ណាហ្គាវើលកំពុងពិចារណាកាត់ប្រាក់ខែមន្ត្រី និងកីឡាករ ស្របពេលលីគកំពូលបន្តផ្អាក

COVID-19

កីឡាជាតិ

ជាតិ

ណាហ្គាវើលកំពុងពិចារណាកាត់ប្រាក់ខែមន្ត្រី និងកីឡាករ ស្របពេលលីគកំពូលបន្តផ្អាក

06, May 2020 , 8:29 am

រូបភាព

ដោយ:

ក្លិបបាល់ទាត់ណាហ្គាវើល កំពុងពិចារណាលើបញ្ហាការកាត់ខែមួយចំនួន ពីមន្ត្រី គ្រូបង្វឹក និងកីឡាករ ស្របពេលក្លិបបានរំសាយការប្រមូលផ្តុំហ្វឹកហាត់ ដោយសារគ្មានការប្រកួត។ លីគកំពូលកម្ពុជា និងពានសម្តេច ហ៊ុន សែន នឹងបន្តផ្អាកការប្រកួត រហូតស្ថានភាពនៅកម្ពុជាមានភាពល្អប្រសើរឡើងវិញ។ នេះបើតាមការបញ្ជាក់របស់ លោក កែវ សារ៉េត អគ្គលេខាធិការ នៃសហព័ន្ធកីឡាបាល់ទាត់កម្ពុជា។

លោក មាស ចាន់ណា គ្រូបង្វឹកក្រុមណាហ្គាវើលបាននិយាយថា មន្ត្រី បុគ្គលិក គ្រូបង្វឹក និងកីឡាកររបស់ក្លិបណាហ្គាវើល អាចប្រឈមនឹងការកាត់ប្រាក់ខែមួយចំនួន ក្នុងពេលឆាប់ៗខាងមុខនេះ។ គ្រូបង្វឹករូបនេះអះអាងថា បច្ចុប្បន្នថ្នាក់ដឹកនាំក្លិប កំពុងពិចារណាលើបញ្ហានេះ ថាតើគួរកាត់ប៉ុន្មានភាគរយ នៃប្រាក់ខែរបស់ពួកគេ?

មូលហេតុដែលក្លិបគ្រោងធ្វើបែបនេះ ដោយសារក្លិបកំពុងជួបវិបត្តិបាត់បង់ប្រាក់ចំណូល បន្ទាប់ពីរាជរដ្ឋាភិបាលកម្ពុជា សម្រេចឲ្យបិទមជ្ឈមណ្ឌលកម្សាន្ត និងកាស៊ីណូណាហ្គាវើល ដែលជាប្រភពទុនទ្រទ្រង់ដ៏ធំរបស់ក្លិប។ ម្យ៉ាងទៀត ដោយសារបច្ចុប្បន្នការប្រកួតលីគកំពូល និងពានសម្តេច ហ៊ុន សែន ត្រូវបានផ្អាក ហើយកីឡាករ ក៏បានរំសាយការប្រមូលផ្តុំហ្វឹកហាត់ ហើយទៅហ្វឹកហាត់តាមផ្ទះរៀងៗខ្លួនផងដែរ។

«ទោះបីឈប់សម្រាក តែកីឡាករទទួលបានប្រាក់ខែធម្មតា។ ប៉ុន្តែឥឡូវ ក្លិបកំពុងពិចារណាថា គួរដកប៉ុន្មានភាគរយពីពួកគាត់ ដោយសារពួកគាត់អត់មានត្រៀមលេង ហើយពួកគាត់ហ្វឹកហាត់តាមអនឡាញ។ ខ្ញុំចេះតែចង់ឲ្យកីឡាករ ទទួលបានប្រាក់ខែពេញ តែសំខាន់ ក្លិបអត់មានចំណូល។ ដូចយើងដឹងហើយថា ក្លិបបានចំណូលពីក្រុមហ៊ុនណាហ្គាវើល ហើយពេលនេះ ហាហ្គាបានបិទ យើងបានចំណូលពីណា?»។ លោក មាស ចាន់ណា បានលើកឡើងបែបនេះ ហើយបានបន្ថែមថា ណាហ្គាវើល ក៏បានកាត់ប្រាក់ខែ៥០ភាគរយ ពីបុគ្គលិករបស់ខ្លួនផងដែរ។

បើតាមលោក មាស ចាន់ណា ទាំងមន្ត្រី គ្រូបង្វឹក និងកីឡាករ សុទ្ធតែបានត្រៀមចិត្តរួចហើយ ក្នុងការទទួលយកការកាត់ប្រាក់ខែមួយចំនួន របស់ខ្លួននេះ។ «កីឡាករទាំងអស់ បានយល់ព្រមតាមសំណើរបស់ក្លិប មិនមានបញ្ហានោះទេ ដោយសារអ្នកខ្លះបានរួមរស់ជាមួយក្លិប៥ ទៅ៦ឆ្នាំ។ ដូច្នេះ គាត់យល់ពីស្ថានភាពបែបនេះ។ បើយើងអត់យល់ពីកាលៈទេសៈ នឹងក៏ពិបាកដែរ ដូចគ្រួសារដែរ បើយើងអត់ចេះយល់ពីកាលៈទេសៈ រស់នៅជាមួយគ្នាមិនបាននោះទេ»។ នេះជាការបន្ថែមរបស់គ្រូបង្វឹកកម្រិត A-License រូបនេះ។

តែយ៉ាងណា លោក រំពឹងថា លីគកំពូល នឹងចាប់ផ្តើមក្នុងពេលឆាប់ៗខាងមុខនេះ ដើម្បីកុំឲ្យមានការកាត់ប្រាក់ខែពីកីឡាករ ដែលនាំឲ្យប៉ះពាល់ដល់អារម្មណ៍កីឡាករ។ បើតាមលោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា លីគកំពូលកម្ពុជា ពានសម្តេច ហ៊ុន សែន និងពានរង្វាន់កម្រិតយុវជនផ្សេងៗ ត្រូវបន្តផ្អាកការរៀបចំ រហូតដល់ស្ថានការណ៍នៅកម្ពុជា មានដំណើរការដូចប្រក្រតីឡើងវិញ។ ដ្បិតសហព័ន្ធ មិនចង់ឃើញរលក នៃការឆ្លងជំងឺកូវីដ-១៩ កើតមានជាលើកទី២។

ប្រសិនបើគម្រោងកាត់ប្រាក់ខែ លេចចេញជារូបរាងមែន ណាហ្គាវើល នឹងក្លាយជាក្លិបទី៣ បន្ទាប់ពីក្លិបបឹងកេត និងក្រសួងការពារជាតិ ដែលបានកាត់ប្រាក់ខែបុគ្គលិក មន្ត្រី គ្រូបង្វឹកនិងកីឡាករ ចន្លោះពី៣០ទៅ៥០ភាគរយ ក្នុងអំឡុងលីគកំពូលឈប់សម្រាក ដោយសាររីករាលដាលនៃជំងឺកូវីដ-១៩។ ក្រៅពីក្លិបទាំងនេះ ក៏មានក្លិបមួយចំនួនទៀតផងដែរ ដែលបានកាត់ប្រាក់ខែកីឡាករ តែពួកគេបិទបាំងនូវព័ត៌មានទាំងនេះ៕