កីឡាជាតិ
ជាតិ
លោក ស សុខា៖ «ខ្ញុំពុំដែលយកតួនាទីបុណ្យស័ក្តិរបស់ខ្លួន ទៅកាងនឹងរឿងអ្វីមួយឡើយ»
លោក ស សុខា រដ្ឋលេខាធិការក្រសួងអប់រំយុវជននិងកីឡា និងជាស្ថាបនិកក្លិបវិសាខា, រូបភាពពីហ្វេសប៊ុក Sar Sohka
×![]()
រដ្ឋលេខាធិការក្រសួងអប់រំ យុវជន និងកីឡា លោក ស សុខា អះអាងថា លោកមិនដែលប្រើអំណាច ឬយកបុណ្យស័ក្តិធ្វើជាខ្នងបង្អែក(កាង)ឲ្យអ្នកណាម្នាក់ ឬស្ថាប័នណាមួយប្រព្រឹត្តអំពើត្រឹមត្រូវនោះទេ ពិសេសពាក់ព័ន្ធនឹងក្លិបវិសាខា។ លោកដាស់តឿនដល់អ្នកលេងបណ្តាញសង្គមមួយចំនួន ឲ្យឈប់បញ្ចេញយោបល់ដោយភ្ជាប់រូបលោកទៅនឹងរឿង ដែលមិនបានដឹង ឬពាក់ព័ន្ធ។ 
ស្ថាបនិកក្លិបបាល់ទាត់វិសាខាលោក ស សុខា បានបង្ហាញការមិនពេញចិត្តចំពោះបុគ្គលមួយចំនួនតូច ដែលបញ្ចេញមតិរិះគន់ដោយភ្ជាប់រូបលោកទៅនឹងរឿង ដែលលោកមិនបានដឹង ឬពាក់ព័ន្ធ។ ការបង្ហាញអារម្មណ៍បែបនេះ ធ្វើឡើងក្រោយលោកសង្កេតឃើញថា ក្នុងមួយរយៈចុងក្រោយនេះមានអ្នកលេងហ្វេសប៊ុកមួយចំនួនតូចបានយករូបលោកទៅពាក់ព័ន្ធរឿងមិនល្អដែលនាំឲ្យប៉ះពាល់ដល់កេរ្តិ៍ឈ្មោះ និងកិត្តិយសរបស់លោក។
«ថ្មីៗនេះដោយពិនិត្យឃើញថា មានបងប្អូនមួយចំនួនតូច ដែលចូលចិត្តបញ្ចេញអារម្មណ៍របស់ខ្លួន តាមប្រព័ន្ធផ្សព្វផ្សាយសង្គម (Facebook) ជុំវិញក្លិបវិសាខា ដោយធ្វើការទាញភ្ជាប់រូបខ្ញុំទៅនឹងការបញ្ចេញអារម្មណ៍នោះ បែបវាយប្រហារខុសពីការពិតមកលើរូបខ្ញុំ ទាំងខ្ញុំមិនបានដឹង ឬពាក់ព័ន្ធទាល់តែសោះ បណ្តាលឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់ខ្ញុំជាខ្លាំង»។ នេះជាការបង្ហាញអារម្មណ៍មិនពេញចិត្តរបស់លោក ស សុខា ចំពោះអ្នកហ្វេសប៊ុកមួយចំនួនតូច។ ប៉ុន្តែលោកមិនបញ្ជាក់លម្អិតពាក់ព័ន្ធរឿង ដែលអ្នកលេងហ្វេសប៊ុកភ្ជាប់ជាមួយនោះទេ។
រដ្ឋលេខាធិការក្រសួងអប់រំយុវជននិងកីឡារូបនេះអះអាងថា លោកមិនដែលប្រើអំណាច ឬបុណ្យស័ក្តិក្នុងការដោះស្រាយបញ្ហា ឬឈរឈ្មោះនៅក្រោយរឿងមិនល្អនោះទេ។ លោកបញ្ជាក់ដូច្នេះថា៖«ខ្ញុំពុំដែលយកតួនាទីបុណ្យស័ក្តិរបស់ខ្លួន ទៅកាងនឹងរឿងអ្វីមួយឡើយ ជាពិសេសពាក់ព័ន្ធនឹងក្លិបវិសាខា បើទោះបីជារូបខ្ញុំជាស្ថាបនិកក្លិបនេះ ហើយបច្ចុប្បន្នភរិយារបស់ខ្ញុំ ជាប្រធានក្លិបក៏ដោយចុះ។ បង្កើតក្លិបនេះ ពុំបានគិតពីផលប្រយោជន៍នោះទេ ដោយសារស្រឡាញ់ និងចង់ចូលរួមអភិវឌ្ឍវិស័យកីឡាតែប៉ុណ្ណោះ»។
កូនប្រុសសម្តេច ស ខេង រដ្ឋមន្ត្រីក្រសួងមហាផ្ទៃរូបនេះ ដាស់តឿនឲ្យអ្នកលេងហ្វេសប៊ុកទាំងនោះ ត្រូវពិចារណាឲ្យបានល្អិតល្អន់ និងត្រួតពិនិត្យឲ្យបានគ្រប់ជ្រុងជ្រោយមុនបញ្ចេញមតិ ឬរិះគន់អ្នកណាម្នាក់ ព្រោះការបញ្ចេញមតិ ឬរិះគន់របស់ពួកគេអាចធ្វើឲ្យប៉ះពាល់ដល់កេរ្តិ៍ឈ្មោះ កិត្តិយស និងសេចក្តីថ្លៃថ្នូររបស់អ្នកដទៃ។ ជាពិសេសអាចនាំឲ្យពួកគេប្រឈមនឹងបញ្ហាផ្លូវច្បាប់ ឬជាប់ទោសទណ្ឌក៏អាចថាបាន។ «សូមកុំគិតថាធ្វើខុសហើយសុំទោសរួចខ្លួន ក៏ចេះតែធ្វើទៅនោះអី!»។ លោក ស សុខា បានបន្ថែមបែបនេះ៕
Tag:
បាល់ទាត់
ស សុខា
វិសាខា
© រក្សាសិទ្ធិដោយ thmeythmey.com
