COVID-19
អន្តរជាតិ
រដ្ឋាភិបាលជប៉ុន អនុញ្ញាតឲ្យប្រើថ្នាំ remdesivir ដើម្បីព្យាបាលជំងឺ COVID-19 ថ្នាំរេមឌីស៊ីវៀដែលផលិតដោយក្រុមហ៊ុនអាមេរិក Gilead ។ រូបភាព AFP
× រដ្ឋាភិបាលជប៉ុន នៅថ្ងៃទី៧ ខែឧសភា បានផ្ដល់ភ្លើងបៃតងឲ្យប្រើប្រាស់ថ្នាំប្រឆាំងវីរុសរេមឌីស៊ីវៀ (Remdesivir) ក្នុងការព្យាបាលជំងឺរលាកសួតបង្កដោយកូរ៉ូណាវីរុស (COVID-19) ។ ជប៉ុនជាប្រទេសទីពីរដែលអនុញ្ញាតឲ្យប្រើប្រាស់ថ្នាំប្រភេទនេះបន្ទាប់ពីអាមេរិក។ ក្រុងតូក្យូ ក៏សម្លឹងឃើញថ្នាំ Avigan មួយទៀតក្នុងការព្យាបាលជំងឺផ្លូវដង្ហើមនេះដែរ។
«ថ្នាំរេមឌីស៊ីវៀ ត្រូវបានអនុញ្ញាតឲ្យប្រើក្រោមវិធានការពិសេស។» នេះជាការលើកឡើងរបស់មន្ត្រីក្រសួងសុខាភិបាល ការងារ និងសុខមាលភាពជប៉ុននៅថ្ងៃទី៧ ខែឧសភា។ បើតាមមន្ត្រីក្រសួងដដែលនេះ នេះជាការអនុញ្ញាតលើកទីមួយសម្រាប់រដ្ឋាភិបាលជប៉ុនលើការប្រើប្រាស់ថ្នាំព្យាបាលជំងឺ COVID-19 ។
កាលពីសប្ដាហ៍មុន អាមេរិក ក៏បានអនុញ្ញាតឲ្យប្រើប្រាស់រេមឌីស៊ីវៀផងដែរ ដោយផ្ដោតលើករណីធ្ងន់ធ្ងរ បន្ទាប់លទ្ធផលពិសោធន៍បង្ហាញថា ថ្នាំនេះពន្លឿនការព្យាបាលអ្នកជំងឺ COVID-19 មួយភាគបីឯណោះ។ នាយករដ្ឋមន្ត្រីជប៉ុន ស៊ិនហ្សូ អាបេ ក៏ធ្លាប់និយាយដែរថា រដ្ឋាភិបាលរបស់លោក ក៏ត្រៀមផ្ដល់ភ្លើងបៃតងសម្រាប់ការប្រើប្រាស់ថ្នាំប្រឆាំងវីរុសនេះដែរ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
រេមឌីស៊ីវៀ ជាប្រភេទថ្នាំចាក់ដែលត្រូវបានពិសោធដើម្បីព្យាបាលជំងឺអេបូឡា ប៉ុន្តែមិនដែលត្រូវបានប្រើប្រាស់ឡើយ។ នៅពេលសាកល្បងលើជំងឺ COVID-19 ថ្នាំមួយនេះបែរជាមានលទ្ធផលល្អទៅវិញ។ ប្រទេសមួយចំនួន ក៏កំពុងប្រើប្រាស់ថ្នាំនេះដំណាក់កាលសាកល្បងផងដែរ។
ក្រៅពីថ្នាំរេមឌីស៊ីវៀ ជប៉ុន ក៏ត្រៀមអនុញ្ញាតឲ្យប្រើប្រាស់ផ្លូវការថ្នាំមួយទៀតឈ្មោះ Avigan ដែលផលិតដោយក្រុមហ៊ុនឱសថជប៉ុន Fujifilm Toyama Chemical ផងដែរ។ អ្នកនាំពាក្យរដ្ឋាភិបាលជប៉ុន លោក Yoshihide Suga និយាយថា ជប៉ុនគ្រោងផ្ដល់ការអនុញ្ញាតក្នុងខែនេះតែម្ដង ប្រសិនបើការពិសោធលើអ្នកចូលរួម១០០នាក់ មានប្រសិទ្ធភាព។
Avigan ដែលមានឈ្មោះតាមហ្សែនថា favipiravir ជាប្រភេទថ្នាំលេប ដែលត្រូវប្រើប្រាស់ព្យាបាលផ្ដាសាយធំដែលមិនអាចព្យាបាលដោយថ្នាំធម្មតាបាន។ ថ្នាំប្រភេទនេះ មិនមានលក់តាមទីផ្សារទូទៅឡើយ ហើយអាចផលិត និងចែកចាយបានលុះត្រាមានការអនុញ្ញាតពីរដ្ឋាភិបាល។ យ៉ាងណាមិញ ថ្នាំនេះ មិនដែលត្រូវអនុញ្ញាតឲ្យប្រើចំពោះស្ត្រីមានផ្ទៃឡើយ៕
Tag:
ជប៉ុន
remdesivir
COVID-19
© រក្សាសិទ្ធិដោយ thmeythmey.com