COVID-19
ជាតិ
COVID-19៖ ករណី១ទៀតនៅកម្ពុជាដែលជាស្ត្រីខ្មែរទើបមកពីអាមេរិក
× ក្រសួងសុខាភិបាលនាព្រឹកថ្ងៃសៅរ៍ នេះ បានប្រកាសពីការរកឃើញករណីឆ្លង COVID-19 មួយករណីទៀត ដោយអ្នកជំងឺជាស្ត្រីខ្មែរវ័យ៣៩ឆ្នាំ រស់នៅសង្កាត់ទឹកថ្លា ខណ្ឌសែនសុខ រាជធានីភ្នំពេញ ដែលទើបវិលត្រឡប់ពីសហរដ្ឋអាមេរិក និងឆ្លងកាត់កូរ៉េខាងត្បូង ហើយមកដល់កម្ពុជាតាំងពីថ្ងៃទី៨ ខែឧសភា។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានរៀបរាប់ក្នុងសេចក្តីជូនព័ត៌មានថា ស្ត្រីដែលជាករណីទី១២៤នៅកម្ពុជានោះ បានទៅក្រុងញូវយ៉ក តាំងពីខែកុម្ភៈ ឆ្នាំ២០២០ មក ហើយជាប់គាំងនៅទីនោះ មួយរយៈដោយសារតែការបិទជើងហោះហើរ។
«ពេលមកដល់កម្ពុជា គាត់បានរស់នៅដាច់ដោយឡែក ហើយទៅពិនិត្យសុខភាព និងធ្វើតេស្តនៅមន្ទីរពេទ្យមិត្តភាពខ្មែរ-សូវៀត នៅថ្ងៃទី១២ ខែឧសភា ដោយសារគាត់មានបញ្ហាក្អក តឹងច្រមុះ និងស្ងួតបំពង់ក ដែលទទួលបានលទ្ធផលអវិជ្ជមាននាពេលនោះ។ គ្រូពេទ្យបានណែនាំឲ្យគាត់បន្តធ្វើចត្តាឡីស័ក១៤ថ្ងៃ រហូតដល់ថ្ងៃទី២០ ខែឧសភា... ហើយថ្ងៃទី២២ ខែឧសភា គាត់ក៏ត្រូវក្រុមគ្រូពេទ្យយកវត្ថុសំណាកវិភាគសារជាថ្មី ដែលទទួលបានលទ្ធផលវិជ្ជមាន COVID-19»។ នេះបើតាមការបញ្ជាក់របស់អ្នកនាំពាក្យ។
កម្ពុជាមានអ្នកឆ្លង COVID-19 សរុប១២៤នាក់ ដោយ១២២នាក់បានជាសះស្បើយ និងនៅសល់ករណី២ថ្មី ដែលទើបតែតេស្តឃើញក្រោយស្ងប់ស្ងាត់ជាង១ខែ។ កាលពីថ្ងៃទី២១ ក្រសួងបានប្រកាសពីករណីទី១២៣ដែលជាបុរសខ្មែរម្នាក់នៅខេត្តកំពត ហើយមានប្រវត្តិធ្វើដំណើរពីហ្វីលីពីន ដោយឆ្លងកាត់កូរ៉េខាងត្បូង មុនមកដល់កម្ពុជា៕
© រក្សាសិទ្ធិដោយ thmeythmey.com