COVID-19
អន្តរជាតិ
រយៈពេល៤ថ្ងៃជាប់គ្នា ថៃមានករណីឆ្លងCOVID-19 ក្រោម ១០ករណី រូបភាព៖ Reuters
× រដ្ឋាភិបាលថៃ បានរាយការណ៍ពីករណីឆ្លងជំងឺរលាកសួត ដែលបង្កដោយកូរ៉ូណាវីរុស(COVID-19) ថ្មីចំនួន ៧ករណីបន្ថែមទៀតនៅក្នុងប្រទេស។ ជាមួយតួលេខថ្ងៃទី៣០ ខែមេសានេះ ថៃមានករណីឆ្លងថ្មីតិចជាង ១០ករណី ក្នុងរយៈពេល ៤ថ្ងៃជាប់ៗគ្នា។
មួយរយៈមុន តួលេខឆ្លងCOVID-19 នៅប្រទេសថៃ បានកើនឡើងយ៉ាងគំហុក ដោយតួលេខឆ្លងខ្ពស់ជាងគេនៅប្រទេសថៃក្នុងមួយថ្ងៃ គឺមានចំនួន ១៨៨ករណី។ នៅថ្ងៃបន្ទាប់ តួលេខអ្នកឆ្លងថ្មី បានថមថយបន្តិច ដោយមកត្រឹមតែជាង ១០០ករណីប៉ុណ្ណោះ។ រហូតដល់ថ្ងៃទី៣០ ខែមេសានេះ តួលេខនៅថៃ គឺមានករណីឆ្លងថ្មីត្រឹមតែ ៧ករណីប៉ុណ្ណោះ និងមិនមានអ្នកស្លាប់។
អត្រានេះ បានធ្វើឲ្យថៃមានករណីឆ្លងថ្មី ក្រោម ១០ករណី ក្នុងរយៈពេល ៤ថ្ងៃជាប់គ្នា បើគិតចាប់តាំងពីថ្ងៃទី ២៧ ខែមេសាកន្លងមក។ នេះបើតាមតួលេខរបស់វែបសាយ Worldometer។ បើតាមការបញ្ជាក់ របស់អ្នកនាំពាក្យមជ្ឈមណ្ឌលគ្រប់គ្រងស្ថានការណ៍ COVID-19 ថៃ (CCSA) លោក Taweesilp Visanuyothin ក្នុងចំណោម ៧ករណីថ្មីនេះ មាន៣ករណីនាំចូលមកពីម៉ាឡេស៊ី និង៤ករណី ឆ្លងនៅក្នុងស្រុក ដោយ៣ករណីនៅភូកេត និង១ករណីនៅខេត្តKrabi ។
តួលេខ COVID-19 សរុបរបស់ថៃមកទល់ពេលនេះ មានចំនួន ២៩៥៤ករណី អ្នកស្លាប់ចំនួន ៥៤នាក់ និងអ្នកជាសះស្បើយមានចំនួន ២៦៨៤នាក់។ ចំណែកអ្នកជំងឺ ដែលកំពុងតែស្នាក់នៅមន្ទីរពេទ្យមានចំនួន ២១៦នាក់។
បើទោះបីជាមានករណីឆ្លងក្នុងមួយថ្ងៃៗតិចក៏ពិតមែន ប៉ុន្តែរដ្ឋាភិបាលទីក្រុងបាងកក បានសម្រេចពន្យារពេលដាក់ប្រទេសក្នុងភាពអាសន្ នរហូតដល់ចុងខែឧសភាខាងមុខឯណោះ ដើម្បីបង្ការ កុំឲ្យមានករណីឆ្លងកើនឡើងដូចពេលកន្លងមក។ យ៉ាងណាក៏ដោយ រដ្ឋាភិបាលថៃ ក៏បានបន្ធូរបន្ថយការរឹតបន្តឹងដោយផ្នែកផងដែរ។ ក្នុងការបន្ធូរបន្ថយនេះ រដ្ឋាភិបាល បានអនុញ្ញាតឲ្យសកម្មភាព និងជំនួញចំនួន៦ អាចបើកដំណើរការឡើងវិញ ដូចជាផ្សារ, កន្លែងញាំអាហារ, កន្លែងលក់រាយ, សកម្មភាពកីឡា និងកម្សាន្ត, ហាងអ៊ុតសក់ កាត់សក់ កន្លែងកាត់រោមសត្វ និង សកម្មភាពជំនួញមួយចំនួន។
ការណែនាំនេះ ត្រូវបានធ្វើឡើងមជ្ឈមណ្ឌលគ្រប់គ្រងស្ថានការណ៍COVID-19 ដើម្បីអនុវត្តនៅទូទាំងប្រទេស។ ប៉ុន្តែអភិបាលខេត្តនីមួយៗ ក៏អាចកែប្រែការណែនាំនេះបានដែរ ក្នុងបំណងធ្វើឲ្យស្របទៅនឹងស្ថានភាព COVID-19 នៅក្នុងតំបន់របស់ខ្លួន៕
© រក្សាសិទ្ធិដោយ thmeythmey.com