COVID-19
អន្តរជាតិ
កូរ៉េខាងត្បូង បន្តប្រយុទ្ធនឹង COVID-19 ទោះបន្ធូរការរឹតបន្តឹងកាន់តែច្រើនក្ដី
រូបភាព Xinhua
×![]()
ដោយ: តន ចាន់រិទ្ធារ៉ា
ស្ថានភាពជំងឺ COVID-19 នៅកូរ៉េខាងត្បូង ត្រូវមើលឃើញថា ស្ថិតក្រោមការត្រួតត្រារបស់រដ្ឋាភិបាល ដោយករណីឆ្លងថ្មីមានកាន់តែទាប។ រដ្ឋាភិបាលក្រុងសេអ៊ូល នឹងបន្តបន្ធូរបន្ថយការរឹតបន្តឹងសុវត្ថិភាពសង្គមបន្ថែមទៀត ដោយអនុញ្ញាតឲ្យអាជីវកម្មមួយចំនួនធំអាចបើកវិញបាន និងត្រៀមខ្លួនសម្រាប់ដំណើរការរៀនសូត្រឡើងវិញនៅពេលខាងមុខផងដែរ។ យ៉ាងណាមិញ នាយករដ្ឋមន្ត្រីកូរ៉េខាងត្បូង Chung Sye-kyun អះអាងថា កូរ៉េខាងត្បូង មិនទាន់ទម្លាក់ដៃប្រយុទ្ធឡើយ។
ចាប់ពីថ្ងៃទី៦ ខែឧសភា កូរ៉េខាងត្បូង នឹងអនុវត្តគម្រោងចត្តាឡីស័កប្រចាំថ្ងៃ ដែលនឹងអនុញ្ញាតឲ្យប្រជាជនអាចដើរហើរកាន់តែស្រួលជាងមុន តែត្រូវរក្សាសុវត្ថិភាព ស្របពេលដែលស្ថានការណ៍ COVID-19 នៅប្រទេសនេះ កាន់តែធូរស្រាលខ្លាំង។ គិតត្រឹមថ្ងៃទី៤ ខែឧសភា កូរ៉េខាងត្បូងមានករណីឆ្លងសរុបចំនួន១០៨០១នាក់ និងស្លាប់២៥២នាក់។ នៅថ្ងៃទី៤ នេះ កូរ៉េខាងត្បូងក៏មិនបានរាយការណ៍ពីករណីឆ្លងថ្មីផងដែរ។
ក្រោមការបន្ធូរបន្ថយថ្មី រដ្ឋាភិបាលកូរ៉េខាងត្បូងប្រកាសថា ខ្លួននឹងអនុញ្ញាតឲ្យការរកស៊ីដែលបិទទ្វារជាច្រើនសប្ដាហ៍ អាចបើករកស៊ីបានវិញ ហើយការជួបជុំក៏អាចធ្វើឡើងវិញដែរ តែត្រូវអនុវត្តការសម្លាប់មេរោគ និងគម្លាតសុវត្ថិភាពពីរម៉ែត្រដដែល។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។ លើសពីនោះ សាលារៀន និងកន្លែងធ្វើការ ក៏អាចដំណើរការឡើងវិញដែរ ប៉ុន្តែក៏ស្ថិតក្រោមគោលការណ៍សុខាភិបាល។
បើតាម Yonhap សាលារៀននៅកូរ៉េខាងត្បូង អាចនឹងទទួលសិស្សឡើងវិញនៅពាក់កណ្ដាលខែឧសភានេះ ខណៈពួកគេសិក្សាតាមប្រព័ន្ធអនឡាញមួយខែមកហើយនោះ។ អាជ្ញាធរអប់រំកូរ៉េខាងត្បូង ទំនងជាអនុញ្ញាតឲ្យសិស្សកម្រិតខ្ពស់ចូលរៀនដូចធម្មតាមុនគេ មុននឹងបន្តដល់កម្រិតដទៃទៀត។
បន្ថែមពីលើនោះ កីឡាអាជីពមួយចំនួនដូចជាកីឡាបាល់ទាត់ និងកីឡាបេសប៊ល ក៏អាចចាប់ផ្ដើមប្រកួតឡើងវិញដែរនៅសប្ដា៍នេះ ក្រោយបិទជាច្រើនសប្ដាហ៍មក។ ប៉ុន្តែការប្រកួត នឹងធ្វើឡើងដោយគ្មានទស្សនិកជនឡើយ។
នាយករដ្ឋមន្ត្រីកូរ៉េខាងត្បូង Chung Sye Kyun បានអំពាវនាវឲ្យប្រជាជនបន្តប្រុងប្រយ័ត្ន ព្រោះការប្រយុទ្ធនឹង COVID-19 មិនទាន់បញ្ចប់ឡើយ។ ក្នុងកិច្ចប្រជុំស្ដីពីការឆ្លើយតបជំងឺ COVID-19 លោក Chung និយាយនៅថ្ងៃទី៤ ខែឧសភា ថា សង្គ្រាមប្រឆាំង COVID-19 មិនទាន់ចប់ឡើយ ហើយការប្រយុទ្ធនេះ ក៏មិនចប់នៅត្រឹមរយៈពេលខ្លីដែរ។ លោកប្រាប់ឲ្យប្រជាជនត្រៀមរស់នៅក្នុងស្ថានភាពដែលវីរុសនេះបន្តមាន៕
Tag:
COVID-19
កូរ៉េខាងត្បូង
© រក្សាសិទ្ធិដោយ thmeythmey.com
