កីឡាជាតិ
ជាតិ
កីឡាករ ឡៅ ចិត្រា រងរបួសបាក់ឆ្អឹងម្រាមដៃ ដែលអាចអវត្តមានលើសង្វៀនមួយរយៈធំ
× កីឡាករ ឡៅ ចិត្រា បានរងរបួសបាក់ឆ្អឹងម្រាមដៃចង្អុលខាងឆ្វេង នាជំនួបដណ្តើមប្រាក់លានពានរង្វាន់លោក ម៉ា សេរី នៅសង្វៀន CNC កាលពីចុងសប្តាហ៍មុន។ បញ្ហារបួសនេះ អាចធ្វើឲ្យ ចិត្រា អវត្តមានពីសង្វៀនមួយរយៈធំ ដ្បិតរបួសរបស់គេមានសភាពធ្ងន់ធ្ងរ។
កីឡាករ ឡៅ ស៊ីណាត នៅថ្ងៃទី២៧ ខែមេសា ឆ្នាំ២០២០ នេះ បានបង្ហោះរូបថតបីសន្លឹកលើហ្វេសប៊ុក បង្ហាញពីស្ថានភាពរបស់កីឡាករ ឡៅ ចិត្រា ដែលជាប្រុសបង្កើតរបស់ខ្លួន។ លោក ស៊ីណាត បានបញ្ជាក់ថា ក្រោយការស្គេនពីគ្រូពេទ្យជំនាញលទ្ធផលបង្ហាញថា ចិត្រា បានរងរបួសបាក់គល់ឆ្អឹងម្រាមដៃចង្អុលខាងឆ្វេងស្ទើរដាច់ចេញពីគ្នា។
បើតាមអតីតកីឡាករឆ្នើមរបស់កម្ពុជារូបនេះ មូលហេតុដែលធ្វើឲ្យកីឡាករ ឡៅ ចិត្រា រងរបួសបែបនេះ គឺបន្ទាប់ពីរូបគេដាល់ចំក្បាលកីឡាករ មឿន សុខហ៊ុន នាការប្រកួតដណ្តើមពានរង្វាន់លោក ម៉ា សេរី នៅលើសង្វៀនប្រដាល់របស់ CNC កាលពីថ្ងៃទី២៥ ខែមេសា ឆ្នាំ២០២០។
លោក ស៊ីណាត បានបញ្ជាក់ថា ចិត្រា បានរងរបួសនេះតាំងពីទឹកទី១ តែរូបគេបានតស៊ូវាយរហូតចប់ការប្រកួត។ ជាលទ្ធផលកាលណោះ កីឡាករ មឿន សុខហ៊ុច បានយកឈ្នះកីឡាករ ឡៅ ចិត្រា ដោយពិន្ទុមិនឯកច្ឆន្ទ។ ជ័យជម្នះនេះ ជួយឲ្យ សុខហ៊ុច ក្លាយជាម្ចាស់ពានលោក ម៉ា សេរី រដូវកាលទី៤ អមជាមួយថវិកាលើកទឹកចិត្ត១ពាន់ដុល្លារ។
គ្រូពេទ្យមិនបានវាយតម្លៃលើស្ថានភាពរបួសរបស់កីឡាករ ឡៅ ចិត្រា ចំពោះពេលវេលា ដែលត្រូវចំណាយលើការសម្រាកព្យាបាលនោះទេ។ តែបើតាមលោក ឡៅ ស៊ីណាត បានវាយតម្លៃថា ប្អូនប្រុសរបស់ខ្លួនអាចចំណាយពេលជាច្រើនសប្តាហ៍ក្នុងការសម្រាកព្យាបាលឲ្យជាសះស្បើយ៕
Tag:
ប្រដាល់គុនខ្មែរ
ឡៅ ចិត្រា
ឡៅ ស៊ីណាត
© រក្សាសិទ្ធិដោយ thmeythmey.com