ដោយ៖ ង៉ាយ ណៃ
ភ្នំពេញ៖ ឃ្មុំគឺជាសត្វល្អិតមួយប្រភេទដែលមានប្រយោជន៍ និងដើរតួនាទីយ៉ាងសំខាន់នៅក្នុងប្រព័ន្ធបរិស្ថាន។ ជាទូទៅ ឃ្មុំចូលចិត្តរស់នៅ និងធ្វើសំបុកនៅតំបន់ដែលមានព្រៃឈើដុះច្រើន ហើយសម្បូរផ្កា ព្រោះអាចបង្កលក្ខណៈងាយស្រួលនៅក្នុងការរស់នៅ។
ក្រៅពីការរស់នៅតាមបែបធម្មជាតិ គេក៏អាចធ្វើការចិញ្ចឹមឃ្មុំដើម្បីប្រមូលយកទឹករបស់វាមកប្រើប្រាស់បានដែរ ដោយគ្រាន់តែចាំបាច់យល់ដឹង និងអនុវត្តន៍នូវជំហានដូចខាងក្រោម៖
១ ការជ្រើសពូជយកមកចិញ្ចឹម
ពូជឃ្មុំដែលត្រូវយកមកចិញ្ចឹមអាចចាប់ក្នុងធម្មជាតិ ឬ ទិញពីកសិដ្ឋានចិញ្ចឹមឃ្មុំ។ សំបុករបស់វាត្រូវមានយ៉ាងតិច ៣បង្គង ហើយត្រូវមានកូនច្រើនគ្របដណ្ដប់ទាំងសងខាងផ្លិត រីឯស្ដេចឃ្មុំត្រូវរក មេឃ្មុំដែលធំ វែង រហ័សរហួន និងគ្មានជម្ងឺ។
២ ជ្រើសរើសទីតាំងសម្រាប់ដាក់ចិញ្ចឹមឃ្មុំ
ការជ្រើសរើសទីតាំងពិតជាសំខាន់នៅក្នុងការចិញ្ចឹមឃ្មុំ គេត្រូវរើសទីតាំងណាដែលនៅក្បែរប្រភពទឹកដមផ្កា និងមានលម្អងស្ងប់ស្ងាត់ ឆ្ងាយពីបឹងធំៗ និងប្រុងប្រយ័ត្នសត្រូវឃ្មុំដូចជា គីងគក់ ស្រមោច និងជីងចក់ ជាដើម។
៣ ការបំបែកសំបុក
ការបំបែកសំបុកនៅនឹងកន្លែង៖ បំបែកចំនួនបង្គងឃ្មុំជាពីរផ្នែក ដោយដាក់ចូលទៅក្នុងធុងផ្សេងគ្នា។ ដំបូងទិស បណ្ដោយធុងត្រូវដាក់ស្របគ្នា ក្រោយមកបន្តិចម្ដងៗលើក សំបុកឃ្លាតពីគ្នា ហើយបង្វិលទិសដៅឱ្យផ្ទុយពីគ្នា។ នៅពេលដែលផ្ដាច់ បង្គងពីគ្នា ត្រូវលៃកូនឃ្មុំឱ្យស្មើគ្នា និងត្រូវបន្ថែមស្ដេចឃ្មុំចំពោះសំបុកដែលគ្មានស្ដេច។
ការបំបែកសំបុកផ្លាស់ទី៖ ការបំបែកនេះ មានលក្ខណៈទៅនឹងរបៀបខាងលើដែរ ប៉ុន្តែត្រូវយកធុងដាក់ឆ្ងាយពីគ្នាចម្ងាយប្រមាណ១.៥គីឡូម៉ែត្រ។
៤ ការការពារឃ្មុំហើរចាកចោលសំបុក
ដើម្បីការពារកុំឱ្យឃ្មុំចាកចោលសំបុក គេត្រូវផ្គត់ផ្គង់ចំណីអាហារឱ្យបានគ្រប់គ្រាន់ ការពារកុំឱ្យមានជម្ងឺនិងសត្រូវយាយី។ ក្រៅពីនេះ ត្រូវដាក់នៅកន្លែងដែលឆ្ងាយពីមនុស្ស និងមិនមានសម្លេងអ៊ូរច្រើន៕
(សារព័ត៌មានថ្មីៗ២៥រាជធានី-ខេត្ត ដកស្រង់ចេញពីវេបសាយរបស់ក្រសួងកសិកម្ម រក្ខាប្រមាញ់ និងនេសាទ)