ពានសម្តេច ហ៊ុន សែន ថ្នាក់ខេត្ត៖ ជំនួបថ្ងៃនេះ ព្រៃវែង និងត្បូងឃ្មុំ សុទ្ធតែមានប្រៀបលើគូប្រជែង

កីឡាជាតិ

ជាតិ

ពានសម្តេច ហ៊ុន សែន ថ្នាក់ខេត្ត៖ ជំនួបថ្ងៃនេះ ព្រៃវែង និងត្បូងឃ្មុំ សុទ្ធតែមានប្រៀបលើគូប្រជែង

22, Jul 2020 , 7:59 am

រូបភាព

សកម្មភាពប្រកួតរវាងក្រុមសៀមរាប(អាវក្រហម)ជាមួយព្រៃវែងនៅជើងទី១, រូបភាពផ្តល់ដោយ CNCC

ដោយ:

ក្រុមព្រៃវែង និងត្បូងឃ្មុំ ត្រូវការលទ្ធផលត្រឹមស្មើប៉ុណ្ណោះ សម្រាប់ជំនួបជើងទី២នៅរសៀលថ្ងៃទី២២ ខែកក្កដា ឆ្នាំ២០២០ នេះ ដើម្បីធានាកៅអីឡើងទៅប្រកួតនៅវគ្គផ្តាច់ព្រ័ត្រពានរង្វាន់សម្តេច ហ៊ុន សែន ថ្នាក់ខេត្ត។ ការទាមទារបែបនេះ ធ្វើឡើងបន្ទាប់ពីក្រុមទាំងពីរបានយកឈ្នះគូប្រកួតរៀងៗខ្លួននៅជើងទី១។

ក្រោយយកឈ្នះគូប្រកួតរៀងៗខ្លួននៅជើងទី១ ក្នុងនោះព្រៃវែងយកឈ្នះសៀមរាប ២-០ និងត្បូងឃ្មុំយកឈ្នះកែប ២-១ ធ្វើឲ្យក្រុមទាំងពីរហាក់មានភាគរយខ្ពស់ក្នុងការឈានទៅវគ្គបន្ត។ ក្រុមព្រៃវែងត្រូវបើកទ្វារកីឡដ្ឋានខ្លួន ទទួលភ្ញៀវសៀមរាប សម្រាប់ជំនួបជើងទីពីរពានរង្វាន់សម្តេច ហ៊ុន សែន នៅម៉ោង៣រសៀលថ្ងៃទី២២ កក្កដា នេះ។ ព្រៃវែងទាមទារត្រឹមស្មើ ខណៈសៀមរាបត្រូវការឈ្នះលើសពីរគ្រាប់ ក្នុងការធានាកៅអីឡើងទៅវគ្គផ្តាច់ព្រ័ត្រ។

នៅម៉ោង៣រសៀលថ្ងៃពុធនេះដែរ ក្រុមកែបត្រូវបើកទ្វារកីឡដ្ឋានខេត្តកែប ស្វាគមន៍ក្រុមការពារតំណែងជើងឯកត្បូងឃ្មុំ។ កែបត្រូវការធ្ងន់បន្តិចថ្ងៃនេះ ដោយពួកគេត្រូវការជ័យជម្នះជាចាំបាច់។ ដើម្បីអាចឈានទៅវគ្គផ្តាច់ព្រ័ត្របានកែបត្រូវការឈ្នះត្បូងឃ្មុំលើសពីមួយគ្រាប់ ខណៈត្បូងឃ្មុំត្រូវការត្រឹមស្មើប៉ុណ្ណោះ។

វាមិនមែនជារឿងងាយស្រួលសម្រាប់កែបក្នុងការយកឈ្នះនោះឡើយ ដ្បិតត្បូងឃ្មុំជាក្រុមមានសមត្ថភាពខ្លាំងមួយ ហើយពួកគេជាក្រុមជើងឯកឆ្នាំចាស់។ តែយ៉ាងណា ត្បូងឃ្មុំ ក៏មិនប្រាកដថា អាចយកឈ្នះកែបជាលើកទីពីរដែរ ព្រោះជំនួបជើងទីពីរនេះធ្វើឡើងនៅលើទឹកដីខេត្តកែប។ បើយើងមើលទៅលើលទ្ធផលក្នុងជើងទី១នៅលើទឹកដីត្បូងឃ្មុំ គឺក្រុមនេះយកឈ្នះកែបតែ១គ្រាប់ប៉ុណ្ណោះ។

ការប្រកួតទាំងពីរគូនៅថ្ងៃនេះ នឹងក្លាយជាការប្រកួតដ៏ទាក់ទាញ និងស្វិតស្វាញបំផុត ដ្បិតក្រុមទាំង៤សុទ្ធតែត្រូវការឈ្នះរៀងៗ ហើយវាជាការប្រកួតចុងក្រោយក្នុងការប្រជែងដណ្តើមកៅអីឡើងទៅវគ្គផ្តាច់ព្រ័ត្រពានរង្វាន់សម្តេច ហ៊ុន សែន៕