COVID-19
អន្តរជាតិ
COVID-19 អាចធ្វើឲ្យការបញ្ចេញឧស្ម័នកាបូនិចទូទាំងពិភពលោក ធ្លាក់ចុះជាង៧ភាគរយ ការបញ្ចេញឧស្ម័នពីរោងចក្រឧស្សាហកម្ម។រូបភាពAFP
× ការបញ្ចេញឧស្ម័នកាបូននិច នៅទូទាំងសកលលោក អាចនឹងធ្លាក់ចុះច្រើនជាង៧% នៅឆ្នាំ២០២០ អាស្រ័យទៅលើរយៈពេលវិធានការរឹតត្បិត និងការធ្វើគម្លាតសុវត្ថិភាព អំឡុងពេលពេលការរាតត្បាតជំងឺ COVID-19។ នេះបើតាមការស្រាវជ្រាវដែលចុះផ្សាយ ក្នុងទស្សនាវដ្ដី Nature Climate Change នៅថ្ងៃទី១៩ ខែឧសភា។
ការសិក្សាពីកម្រិតបញ្ចេញឧស្ម័នកាបូនិច ធ្វើឡើងដោយស្ថាប័ននៅអឺរ៉ុប អាមេរិក និងអូស្ត្រាលី ដោយវិភាគទៅលើការបញ្ចេញឧស្ម័ននេះជាប្រចាំថ្ងៃ នៅក្នុងប្រទេសចំនួន៦៩ រដ្ឋរបស់អាមេរិកចំនួន៥០ និងខេត្តរបសចិនចំនួន៣០ ក្នុងវិស័យសេដ្ឋកិច្ចចំនួន៣ និងមើលទៅលើកម្រិតទាំង៣ នៃការរឹតត្បិតឲ្យនៅផ្ទះ ក៏ដូចជាការប្រើពិនិត្យទិន្ន័យនៃការប្រើប្រាស់អគ្គិសនីប្រចាំថ្ងៃ និងការបម្លាស់ទី។
នៅក្នុងឆ្នាំ២០១៩ ពិភពលោកទាំងមូលបញ្ចេញឧស្ម័នកាបូនិច ចំនួន១០០លានតោនក្នុងមួយថ្ងៃ តាមរយៈការដុតឥន្ធនៈហ្វូស៊ីល និងការផលិតស៊ីម៉ង់ត៍។ នេះជាលើកឡើងរបស់ការស្រាវជ្រាវខាងលើ។
ចាប់តាំងពីមានជំងឺរាតត្បាត COVID-19 មក ដែលនាំឲ្យមានការដាក់ចេញវិធានការរឹតត្បិតរបស់រដ្ឋាភិបាល ការបញ្ចេញឧស្ម័នកាបូនិច ធ្លាក់ចុះត្រឹម៨៣លានតោនក្នុងមួយថ្ងៃ ដែលជាការថយចុះ១៧ភាគរយ។ ចំណែកឯប្រទេសខ្លះវិញ ការបញ្ចេញឧស្ម័នពុលនេះ មានការធ្លាក់ចុះជាមធ្យម២៦ភាគរយ ក្នុងពេលដែលមានការរឹតត្បិតតឹងតែបំផុត។
ការស្រាវជ្រាវ ក៏បានបង្ហាញផងដែរថា បើពិភពលោកទាំងមូល ត្រឡប់ទៅស្ថានភាពដើម មុនជំងឺរាតត្បាតក្នុងខែមិថុនា ការបញ្ចេញឧស្ម័ននឹងថយចុះ៤ភាគរយ ធៀបទៅនឹងឆ្នាំ២០១៩។ ចំណែកឯក្នុងករណីដែល ការរឹតត្បិតទូទាំងពិភពលោក បន្តដល់ចប់ឆ្នាំ២០២០ ការបញ្ចេញឧស្ម័នកាបូនិច នឹងមានការធ្លាក់ចុះជាង៧ភាគរយ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
ចិន ជាប្រទេសដែលកាត់បន្ថយការបញ្ចេញឧស្ម័នកាបូនិចច្រើនជាងគេ ក្នុងខែមេសាកន្លងទៅ តាមពីក្រោយដោយអាមេរិក អឺរ៉ុប និងឥណ្ឌា។ ការបញ្ចេញឧស្ម័ន ក្នុងវិស័យអាកាសចរមានការធ្លាក់ចុះ៧៥ភាករយ ក្នុងខែមេសា ចំណែកឯការបញ្ចេញឧស្ម័នក្នុងការដឹកជញ្ជូនផ្លូវគោក មានការធ្លាក់ចុះ៥០ភាគរយ និងការផលិតអគ្គិសនី បានកាត់បន្ថយចំនួន១៥ភាគរយ និង៣៥ភាគរយ ក្នុងវិស័យឧស្សាហកម្ម។ ប៉ុន្តែគេក៏ឃើញមានផងដែរ នូវកំណើននៃការបញ្ចេញឧស្ម័នក្នុងអាគារស្នាក់នៅ ចំនួន៥ភាគរយ៕
© រក្សាសិទ្ធិដោយ thmeythmey.com