COVID-19
ជាតិ
នាយករដ្ឋមន្ត្រីកម្ពុជា ឈប់ឲ្យអ្នកវិនិយោគនិងអ្នកជំនាញបរទេស មានធានារ៉ាប់រង៥ម៉ឺនដុល្លារនិងមិនបាច់តម្កល់៣ពាន់ដុល្លារក្នុងធនាគារ
×![]()
ដោយ: សារព័ត៌មានថ្មីៗ
រដ្ឋាភិបាលកម្ពុជា កំណត់ថា គ្រប់ជនបរទេស ត្រូវមានឯកសារធានារ៉ាប់រងសុខភាព ដែលមានតម្លៃ៥ម៉ឺនដុល្លារឡើងទៅ ទើបអាចចូលមកកម្ពុជាបាន ហើយពេលមកដល់ ត្រូវតម្កល់ប្រាក់៣ពាន់ដុល្លារទៀត ចូលទៅក្នុងធនាគារភ្លាម សម្រាប់ចំណាយផ្សេងៗ ដូចជា ការធ្វើតេស្តរកជំងឺកូវីដ-១៩ និងការធ្វើចត្តាឡីស័ក១៤ថ្ងៃ ជាដើម។ 
សម្តេចនាយករដ្ឋមន្ត្រី ហ៊ុន សែន បានពិចារណាឡើងវិញ ហើយយល់ឃើញថា វិធានការនេះ តឹងរឹងពេក និងមានហានិភ័យខ្ពស់ សម្រាប់សេដ្ឋកិច្ចកម្ពុជា ព្រោះវា បានប៉ះពាល់ដល់អ្នកវិនិយោគ អ្នកជំនាញ និង អ្នកបច្ចេកទេសបរទេស។ តាមរយៈសំឡេងបែកធ្លាយ ដែលត្រូវបានចែករំលែកតៗគ្នាតាមបណ្តាញសង្គម គេ ឮសម្តេចនាយករដ្ឋមន្ត្រី ដាក់បញ្ជាទៅលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច ឲ្យដឹកនាំបើកកិច្ចប្រជុំមួយជាបន្ទាន់ ដើម្បីលុបវិធានការនេះ ចេញពីអ្នកវិនិយោគ អ្នកជំនាញ និង អ្នកបច្ចេកទេសបរទេស។
សម្តេច មើលឃើញថា ការកំណត់ឲ្យមានធានារ៉ាប់រងតម្លៃ៥ម៉ឺនដុល្លារ និងត្រូវតម្កល់ប្រាក់៣ពាន់ដុល្លារទៀតក្នុងធនាគារ គឺធ្វើអ្នកវិនិយោគ អ្នកជំនាញ និង អ្នកបច្ចេកទេសបរទេស ដែលកំពុងមានវត្តមាននិងធ្វើការនៅកម្ពុជា មិនអាចចេញពីកម្ពុជា ទៅលេងប្រទេសរបស់ពួកគេ ព្រោះបើចាកចេញ គឺពួកគេ ត្រូវមានធានារ៉ាប់រងតម្លៃ៥ម៉ឺនដុល្លារ និងត្រូវតម្កល់ប្រាក់៣ពាន់ដុល្លារ ក្នុងធនាគារ ពេលត្រឡប់មកកម្ពុជាវិញ។
សម្តេច មើលឃើញទៀតថា បើពួកគេ ចេញពីកម្ពុជាមែន ពួកគេ អាចនឹងមិនវិលត្រឡប់មកវិញតែម្តង ព្រោះពួគេ មិនចង់ឬមិនមានលទ្ធភាព ទិញធានារ៉ាប់រងតម្លៃ៥ម៉ឺនដុល្លារ និងត្រូវតម្កល់ប្រាក់៣ពាន់ដុល្លារ ក្នុងធនាគារថែមទៀត។
ប្រមុខរដ្ឋាភិបាល លើកឡើងថា កម្ពុជា មានកិច្ចសន្យាច្រើនណាស់ជាមួយបរទេស ពិសេស ជប៉ុន និង ចិន ក្នុងការសាងសង់ហេដ្ឋារចនាសម្ព័ន្ធនានា ដូចជា ផ្លូវនិងស្ពាន ជាដើម ដូច្នេះ បើទោះបីជាថៅកែ ក៏មិនអាចមានលទ្ធភាពជួយទិញធានារ៉ាប់រងតម្លៃ៥ម៉ឺនដុល្លារ ឲ្យអ្នកជំនាញឬអ្នកបច្ចេកទេសរបស់ពួកគេឲ្យគ្រប់គ្នាដែរ។
