COVID-19៖ ប្រធានាធិបតីប្រេស៊ីល នៅតែប្រឆាំងការបិទប្រទេស ខណៈអ្នកស្លាប់កើនលើស៧ពាន់នាក់

COVID-19

អន្តរជាតិ

COVID-19៖ ប្រធានាធិបតីប្រេស៊ីល នៅតែប្រឆាំងការបិទប្រទេស ខណៈអ្នកស្លាប់កើនលើស៧ពាន់នាក់

04, May 2020 , 9:29 pm

រូបភាព

ប្រភពរូប៖ AFP

ដោយ:

ប្រធានាធិបតីប្រេស៊ីល លោក ជែ បុលសូណារ៉ូ (Jair Bolsonaro) រិះគន់ធ្ងន់ៗលើបទបញ្ជាបិទប្រទេសដែលកំពុងអនុវត្តនៅរដ្ឋសហព័ន្ធខ្លះ។ ក្នុងសុន្ទរកថាទៅកាន់ក្រុមអ្នកតវ៉ារាប់ពាន់នាក់ដែលប្រឆាំងចំណាត់ការរឹតបន្តឹងទប់ស្កាត់ COVID-19 មេដឹកនាំប្រទេសក្នុងតំបន់អាមេរិកខាងត្បូងរូបនេះ លើកឡើងថា ការរឹតត្បិតសិទ្ធិសេរីភាពនៃការដើរហើរនេះកំពុងបំផ្លិចបំផ្លាញការងារប្រជាជន។

ក្នុងសុន្ទរកថាមួយនៅក្រៅបរិវេណវិមានប្រធានាធិបតីក្នុងរដ្ឋធានី ប្រាស៊ីលីយ៉ា នៅពីថ្ងៃទី៣ ខែឧសភា លោក ជែ បុលសូណារ៉ូ បានទម្លាក់កំហុសដាក់បណ្ដាអភិបាលរដ្ឋសម្រាប់ការបន្តអនុវត្តចំណាត់ការបិទប្រទេស។ តាមរយៈការផ្សាយផ្ទាល់លើហ្វេសប៊ុក ប្រមុខរដ្ឋប្រេស៊ីលរូបនេះ និយាយដូច្នេះថា៖«ការបំផ្លិចបំផ្លាញការងារពីសំណាក់អភិបាលរដ្ឋខ្លះ គឺជារឿងដែលគ្មានទំនួលខុសត្រូវ និងពុំអាចទទួលយកបានឡើយ។ យើងនឹងបង់ខាតក្នុងតម្លៃខ្ពស់នាពេលអនាគត»។

ទន្ទឹមនេះ លោកប្រធានាធិបតី សង្កត់ធ្ងន់ទៀតថា ចំណាត់ការររាំងខ្ទប់ការរាលដាល ជំងឺ COVID-19 ដែលពួកអភិបាលរដ្ឋខ្លះកំពុងដាក់ចេញ គឺជាការប្រតិកម្មជ្រុលហួសហេតុ ហើយកំពុងបំផ្លាញសេដ្ឋកិច្ចប្រទេស។

គិតត្រឹមថ្ងៃទី៣ ខែឧសភា ប្រេស៊ីល មានករណីឆ្លងCOVID-19សរុបលើស១០ម៉ឺនករណីហើយដែលជាចំនួនច្រើនជាងគេនៅអាមេរិកឡាទីន។ នេះបើតាមតួលេខផ្លូវការរបស់ក្រសួងសុខាភិបាលប្រេស៊ីល។ ក្នុងពេល២៤ម៉ោងមុននេះ ប្រទេសនេះ មានអ្នកស្លាប់ដោយសារCOVID-១៩ថ្មី ចំនួន ២៧៥នាក់ ដែលធ្វើឲ្យអ្នកស្លាប់សរុបឡើងដល់ជាង៧០០០នាក់។

អ្នកជំនាញ ជឿជាក់ថា តួលេខឆ្លងCOVID-19 ជារួម ក្នុងប្រទេសប្រេស៊ីល អាចលើសតួលេខរកឃើញ ចន្លោះពី១២ ទៅ១៥ដងឯណោះ។ តាមការចុះផ្សាយរបស់ទីភ្នាក់ងារព័ត៌មាន AFP ការប៉ាន់ស្មាននេះ ធ្វើឡើងដោយផ្អែកលើហេតុផលថា ប្រទេសនេះខ្វះខាតការធ្វើតេស្តទ្រង់ទ្រាយធំ ខណៈប្រជាជនសរុបមានរហូតដល់២១០លាននាក់៕