ក្រសួងអប់រំ យុវជន និងកីឡា (MoEYS) តាមរយៈកម្មវិធីអាហារូបករណ៍របស់មជ្ឈមណ្ឌលអូស្ត្រាលីសំរាប់ការបណ្តុះបណ្តាល (ACE) នឹងផ្តល់អាហារូបករណ៍សិក្សាភាសាអង់គ្លេសតាមប្រព័ន្ធអេឡិចត្រូនិកពីចម្ងាយ (virtual classes) ដល់សិស្សថ្នាក់ទី១២តាមបណ្តាខេត្តក្រុងនានា។
នៅព្រឹកថ្ងៃទី២៨ ខែឧសភា ឆ្នាំ២០២០នេះ លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក ម៉ៅ ស្រេង នាយកប្រចាំប្រទេសនៃសាលា ACE និងស្ថាប័ន IDP Education បានចុះហត្ថលេខាលើអនុស្សរណៈ ក្នុងការផ្តល់អាហារូបករណ៍ចំនួន ២០០០កន្លែង ដល់សិស្សានុសិស្ស ត្រៀមប្រលងសញ្ញាប័ត្រទុតិយភូមិក្នុងឆ្នាំនេះ ដើម្បីរៀនបំប៉នភាសាអង់គ្លេស ពីចម្ងាយជាមួយសាលា ACE។
អាហារូបករណ៍សិក្សាភាសាអង់គ្លេសតាមប្រព័ន្ធអេឡិចត្រូនិក គឺជាផ្នែកមួយនៃកិច្ចការសង្គម របស់សាលា ACE ដើម្បីគាំទ្រនូវកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការបន្តផ្តល់នូវការអប់រំ ដល់សិស្សានុសិស្សទូទាំងប្រទេស តាមរយៈកម្មវិធីសិក្សាតាមប្រព័ន្ធអេឡិចត្រូនិកពីចម្ងាយ អំឡុងពេលនៃការទប់ស្កាត់ការឆ្លងនូវជំងឺកូវីដ-១៩។
សាលា ACE ដែលបង្កើតឡើងដោយស្ថាប័ន IDP Education នៅប្រទេសកម្ពុជាតាំងពីឆ្នាំ១៩៩២ ធ្លាប់បានទទួលនាមជាសាលាភាសា ដែលល្អជាងគេបំផុតទាំងបួនលើសាកលលោក នៅក្នុងកម្មវិធីពានរង្វាន់នៅក្រុងឡុងដ៍ ចក្រភពអង់គ្លេស កាលពីឆ្នាំ២០១៨។ សាលា ACE មាន៦សាខានៅប្រទេសកម្ពុជា និងសិស្សនិស្សិតចំនួន ២៥,០០០ នាក់។ សាលា ACE បានប្តូរវិធីសាស្ត្រពីការបង្រៀនក្នុងថ្នាក់ ទៅជាការបង្រៀនតាមប្រព័ន្ធអេឡិចត្រូនិកពីចម្ងាយ ជាមួយគ្រូបង្រៀនផ្ទាល់ ដោយប្រើប្រាស់បច្ចេកវិទ្យាទំនើប និងមានប្រសិទ្ធភាព។
លោក ហង់ ជួនណារ៉ុន បានមានប្រសាសន៍ថា៖«ដោយមានការគាំទ្រយ៉ាងសកម្ម ពីក្រសួង និងស្ថាប័នពាក់ព័ន្ធនានា ក្រសួងអប់រំ យុវជន និងកីឡា បាន និងកំពុងខិតខំប្រឹងប្រែង បន្តផ្តល់ជូនសិស្សានុសិស្សទូទាំងប្រទេស នូវការអប់រំដែលមានគុណភាព និងប្រសិទ្ធភាព ក្នុងខណៈដែលការរក្សាឱ្យបាននូវសុវត្ថិភាពរបស់សិស្សានុសិស្ស និងសហគមន៍ជាអាទិភាពខ្ពស់បំផុត។ កម្មវិធីអាហារូបករណ៍សិក្សាពីចម្ងាយ របស់សាលាACE នេះគឺជាឧទាហរណ៍មួយ ដែលបញ្ជាក់ភាពច្នៃប្រឌិត ដែលអាចធ្វើបានក្នុងវិស័យអប់រំ តាមរយៈការប្រើប្រាស់បច្ចេកវិទ្យា»។
លោក Pablo Kang ឯកអគ្គរដ្ឋទូតអូស្ត្រាលីប្រចាំប្រទេសកម្ពុជា ដែលមានវត្តមាននៅពិធីចុះហត្ថលេខា លើអនុស្សរណៈបានថ្លែងថា៖ «ប្រទេសអូស្ត្រាលី មានប្រវត្តិផ្តល់ជំនួយដល់វិស័យអប់រំ ក្នុងប្រទេសកម្ពុជា តាំងពីយូរណាស់មកហើយ រួមទាំងក្នុងអំឡុងពេលដ៏លំបាកនេះ។ ខ្ញុំមានក្តីរីករាយ និងការសរសើរ ដល់ស្ថាប័នរបស់ប្រទេសអូស្ត្រាលី ដូចជាសាលា ACE ដែលបានកែសម្រួលវិធីសាស្ត្របង្រៀន សម្របទៅនឹងកាលៈទេសៈបច្ចុប្បន្ន ដើម្បីបន្តផ្តល់នូវការបណ្តុះបណ្តាលភាសាអង់គ្លេស ដែលមានគុណភាពដល់សិស្ស និស្សិតក្នុងប្រទេសកម្ពុជា»។
លោក ម៉ៅ ស្រេង បានលើកឡើងថា៖«អាហារូបករណ៍សិក្សាភាសាអង់គ្លេស តាមប្រព័ន្ធអេឡិចត្រូនិកពីចម្ងាយ នឹងជួយជាប្រយោជន៍ ពង្រឹងសមត្ថភាពភាសាអង់គ្លេស និងឱកាសទទួលបានលទ្ធផលប្រសើរ លើមុខវិជ្ជាភាសាអង់គ្លេស ក្នុងការប្រលងសញ្ញាប័ត្រទុតិយភូមិខាងមុខនេះ»។
យោងតាមប្រសាសន៍របស់លោក Ashley Irving ចាងហ្វាងសាលា ACE សិស្សថ្នាក់ទី១២ ឆ្នាំសិក្សា ២០១៩-២០២០ អាចដាក់ពាក្យសុំអាហារូបករណ៍តាមប្រព័ន្ធអនឡាញ ចាប់ពីថ្ងៃទី០២ រហូតដល់ ថ្ងៃទី២០ ខែមិថុនា ឆ្នាំ២០២០។
បេក្ខជនដែលទទួលបានអាហារូបករណ៍ទាំង ២០០០នាក់ នឹងចាប់ផ្តើមវគ្គសិក្សាចាប់ពីចុងខែមិថុនា រហូតដល់ខែកញ្ញា ឆ្នាំ២០២០។
(អត្ថបទពាណិជ្ជកម្ម)