ជាតិ
សង្គមជាតិ
ភោជនីយដ្ឋានណា ខ្វះអនាម័យ នឹងប្រឈមការបិទបណ្តោះអាសន្ន
× សម្តេចនាយករដ្ឋមន្ត្រី ហ៊ុន សែន ប្រកាសថា អាជ្ញាធរមូលដ្ឋាន នឹងចាប់ផ្តើមចុះត្រួតពិនិត្យមើលអនាម័យ តាមភោជនីយដ្ឋាន រួមទាំងកន្លែងលក់ដូរផ្សេងៗ។ សម្តេច អះអាងថា អាជ្ញាធរ នឹងដាស់តឿន បើភោជនីយដ្ឋានឬកន្លែងលក់ដូរណា មិនរក្សាអនាម័យតាមការណែនាំរបស់ក្រសួងសុខាភិបាល ហើយបើនៅតែមិនស្តាប់ ភោជនីយដ្ឋានឬកន្លែងលក់ដូរនោះ នឹងត្រូវបិទជាបណ្តោះអាសន្ន។
រដ្ឋាភិបាល ដាក់ចេញវិធានាការនេះ គឺដើម្បីការពារកុំឲ្យជំងឺកូវីដ១៩ ឆ្លងរាលដាល នៅតាមភោជនីយដ្ឋានឬកន្លែងលក់ដូរ។ ក្នុងកិច្ចប្រជុំគណៈរដ្ឋមន្ត្រី នាព្រឹកថ្ងៃទី១៥ ខែឧសភា ឆ្នាំ២០២០ ប្រមុខរដ្ឋាភិបាល មានប្រសាសន៍ថា៖«មិនចាំបាច់ពីខាងលើទៅបិទទេ គឺរាជធានី ខេត្តនីមួយៗ មានសិទ្ធិធ្វើខ្លួនឯងតែម្តង»។
ប្រមុខរដ្ឋាភិបាល បញ្ជាក់ថា ក្រោយរៀបចំអនាម័យរួចហើយ ភោជនីយដ្ឋានឬកន្លែងលក់ដូរ ដែលត្រូវបិទនោះ នឹងទទួលការអនុញ្ញាតឲ្យបើកឡើងវិញ ហើយបើលើកក្រោយ នៅតែខ្វះអនាម័យទៀត អាជ្ញាធរ នឹងបន្តបិទសាជាថ្មី។
ព្រោះតែបារម្ភពីការរាលដាលជំងឺកូវីដ១៩ រដ្ឋាភិបាល បានបិទអាជីវកម្មនានា ដូចជា ក្លិបកម្សាន្ត រោងកុន ខារ៉ាអូខេ ប៊ីហ្កាឌិន កាស៊ីណូ កន្លែងម៉ាស្សា-ស្ប៉ា កន្លែងហាត់ប្រាណ និង ការប្រគំតន្ត្រីតាមទីសាធារណៈ ជាដើម។ រដ្ឋាភិបាល មិនបិទផ្សារ ភោជនីយដ្ឋាន និង កន្លែងលក់ដូរ គឺដោយសារតែខ្លាចប៉ះពាល់ខ្លាំងដល់សេដ្ឋកិច្ច។
នៅចំពោះមុខសមាជិករដ្ឋាភិបាលក្នុងកិច្ចប្រជុំគណៈរដ្ឋមន្ត្រី សម្តេចនាយករដ្ឋមន្ត្រី បង្ហាញក្តីបារម្ភពីរលកទីពីរនៃការផ្ទុះជំងឺកូវីដ១៩ នៅកម្ពុជា ហើយអាចនឹងគ្រប់គ្រងស្ថានការណ៍លែងបាន ម្ល៉ោះហើយទើបបានជាសម្តេច យល់ស្របនឹងលោក ហង់ជួន ណារ៉ុន រដ្ឋមន្ត្រីក្រសួងអប់រំ ក្នុងការពន្យារពេលបើកសាលារៀន។
ទន្ទឹមនឹងនេះ មេដឹកនាំកម្ពុជា បានណែនាំឲ្យមន្ត្រីរដ្ឋាភិបាល បន្តផ្ញើសារនិងក្រើនរម្លឹកប្រជាពលរដ្ឋ ឲ្យប្រុងប្រយ័ត្នចំពោះជំងឺកូវីដ១៩ ដោយមិនត្រូវមើលស្រាលឡើយ ថ្វីបើជំងឺនេះ ហាក់ធូរស្បើយនៅកម្ពុជាក្តី។
បច្ចុប្បន្ន ក្នុងចំណោមអ្នកឆ្លងជំងឺកូវីដ១៩ ទាំង១២២នាក់នៅកម្ពុជា មាន១២១នាក់ហើយ ដែលបានជាសះស្បើយ៕
Tag:
COVID-19
បិទភោជនីយដ្ឋាន
© រក្សាសិទ្ធិដោយ thmeythmey.com