អន្តរជាតិ
លោក ត្រាំ ចេញបញ្ជាប្រតិបត្តិសំដៅគ្រប់គ្រងបណ្តាញសង្គម ក្រោយរកាំរកូសជាមួយ Twitter លោកដូណាល់ត្រាំ ប្រធានាធិបតីអាមេរិក ពេលចុះហត្ថលេខាលើបញ្ញាប្រតិបត្តិ។រូបភាព Reuters
× លោក ដូណាល់ ត្រាំ ប្រធានាធិបតីអាមេរិក នៅថ្ងៃទី២៨ ខែឧសភា បានចុះហត្ថលេខាលើបញ្ជាប្រតិបត្តិមួយ ស្មើនឹងការដកហូតអភ័យឯកសិទ្ធិពីក្រុមហ៊ុនបណ្តាញសង្គមធំៗដូច Twitter ជាដើម។ ការចេញបញ្ជាប្រតិបត្តិនេះ ត្រូវបានគេសង្ស័យថា ជាសកម្មភាពសងសឹកនយោបាយទៅលើបណ្តាញសង្គម។
យោងតាមទីភ្នាក់ងារសារព័ត៌មាន AFP បញ្ជាប្រតិបត្តិមួយដែលចុះហត្ថលេខាដោយប្រធានាធិបតី ដូណាល់ ត្រាំ នឹងបើកផ្លូវឲ្យទីភ្នាក់ងាររដ្ឋវាយតម្លៃ ថា ក្រុមហ៊ុនបណ្តាញសង្គម ត្រូវទទួលខុសត្រូវចំពោះមុខច្បាប់ចំពោះមាតិកាដែលផ្សព្វផ្សាយដោយអ្នកប្រើប្រាស់រាប់លាននាក់ឫយ៉ាងណា។ ក្នុងករណីបញ្ជានេះ ត្រូវបានអនុវត្ត បណ្ដាញសង្គមទាំងនោះ នឹងត្រូវបានចាត់ចូលជាអ្នកផ្សព្វផ្សាយ ដែលតាមច្បាប់ ត្រូវទទួលខុសត្រូវចំពោះអត្ថន័យនៃសារដែលបង្ហោះលើទំព័រពួកគេ។
ទាក់ទងនឹងរឿងបញ្ជាប្រតិបត្តិនេះ លោក ត្រាំ ប្រាប់ អ្នកសារព័ត៌មាននៅសេតវិមានថា៖ «ក្រុមហ៊ុនបច្ចេកវិទ្យាធំៗ មានអំណាចដែលគ្មានអ្នកណាត្រួតពិនិត្យក្នុងការបំបិទ រឹតត្បិត កែប្រែ លាក់ និងផ្លាស់ប្តូរទម្រង់នៃការទាក់ទងរវាងពលរដ្ឋ ឬមហាជន»។ លោក ត្រាំ បន្ថែមថា គេមិនអាចឲ្យរឿងនេះបន្តបានទៀតឡើយ។
ការចាត់វិធានការរបស់លោកត្រាំ ធ្វើឡើងបន្ទាប់ពីTwitter បានដាក់សញ្ញាត្រួតពិនិត្យការពិតលើសារចំនួន២ របស់លោកត្រាំលើបណ្តាញសង្គមរបស់ខ្លួន ដោយចាត់ទុកថាអាចនឹងងាយមានការយល់ច្រឡំ។ បញ្ជាប្រតិបត្តិខាងលើ ចែងថាក្រុមហ៊ុនបច្ចេកវិទ្យាដូចជា Twitter, Facebook, Instagram និង Youtube មានអំណាចយ៉ាងសម្បើមក្នុងការកែប្រែការបកស្រាយមតិសាធារណៈ បំបិទ លុប និងបំបាត់ចោលព័ត៌មាន និងគ្រប់គ្រងអ្វីដែលមនុស្សឃើញ និងមិនឃើញ។
ប្រតិកម្មតបទៅនឹងបញ្ជាប្រតិបត្តិរបស់លោក ត្រាំ បណ្ដាញសង្គម Twitter អះអាងថា បញ្ជានេះគំរាមសិទ្ធិសេរីភាពក្នុងការបញ្ចេញមតិលើនៅលើអ៊ីនធឺណិតនាថ្ងៃអនាគត និងចាត់ទុកបញ្ជានេះមានលក្ខណៈនយោបាយ និងប្រតិកិរិយា។ ចំណែកឯអ្នកនាំពាក្យ Google វិញ ព្រមានពីការប៉ះពាល់សេដ្ឋកិច្ចអាមេរិក ខណៈ អ្នកនាំពាក្យ Facebook លើកឡើងថា ខ្លួននឹងលើកទឹកចិត្តឲ្យវេទិកាអនឡាញបិទសារទាំងឡាយណាដែលមានអត្ថន័យប៉ះពាល់ដល់អ្នកដទៃ៕
ការចេញបញ្ជារបស់លោក ត្រាំ នេះ ត្រូវបានគេចាត់ទុកជាការបកស្រាយខុសទៅលើវិសោធនកម្មទី១ នៃរដ្ឋធម្មនុញ្ញអាមេរិកដែលចែងឡើងដើម្បីបង្ការរដ្ឋាភិបាលពីការរឹតត្បិតសិទ្ធិសេរីភាពនៃការបញ្ចេញមតិ។ សាស្ត្រាចារ្យ Laurence Tribe នៃសាកលវិទ្យាល័យច្បាប់ Havard និង លោក Joshua Geltzer នៃសាកលវិទ្យាល័យ Georgetown បានអះអាងថា វិសោធនកម្មទី១នៃរដ្ឋធម្មនុញ្ញអាមេរិក គឺអនុវត្តទៅលើរដ្ឋាភិបាល មិនមែនវិស័យឯកជនដូចជាបណ្តាញសង្គម Twitter ឡើយ៕
© រក្សាសិទ្ធិដោយ thmeythmey.com