អត្ថបទពាណិជ្ជកម្ម
ក្រុមហ៊ុនវីង និងផ្សារទំនើប អ៊ីអន ម៉ល រួមគ្នាផ្តល់នូវបទពិសោធន៍នៃការទិញទំនិញប្រកបដោយភាពងាយស្រួល
× ភ្នំពេញ ថ្ងៃទី៥ មិថុនា ២០២០៖ ឥឡូវនេះ អតិថិជនអាចប្រើប្រាស់កម្មវិធីស្មាតហ្វូនវីង ទិញទំនិញ និងសេវាកម្ម នៅផ្សារទំនើប អ៊ីអន ម៉ល បានហើយ។ ធនាគារឯកទេសវីង (ខេមបូឌា) លីមីតធីត និងក្រុមហ៊ុន អ៊ីអន ម៉ល (ខេមបូឌា) ខូអិលធីឌី ដែលជាផ្សារទំនើបឈានមុខគេ និងធំជាងគេបំផុតនៅកម្ពុជា បានចុះហត្ថលេខា លើភាពជាដៃគូដើម្បីផ្តល់នូវការទិញទំនិញ និងសេវាកម្ម ប្រកបដោយភាពងាយស្រួល ដោយមិនចាំបាច់ប្រើប្រាស់ក្រដាសប្រាក់ ដល់អតិថិជននៅផ្សារទំនើប អ៊ីអន ម៉ល ទាំង២ទីតាំង។
លោក ម៉ានូ រ៉ាចាន់ អគ្គនាយកនៃធនាគារឯកទេសវីង បានមានប្រសាសន៍ថា៖«យើងជឿជាក់ថា ភាពជាដៃគូនេះ នឹងផ្តល់ឱ្យអ្នករាល់គ្នា កាន់តែមានសេរីភាពក្នុងការទិញទំនិញ និងសេវាកម្ម កាន់តែប្រសើរឡើង។ ការទូទាត់ការចំណាយ ដោយប្រើប្រាស់ QR កូដ កំពុងតែមានប្រជាប្រិយ ពាសពេញពិភពលោក ដោយសារតែមានភាពងាយស្រួល និងសុវត្ថិភាព»។
តាមរយៈភាពជាដៃគូថ្មីនេះ អតិថិជននៅផ្សារទំនើប អ៊ីអន ម៉ល អាចទៅទិញទំនិញ និងផលិតផលផ្សេងៗ ដោយមិនចាំបាច់កាន់ក្រដាសប្រាក់ឡើយ គឺគ្រាន់តែប្រើម្រាមដៃ ចុចលើស្មាតហ្វូន ដែលមានគណនីវីង នោះនឹងទទួលបាននូវបទពិសោធន៍ នៃការទិញអីវ៉ាន់ប្រកបដោយសុវត្ថិភាព ព្រមទាំងទាន់សម័យ។ អតិថិជនអាចស្កេន QR កូដ នៅឯបញ្ជរគិតលុយ ដើម្បីធ្វើប្រតិបត្តិការភ្លាមៗតែម្តង។
លោក ត្ស៊ុបុយ៉ា ម៉ាសាយុគិ អគ្គនាយក នៃក្រុមហ៊ុន អ៊ីអន ម៉ល (ខេមបូឌា) ខូ អិលធីឌី បានមានប្រសាសន៍ថា៖«យើងពិតជារីករាយណាស់ ដែលធនាគារឯកទេសវីង និងផ្សារទំនើបអ៊ីអនម៉លអាចសហការគ្នា ដើម្បីធ្វើកិច្ចការមួយនេះ។ យើងរួមគ្នាប្រើប្រាស់បច្ចេកវិទ្យាហិរញ្ញវត្ថុ ដើម្បីផ្តល់ជម្រើសកាន់តែច្រើន និងការទិញទំនិញកាន់តែប្រសើរឡើង ដល់អតិថិជននៅកម្ពុជា»។
ទាំងធនាគារឯកទេសវីង និងផ្សារទំនើប អ៊ីអនម៉ល (ខេមបូឌា) ខូអិលធីឌី សុទ្ធតែមានបំណងដូចគ្នា ក្នុងការបង្កើតប្រព័ន្ធទូទាត់ ដែលផ្តល់ភាពងាយស្រួលដល់អតិថិជន។ ដើម្បីជាកិច្ចចាប់ផ្ដើម នៃភាពជាដៃគូនេះ អតិថិជនជាង ១០០០នាក់ដំបូង នឹងទទួលបានការបញ្ចុះតម្លៃ ៥ ដុល្លារភ្លាមៗ រាល់ការទូទាត់តាម QR កូដ របស់កម្មវិធីស្មាតហ្វូនវីង ដើម្បីទិញទំនិញ និងសេវាកម្មនៅហាងជិត៣០ កន្លែងក្នុងផ្សារទំនើប អ៊ីអនម៉ល ភ្នំពេញ និងអ៊ីអនម៉លសែនសុខស៊ីធី ដោយមានចាប់ពីហាងអាហារ និងភេសជ្ជៈ រហូតដល់ហាងលក់សម្លៀកបំពាក់ និងគ្រឿងអេឡិចត្រូនិក។
ធនាគារឯកទេសវីង បានបង្កើតយីហោដ៏រឹងមាំ តាមរយៈកម្មវិធីស្មាតហ្វូនវីង ព្រមទាំងភ្នាក់ងារវីង ដែលមានជាង ៧.៥០០ កន្លែង នៅទូទាំងប្រទេសកម្ពុជា ដែលអាចផ្តល់ជូន នូវសេវាកម្មហិរញ្ញវត្ថុ ប្រកបដោយភាពងាយស្រួល សុវត្ថិភាព និងឆាប់រហ័ស។ ទន្ទឹមនឹងនេះ ក្រុមហ៊ុន អ៊ីអន ម៉ល (ខេមបូឌា) ខូអិលធីឌី ដែលត្រូវបានបង្កើតឡើង នៅក្នុងប្រទេសកម្ពុជា កាលពីខែមិថុនា ឆ្នាំ២០១៤នោះ ត្រូវបានគេស្គាល់ថា មានការផ្តោតការយកចិត្តទុកដាក់ លើអតិថិជនរបស់ខ្លួនយ៉ាងខ្លាំង តាមរយៈការផ្តល់បទពិសោធន៍ទិញទំនិញ និងសេវាកម្ម ដែលមានគុណភាពខ្ពស់៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com