់ប្រមុខការទូតអាមេរិកបែបនេះ អ្នកនាំពាក្យចិន លោក Geng បានបញ្ជាក់នៅមុខអ្នកសារព័ត៌មានជាច្រើននាក់ថា ក្នុងនាមជាសមាជិកWHO ប្រទេសទាំងអស់ ត្រូវបានចងភ្ជាប់កាតព្វកិច្ចដោយការបង់វិភាគទាន ហើយការផ្អាកវិភាគទានអាមេរិកបែបនេះ គឺជាទង្វើបំពានករណីកិច្ចជាសមាជិក។ ជាមួយគ្នានេះដែរ អ្នកនាំពាក្យវ័យ ៤៧ឆ្នាំរូបនេះ បានព្រមានអាមេរិកថា សកម្មភាពរបស់រដ្ឋាភិបាលទីក្រុងវ៉ាស៊ីនតោន ក្នុងកាលៈទេសៈCOVID-19បែបនេះ គឺមានតែបង្កភាពរងគ្រោះដល់ប្រទេសរបស់ខ្លួន និងបណ្តាប្រទេស ដែលមានប្រព័ន្ធសុខាភិបាលទន់ខ្សោយតែប៉ុណ្ណោះ។
ម្យ៉ាងវិញទៀត អ្នកនាំពាក្យក្រសួងការបរទេសចិន ថែមទាំងច្រានចោលពាក្យសម្តីរបស់អាមេរិក ដែលបានចោទអង្គការសុខភាពពិភពលោកថាគ្មានតម្លាភាពផងដែរ។ ការបដិសេធបែបនេះ ចិន បានលើកឡើងថា ការសំអាងរបស់ទីក្រុងវ៉ាស៊ីនតោន គឺជារឿងមិនពិត និងបង្ខូចកេរ្តិ៍ឈ្មោះរបស់ WHO។ ក្រៅពីឆ្លើយតបទៅនឹងរដ្ឋមន្ត្រីការបរទេសអាមេរិក លោក Geng ក៏បានសរសើរលោក Tedros Adhanom Ghebreyesus នាយកWHO ពីកិច្ចខិតខំប្រឹងប្រែងក្នុងការទប់ស្កាត់ និងប្រយុទ្ធប្រឆាំងជាមួយ COVID-19 ផងដែរ។
មកទល់ពេលនេះ ជំងឺរលាកសួត ដែលបង្កដោយកូរ៉ូណាវីរុស មិនត្រឹមក្លាយជាជំងឺឆ្លងសកល ដែលប្រទេសជាច្រើនកំពុងតែរងគ្រោះប៉ុណ្ណោះទេ ប៉ុន្តែវាថែមទាំងក្លាយទៅជារឿងនយោបាយសម្រាប់ប្រទេសមួយចំនួន។ រឿងនយោបាយនេះ ប្រទេសមួយចំនួន បានចោទគ្នាទៅវិញទៅមក ជុំវិញបញ្ហាដើមកំណើតនៃកូរ៉ូណាវីរុស ការចែករំលែកព័ត៌មាន និងការលាក់បាំងព័ត៌មានជាដើម៕
Tag:
អាមេរិក
WHO
COVID-19
© រក្សាសិទ្ធិដោយ thmeythmey.com