COVID-19
អន្តរជាតិ
COVID-19៖ អេស្ប៉ាញ នឹងផាកពិន័យលើជនទាំងឡាយណា ដែលមិនពាក់ម៉ាស់នៅសាធារណៈ
នាយករដ្ឋមន្រ្តីអេស្ប៉ាញ លោកPedro Sanchez ពាក់ម៉ាស់។ រូបភាព៖ AFP
×![]()
ដោយ: ធៀន ភារិន្ទ
អេស្ប៉ាញ នឹងចាប់បង្ខំឲ្យប្រជាជនរបស់ខ្លួនពាក់ម៉ាស់នៅក្នុងទីសាធារណៈ ដើម្បីទប់ស្កាត់ករណីឆ្លង និងការរាតត្បាតជាថ្មីនៅក្នុងប្រទេស ជាពិសេសក្នុងអំឡុងពេលបើកប្រទេសឡើងវិញ។ រាល់បុគ្គលណា ដែលល្មើសនឹងបទបញ្ជាមួយនេះ នឹងត្រូវពិន័យជាប្រាក់រហូតដល់ជាង ១០០ដុល្លារ។ រដ្ឋាភិបាលអេស្ប៉ាញបញ្ជាក់បែបនេះនៅថ្ងៃទី៩ ខែមិថុនា។
អេស្ប៉ាញ បានស្នើឲ្យប្រជាជនរបស់ពាក់ម៉ាស់ តាំងពីដើមខែឧសភាមកម្លេះ ដើម្បីទប់ស្កាត់ការរាតត្បាតនៃ COVID-19 នៅក្នុងប្រទេស។ រហូតមកដល់ថ្ងៃទី២១ ខែឧសភា អេស្ប៉ាញ បានបង្ខំឲ្យប្រជាជនរបស់ខ្លួនទាំងអស់ ដែលមានអាយុចាប់ពីអាយុ ៦ឆ្នាំឡើយ ត្រូវតែពាក់ម៉ាស់នៅក្នុងទីសាធារណៈ ប្រសិនបើប្រជាជនមិនអាចរក្សាគម្លាតសុវត្ថិភាពចម្ងាយ ២ម៉ែត្របាន។ ប៉ុន្តែវិធានមួយនេះរដ្ឋាភិបាលអេស្ប៉ាញ មិនបានលើកឡើងពីការពិន័យជាប្រាក់ឡើយ។
ទាក់ទិននឹងបញ្ហានេះ រដ្ឋាភិបាលអេស្ប៉ាញ បានអះអាងសារជាថ្មីជុំវិញការចាប់បង្ខំការពាក់ម៉ាស់មួយនេះ ខណៈពេលជិតដល់ថ្ងៃបើកប្រទេសវិញនៅថ្ងៃទី២១ ខែមិថុនា។ រាល់ប្រជាជនទាំងអស់ ដែលមិនពាក់ម៉ាស់ នឹងត្រូវពិន័យជាប្រាក់ប្រមាណ ១១៣ដុល្លារ ទោះជាស្ថិតនៅគម្លាតសុវត្ថិភាព១,៥ម៉ែត្រក៏ដោយ។
បើតាមការលើកឡើងរបស់រដ្ឋមន្ត្រីសុខភិបាលលោក Salvador Illa វិធានការនេះនឹងបន្តរហូតដល់ពេលលើកស្ថានភាពអាសន្នចេញពីប្រទេស និងរហូតដល់អេស្ប៉ាញអាចប្រយុទ្ធឈ្នះ ឬមានវ៉ាក់សាំងការពារកូរ៉ូណាវីរុស។ ប្រសិនគ្មានការប្រែប្រួលទេ បទបញ្ជាមួយនេះ នឹងចូលជាធរមានក្នុងរយៈ១០ថ្ងៃ មុនអេស្ប៉ាញលើកស្ថានភាពអាសន្នចេញពីប្រទេស។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ការចាប់បង្ខំនេះ នឹងអនុវត្តលើអ្នកប្រើប្រាស់ប្រព័ន្ធដឹកជញ្ជូនសាធារណៈ និងអ្នកជិះរថយន្តឯកជន ក៏ត្រូវតែពាក់ម៉ាស់ដែរ។ ដើម្បីអនុវត្តបទបញ្ជានេះ អេស្ប៉ាញ នឹងពង្រាយកម្លាំងប៉ូលិសជាច្រើននាក់ ដើម្បីផាកពិន័យជនទាំងឡាយណា ដែលមិនគោរពបទបញ្ជា។ យ៉ាងណាក៏ដោយ ការពាក់ម៉ាស់នេះ មិនបញ្ចូលក្មេងអាយុចាប់ពីអាយុ ៣ឆ្នាំ រហូតដល់ ៥ឆ្នាំឡើយ។
សូមបញ្ជាក់ថា គិតត្រឹមថ្ងៃទី៩ ខែមិថុនា អេស្ប៉ាញ មានករណី COVID-19 ចំនួន ២៨៩ ០៤៦ករណី អ្នកស្លាប់ចំនួន ២៧ ១៣៦នាក់៕
Tag:
អេស្ប៉ាញ
COVID-19
© រក្សាសិទ្ធិដោយ thmeythmey.com
