ជាតិ
មន្ទីរពេទ្យ៥នៅភ្នំពេញ ទទួលបានម៉ាស៊ីនផលិតទឹកសុទ្ធដែលផលិតបាន៨០០លីត្រក្នុង១ថ្ងៃពីនាយករដ្ឋមន្ត្រី ម៉ាស៊ីនផលិតទឹកបរិសុទ្ធនៅខាងស្ដាំដៃ (រូបពីទំព័រហ្វេសប៊ុករបស់ សម្ដេច ហ៊ុន សែន)
× ភ្នំពេញ៖ សម្ដេចនាយករដ្ឋមន្រី្ត ហ៊ុន សែន បានផ្ដល់ម៉ាស៊ីនផលិតទឹកបរិសុទ្ធ៥គ្រឿងដែលអាចផលិតទឹកបាន៨០០លីត្រក្នុងមួយថ្ងៃ ដល់មន្ទីរពេទ្យ៥កន្លែងនៅក្នុងរាជធានីភ្នំពេញ។
ការផ្ដល់ម៉ាស៊ីនផលិតទឹកបរិសុទ្ធនេះ គឺសម្រាប់តម្រូវការរបស់មន្ទីរពេទ្យនិងពលរដ្ឋដែលសម្រាកព្យាបាលនៅមន្ទីរពេទ្យបានប្រើប្រាស់ទឹកស្អាត។ នេះបើតាមការបញ្ជាក់របស់ សម្ដេច ហ៊ុន សែន នៅលើទំព័រហ្វេសប៊ុកនៅថ្ងៃទី២៨ កក្កដា។
សម្ដេច ហ៊ុន សែន បានសរសេរដូច្នេះថា៖ «ដោយមើលឃើញពីតម្រូវការទឹកស្អាតចាំបាច់បំផុតសម្រាប់មន្ទីរពេទ្យ ជាពិសេសសម្រាប់ពលរដ្ឋនិងអ្នកជំងឺដែលមកសម្រាកព្យាបាលនៅក្នុងមន្ទីរពេទ្យ»។
មន្ទីរពេទ្យដែលទទួលបានម៉ាស៊ីនចម្រោះទឹកស្អាត Watergen (ប្រភេទ Gen-M) បច្ចេកវិទ្យាអ៊ីស្រាអែល នោះរួមមាន មន្ទីរពេទ្យគន្ធបុប្ផា មន្ទីរពេទ្យកាល់ម៉ែត មន្ទីរពេទ្យមិត្តភាពកម្ពុជា-ចិន ព្រះកុសុមៈ មន្ទីរពេទ្យមិត្តភាពខ្មែរ-សូវៀត និងកាកបាទក្រហមកម្ពុជា។
នៅថ្ងៃ២៨កក្កដានេះ លោក ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានចុះប្រគល់ម៉ាស៊ីនផលិតទឹកបរិសុទ្ធដល់ខាងមន្ទីរពេទ្យដើម្បីយកទៅប្រើប្រាស់។ ក្រៅពីផ្ដល់ម៉ាស៊ីនផលិតទឹកបរិសុទ្ធ សម្ដេច ក៏បានផ្ដល់រថយន្តចល័តនិងម៉ាស៊ីងភ្លើងមួយឈុតដល់កាកបាទក្រហម ក្នុងការធ្វើសកម្មភាពមនុស្សធម៌នៅតាមមជ្ឈដ្ឋានទីសាធារណៈ ដែលអាចនឹងជួបគ្រោះរាំងស្ងួតឬមានតម្រូវការប្រើប្រាស់ចាំបាច់បន្ថែម៕
Tag:
ទឹកបរិសុទ្ធ
មន្ទីរពេទ្យ
© រក្សាសិទ្ធិដោយ thmeythmey.com