ចំនួនអ្នកជាសះស្បើយពីជំងឺរលាកសួត ដែលបង្កដោយកូរ៉ូណាវីរុស (COVID-19) បានកើនដល់ជាង ១លាននាក់ ក្នុងចំណោមករណីឆ្លងសរុបលើស ៣លានករណី។ នេះបើតាមតួលេខរបស់វែបសាយ Worldometer គិតត្រឹមរសៀលថ្ងៃទី៣០ ខែមេសា។
ចាប់តាំងពីផ្ទុះករណីដំបូងនៅក្នុងទីក្រុងវូហាន ប្រទេសចិន នាចុងឆ្នាំ២០១៩ មកទល់ពេលនេះ COVID-19 បានរីកសាយភាយទៅប្រទេស និងតំបន់លើស ២១០ និងករណីឆ្លងសរុបចំនួន ៣២២២៣១៥ករណី។ បើទោះបីជាមានករណីឆ្លងសរុបច្រើនក៏ដោយ អ្នកជាសះស្បើយពីជំងឺឆ្លងសកលមួយនេះ ក៏មានចំនួនខ្ពស់គួរសមដែរ ដោយមានរហូតដល់ ១០០៥៤៤០ករណីឯណោះ។ ចំនួនអ្នកជាសះស្បើយដ៏ច្រើនបែបនេះ គឺកើតចេញពីកិច្ចខិតខំរបស់រដ្ឋាភិបាលប្រទេសនីមួយៗ បានចាត់វិធានការគ្រប់បែបយ៉ាង ក៏ដូចជាកិច្ចខិតខំរបស់ក្រុមគ្រូពេទ្យ ក្នុងការព្យាបាលអ្នកជំងឺ។
ក្នុងចំណោមប្រទេសមានករណី COVID-19 ច្រើនជាងគេ អាមេរិក មានចំនួនអ្នកជាសះស្បើយជាង ១៤ម៉ឺននាក់, អេស្ប៉ាញមានជាង ១៣ម៉ឺននាក់, អ៊ីតាលីមានលើសពី ៧ម៉ឺននាក់, បារាំងមានជិត ៥ម៉ឺននាក់, អាល្លឺម៉ង់មានចំនួនជាង ១២ម៉ឺននាក់, តួកគីមានជាង ៤ម៉ឺននាក់, រុស្ស៊ីមានជាង ១ម៉ឺននាក់, អ៊ីរ៉ង់មានចំនួនជាង ៧ម៉ឺននាក់ និងចិនមានចំនួនជិត ៨ម៉ឺននាក់។ អង់គ្លេសដែលមានករណីឆ្លងច្រើន មិនមានទិន្នន័យអ្នកសះស្បើយឡើយ។
ដោយឡែកនៅក្នុងតំបន់អាស៊ានវិញ ដោយគិតចាប់ពីប្រទេស ដែលមានករណី COVID-19 សរុបច្រើនជាងគេ ចុះមកតិច ក្នុងនោះដូចជា សិង្ហបុរីមានអ្នកជាសះស្បើយចំនួន ១១៨៨នាក់ ក្នុងករណីសរុប ១៦១៦៩ករណី, ឥណ្ឌូណេស៊ីមាន ១៥២២នាក់ក្នុង១០១១៨ករណី, ហ្វីលីពីនមាន ១០៤៣នាក់ក្នុងចំណោម៨៤៨៨ករណី, ម៉ាឡេស៊ីមានចំនួន ៤១៧១នាក់ក្នុងចំណោម ៦០០២ករណី, ថៃមានអ្នកជាសះស្បើយ ២៦៨៤នាក់ក្នុងចំណោម ២៩៥៤ករណី
ចំណែកវៀតណាមមាន២២២នាក់ក្នុងចំណោម ២៧០ករណី, មីយ៉ាន់ម៉ាមាន ២៧នាក់ ក្នុងចំណោម ១៥០ករណី, ព្រុយណេមាន១២៤នាក់ក្នុងចំណោម ១៣៨ករណី, កម្ពុជាមានចំនួន ១១៩នាក់ក្នុងចំណោម ១២២ករណី, ឡាវមាន ៧នាក់ក្នុងចំណោម ១៩ករណី។
សូមបញ្ជាក់ថា ក្រៅពីចំនួន អ្នកជាសះស្បើយនៅតាមបណ្តាប្រទេសខាងលើ នៅមានបណ្តាប្រទេសជាច្រើនផ្សេងទៀត ក៏បានព្យាបាលអ្នកជំងឺឲ្យជាសះស្បើយក្នុងចំនួនច្រើនផងដែរ៕