COVID-19
កីឡាអន្តរជាតិ
អន្តរជាតិ
សមាជិក Spurs ម្នាក់ឆ្លង COVID-19 ខណៈ៩ករណីទៀតរកឃើញនៅ Championship
× ក្លិប Tottenham Hotspur មានករណីឆ្លងជំងឺ COVID-19 ម្នាក់ ក្រោយទទួលការធ្វើតេស្តលើកចុងក្រោយពីសំណាក់ក្របខណ្ឌ Premier League។ ដោយឡែក មនុស្ស៩នាក់ដែលមកពីក្លិបចំនួន៦នៃលីគលំដាប់ទី២ អង់គ្លេស (Champioship) ក៏រកឃើញថាឆ្លងជំងឺរាតត្បាតសកលនេះផងដែរ។
ក្លិបរហស្សនាមមាន់ខ្នាយមាស បញ្ជាក់នៅថ្ងៃទី៣ ខែមិថុនា ថា សមាជិករបស់ខ្លួនដែលឆ្លងនោះត្រូវយកទៅដាក់ឲ្យនៅដាច់ដោយឡែកពីគេចំនួន៧ថ្ងៃ ដើម្បីតាមដាននិងព្យាបាលជំងឺ។ ដោយសារជាការសម្ងាត់របស់ក្រុមគ្រូពេទ្យ អត្តសញ្ញាណរបស់អ្នកឆ្លងនេះមិនត្រូវបានបង្ហាញឲ្យដឹងនោះឡើយ។
មួយករណីនៅ Spurs នេះ គឺជាលទ្ធផលវិជ្ជមានតែមួយគត់ក្នុងចំណោមកីឡាករ និងបុគ្គលិកចំនួន ១១៩៧ នាក់មកពីក្របខណ្ឌកំពូលអង់គ្លេសបានទទួលការធ្វើតេស្តរកមេរោគនៅក្នុងជុំចុងក្រោយ។
ស្របគ្នានេះ ក្លិបក្នុងក្របខណ្ឌកម្រិតទីពីរអង់គ្លេសចំនួន៦ ក៏រកឃើញថា មានអ្នកឆ្លង COVID-19 ចំនួន៩នាក់ផងដែរ។ ក្រុម Preston និង Sheffield Wednesday បានបញ្ជាក់ថា ពួកគេមានសមាជិកម្នាក់ដូចគ្នាបានធ្វើតេស្តចេញលទ្ធផលវិជ្ជមានជំងឺរលាកសួតបង្កដោយកូរ៉ូណាវីរុសប្រភេទថ្មីនេះ។
នៅ Championship មានមនុស្សចំនួន ១០៩៤ នាក់ត្រូវទទួលការធ្វើតេស្តក្នុងរយៈពេល ៤ ថ្ងៃកន្លងមក ហើយអ្នកដែលមានលទ្ធផលវិជ្ជមាន ត្រូវដាក់ខ្លួនឯងឲ្យនៅដាច់ពីគេដោយខ្លួនឯងផ្ទាល់ ដោយគោរពតាមគោលការណ៍ណែនាំរបស់លីគអង់គ្លេស (EFL)។
រហូតមកទល់ពេលនេះ មានក្លិបចំនួន៧ហើយនៅ Championship ដែលបានប្រកាសថាពួកគេមានកីឡាករ និងបុគ្គលិកឆ្លង COVID-19 ដួចជា Preston, Sheffield Wednesday, Cardiff, Middlesbrough, Blackburn, Fulham និង Hull City ។ ក្នុងចំណោមកីឡាករ និងបុគ្គលិកក្លិបជាង៤ពាន់នាក់ ដែលបានធ្វើតេស្តចាប់ពីថ្ងៃទី២១ ខែឧសភាមក គេរកឃើញអ្នកវិជ្ជមាន COVID-19 ចំនួន២៤នាក់ហើយ៕
Tag:
Tottenham Hotspur
COVID-19
© រក្សាសិទ្ធិដោយ thmeythmey.com