អន្តរជាតិ
ព្រឹទ្ធសភាអាមេរិក អនុម័តសេចក្តីព្រាងច្បាប់ដែលបង្កើនសម្ពាធលើចិនពាក់ព័ន្ធបញ្ហាវីហ្គ័រ
× ព្រឹទ្ធសភាអាមេរិក នៅថ្ងៃទី១៤ ខែឧសភា បានអនុម័តសេចក្តីព្រាងច្បាប់មួយដែលតម្រូវឲ្យរដ្ឋការរបស់លោកប្រធានាធិបតី ដូណាល់ ត្រាំ ពង្រឹងការឆ្លើយតបទៅលើការគាបសង្កត់លើជនជាតិភាគតិចវីហ្គ័រនៅតំបន់ស៊ីនជាំង ពីសំណាក់រដ្ឋាភិបាលចិន។ ប៉ុន្តែចិនបានចេញមុខថ្កោលទោសការអនុម័តនេះ និងចាត់ទុកជាការជ្រៀតជ្រែកចូលកិច្ចការផ្ទៃក្នុងរបស់ខ្លូន។
សេចក្តីព្រាងច្បាប់ដែលបើកផ្លូវដល់ការទណ្ឌកម្មមន្ត្រីចិន ត្រូវបានស្នើដោយលោក Marco Rubio សមាជិកព្រឹទ្ធសភាបក្សសាធារណរដ្ឋ។ ច្បាប់នេះ ទាមទារឲ្យមានការដាក់ទណ្ឌកម្មទៅលើបុគ្គលណាដែលទទួលខុសត្រូវ ទៅលើការគាបសង្កត់ជនជាតិភាគតិចវីហ្គ័រ និងមូស្លីមដទៃទៀតនៅតំបន់ស្វយ័តស៊ីនជាំង។ សេចក្តីព្រាងច្បាប់នេះ ក៏គំរាមសមាជិកការិយាល័យនយោបាយបក្សកុម្មុយនីស្តចិន ដោយឲ្យទទួលខុសត្រូវចំពោះការរំលោភបំពានសិទ្ធមនុស្សយ៉ាងធ្ងន់ធ្ងរនេះ។
នេះយោងតាមទីភ្នាក់ងារសារព័ត៌មាន Reuters ព្រឹទ្ធសភាអាមេរិក ដែលដឹកនាំដោយគណបក្សសាធារណរដ្ឋ បានអនុម័តសេចក្តីព្រៀងច្បាប់ខាងលើដោយឯកច្ឆន្ទ។ ដំណាក់កាលបន្ទាប់ គេត្រូវបញ្ជូនសេចក្តីព្រៀងច្បាប់នេះទៅសភាតំណាង បន្ទាប់មកទៅសេតវិមាន ដើម្បីឲ្យលោកប្រធានាធិបតី ដូណាល់ ត្រាំ ចុះហត្ថលេខាទៅជាច្បាប់។
ការអនុម័តសេចក្តីព្រៀងច្បាប់ដោយព្រឹទ្ធសភាអាមេរិកនេះធ្វើឡើង ក្នុងពេលដែលទំនាក់ទំនងរវាងចិន និងអាមេរិកកាន់តែអាក្រក់ទៅៗ ដោយសារតែជំងឺរាតត្បាតសកល COVID-19 ។ អាមេរិកបានបន្ទោសចិនចំពោះកង្វះតម្លាភាពនៅពេលមានការផ្ទុះជំងឺនាពេលដំបូង។ ចំណែកឯភាគីចិនវិញ បានចេញមុខតបដោយបដិសេធការចោទប្រកាន់លើការគ្រប់គ្រងការផ្ទុះជំងឺ COVID-19 មិនបានត្រឹមត្រូវ។
ចំពោះការអនុម័តសេចក្តីព្រៀងច្បាប់ទាក់ទងនឹងការគាំទ្រសិទ្ធជនជាតិវីហ្គ័រវិញ ចិនបានថោ្កលទោសកម្មភាពនេះ ដោយចាត់ទុកជាការវាយប្រហារព្យាបាទ និងជ្រៀតជ្រែកចូលកិច្ចការផ្ទៃក្នុងរបស់ចិន ដែលនឹងអាចបណ្តាលឲ្យប៉ះពាល់ដល់កិច្ចសហប្រតិបត្តិការទ្វេភាគី។ នេះបើតាមប្រភពព័ត៌មានខាងលើ។
យោងតាមរបាយការណ៍អង្គការសហប្រជាជាតិ ជនជាតិវីហ្គ័រជិតមួយលាននាក់ត្រូវបានដាក់ក្នុងជុំរុំជាច្រើនក្នុងតំបន់ស៊ីនជាំងភាគខាងលិចកាលពីឆ្នាំមុន។ ចិនចេញមកបដិសេធថា គ្មានការធ្វើបាបជនជាតិវីហ្គ័រ និងថាជុំរុំទាំងអស់នោះសម្រាប់បណ្តុះបណ្តាលវិជ្ជាជីវៈ មិនមែនជាមន្ទីរឃុំឃាំងឡើយ។
សូមបញ្ជាក់ថា កាលពីខែវិច្ឆិកា ឆ្នាំ២០១៩ សភាអាមេរិក ក៏បានអនុម័តសេចក្តីព្រៀងច្បាប់ដាក់ទណ្ឌកម្មប្រឆាំងថ្នាក់ដឹកនាំជាន់ខ្ពស់របស់ចិន ដែលទទួលខុសត្រូវចំពោះការបំពានសិទ្ធជនជាតិអ៊ុយហ្គួរ ដែលមានលោក Chen Quanguo លេខាបក្សកុម្មុយនីស្តិតំបន់ស៊ីនជាំង និងជាសមាជិកការិយាល័យនយោបាយបក្សកុម្មុយនីស្តចិន។ លោក Chen ត្រូវគេជឿថា ជាអ្នកផ្ដើមគំនិត និងអនុវត្តវិធានការរឹតត្បិតលើជនភាគតិចនៅស៊ីនជាំង៕
© រក្សាសិទ្ធិដោយ thmeythmey.com