COVID-19
អន្តរជាតិ
នាយករដ្ឋមន្ត្រីអាមេនី និងសមាជិកគ្រួសារទាំងអស់ ឆ្លង COVID-19 នាយករដ្ឋមន្រ្តីអាមេនី Nikol Pashinyan ។ រូបភាព AFP
× នាយករដ្ឋមន្ត្រីអាមេនី Nikol Pashinyan ប្រកាសនៅបណ្ដាញសង្គមហ្វេសប៊ុកនៅថ្ងៃទី១ ខែមិថុនា ថា លោកមានលទ្ធផលវិជ្ជមានជំងឺ COVID-19 ។ សមាជិកគ្រួសាររបស់លោកឯទៀត ក៏ឆ្លងជំងឺនេះដែរ ហើយទាំងអស់គ្នាកំពុងស្ថិតនៅដោយឡែកក្នុងនិវេសនដ្ឋាននាយករដ្ឋមន្ត្រីក្នុងរដ្ឋធានីយ៉េរ៉េវាន់។
ក្នុងការប្រកាសដែលផ្សាយផ្ទាល់លើហ្វេសប៊ុក លោក Nikol Pashinyan និយាយថា លោក បានធ្វើតេស្តរកវីរុសនេះ ព្រោះលោកត្រូវចុះត្រួតពិនិត្យការឆ្លើយតបនៅជួរមុខ។ លទ្ធផល ក៏ចេញមកវិជ្ជមានតែម្ដង។ លោកមានភរិយា និងកូនៗបីនាក់។
លោក Pashinyan ជឿថា លោកឆ្លង COVID-19 ក្នុងកិច្ចប្រជុំមួយលើការងារទប់ស្កាត់កូរ៉ូណាវីរុស។ អំឡុងពេលរៀបចំ បុគ្គលិកម្នាក់បានរៀបចំកែវទឹកសម្រាប់អ្នកចូលរួម តែមិនបានប្រើប្រាស់ស្រោមដៃឡើយ។ ក្រោយមក បុគ្គលិកដដែលនោះ ក៏ត្រូវបានធ្វើតេស្តដោយមានលទ្ធផលវិជ្ជមានជំងឺ COVID-19 ។
សូមបញ្ជាក់ថា អាមេនីដែលមានប្រជាជនជាងបីលាននាក់ មានករណីឆ្លង COVID-19 ចំនួន៩៤០២នាក់ និងស្លាប់១៣៩នាក់ គិតត្រឹមថ្ងៃទី១ ខែមិថុនា៕
© រក្សាសិទ្ធិដោយ thmeythmey.com