លើសពីនេះ អ្វីដែលប្រមុខរដ្ឋាភិបាល រឹតតែបារម្ភនោះ គឺអ្នកវិនិយោគថ្មី នឹងមិនមកកម្ពុជាឡើយ ដោយសារតែតម្រូវឲ្យពួកគេ ទិញធានារ៉ាប់រងតម្លៃ៥ម៉ឺនដុល្លារ និងត្រូវតម្កល់ប្រាក់៣ពាន់ដុល្លារចូលក្នុងធនាគារ។
ដោយសំអាងលើហេតុផលទាំងនេះ ប្រមុខរដ្ឋាភិបាល វាយតម្លៃថា កម្ពុជា មិនអាចអនុវត្តវិធានការនេះ លើជនបរទេសប៉ុន្មានប្រភេទនេះបានឡើយ រួមមាន អ្នកវិនិយោគ អ្នកជំនាញ និង អ្នកបច្ចេកទេស។
មេដឹកនាំកម្ពុជា លើកចំណុចវិជ្ជមានថា ការបន្ធូរបន្ថយវិធានការ ដោយលែងតម្រូវឲ្យមានធានារ៉ាប់រងតម្លៃ៥ម៉ឺនដុល្លារ និងលែងតម្រូវឲ្យតម្កល់ប្រាក់៣ពាន់ដុល្លារចូលទៅក្នុងធនាគារ ដើម្បីទាក់ទាញអ្នកវិនិយោគ។ មេដឹកនាំកម្ពុជា មានប្រសាសន៍ដូច្នេះថា៖«...[យើងត្រូវ] រក្សា [អ្នក] វិនិយោគចាស់ បន្ថែម [អ្នក] វិនិយោគថ្មី...»។
ថ្នាក់ដឹកនាំកម្ពុជា សំដៅតែទៅលើជនបរទេសជាអ្នកវិនិយោគ អ្នកជំនាញ និង អ្នកបច្ចេកទេសប៉ុណ្ណោះ ដែលអាចនឹងទទួលបានការលើកលែងនេះ។ ដូច្នេះ ជនបរទេសផ្សេងទៀត ដែលមកកម្ពុជា គឺនៅតែតម្រូវឲ្យមានធានារ៉ាប់រងតម្លៃ៥ម៉ឺនដុល្លារ និងត្រូវតម្កល់ប្រាក់៣ពាន់ដុល្លារចូលក្នុងធនាគារដដែល។
ម្យ៉ាងទៀត បើស្តាប់ប្រសាសន៍របស់ប្រមុខរដ្ឋាភិបាលកម្ពុជា អ្នកវិនិយោគ អ្នកជំនាញ និង បច្ចេកទេសបរទេស អាចលែងតម្រូវឲ្យមានធានារ៉ាប់រងតម្លៃ៥ម៉ឺនដុល្លារ និងអាចលែងតម្រូវឲ្យតម្កល់ប្រាក់៣ពាន់ដុល្លារចូលក្នុងធនាគារ តែពួកគេ នៅតែចេញថ្លៃខ្លួនឯង ក្នុងការធ្វើតេស្តរកជំងឺកូវីដ-១៩ និង ការព្យាបាល ជាដើម បើពួកគេ មានជំងឺនេះ។
យ៉ាងណាក៏ដោយ អនុសាសន៍របស់ប្រមុខរដ្ឋាភិបាលខាងលើ មិនទាន់ដាក់ឲ្យអនុវត្តឡើយ ដោយត្រូវឆ្លងកាត់កិច្ចប្រជុំជាផ្លូវការ ដែលដឹកនាំដោយលោក អូន ព័ន្ធមុនីរ័ត្ន ជាមុនសិន។
សូមបញ្ជាក់ថា មកដល់ថ្ងៃទី១១ ខែកក្កដា ឆ្នាំ២០២០ កម្ពុជា រកឃើញអ្នកឆ្លងជំងឺកូវីដ-១៩ ១៤១នាក់ តែបានជាសះស្បើយ១៣៣នាក់ហើយ ដោយនៅសល់៨នាក់ទៀត កំពុងសម្រាកព្យាបាល៕
Tag:
COVID-19
ហ៊ុន សែន
© រក្សាសិទ្ធិដោយ thmeythmey.com
