ជាតិ
រដ្ឋមន្ត្រីមហាផ្ទៃ រំលឹកអភិបាលរាជធានី-ខេត្ត ឲ្យពង្រឹងវិធានការទប់ស្កាត់កូវីដ-១៩ នៅថ្ងៃឈប់សម្រាក
រូបតំណាង៖ ពលរដ្ឋដើរលេងកម្សាន្តនៅអំឡុងពេលចូលឆ្នាំខ្មែរ
×![]()
ដោយ: ឡាយ សុភាវតី
ភ្នំពេញ៖ សម្ដេច ស ខេង រដ្ឋមន្ត្រីក្រសួងមហាផ្ទៃ បានក្រើនរំលឹកដល់អភិបាលរាជធានី-ខេត្តទាំងអស់ ឲ្យពង្រឹងវិធានការពារសន្តិសុខនិងវិធានការទប់ស្កាត់កូវីដ-១៩ តាមសហគមន៍ នៅថ្ងៃសម្រាករយៈពេល៥ថ្ងៃ ពីថ្ងៃទី១៧ដល់ថ្ងៃទី២១ ខែកក្កដា ខាងមុខ។ នេះបើតាមលិខិតដែលចេញដោយសម្ដេច ស ខេង នៅថ្ងៃទី២៧ ខែកក្កដា។ 
សម្តេច ស ខេង សរសេរក្នុងលិខិតថា វិធានការដែលត្រូវពង្រឹង គឺ សន្តិសុខ សណ្ដាប់ធ្នាប់ គម្លាតសង្គម អនាម័យ វាស់កម្ដៅ ដោយផ្ដោតនៅតាមផ្សារ ភោជនីយដ្ឋាន រមណីយដ្ឋាន សណ្ឋាគារ និង ផ្ទះសំណាក់ ជាដើម។
ដើម្បីរក្សាការពារសន្តិសុខ និងទប់ស្កាត់ការឆ្លងជំងឺកូវីដ-១៩ នៅថ្ងៃឈប់សម្រាកខាងមុខ សម្ដេចរដ្ឋមន្ត្រី បានឲ្យអភិបាលរាជធានី-ខេត្ត ពង្រឹងសន្តិសុខ សណ្ដាប់ធ្នាប់សាធារណៈ សម្រាប់ឆ្លើយតបតម្រូវការរបស់ពលរដ្ឋឲ្យទាន់ពេលវេលា និងវិធានការទប់ស្កាត់ការរីករាលដាលកូវីដ-១៩។ លើសពីនេះ អភិបាលខេត្តត្រូវណែនាំឲ្យម្ចាស់សណ្ឋាគារ ផ្ទះសំណាក់ រមណីយដ្ឋាន អាហារដ្ឋាន ផ្សារលក់ទំនិញ ត្រៀមលក្ខណសម្បត្តិក្នុងទទួលភ្ញៀវទេសចរ ដែលតម្រូវឲ្យមានទឹកអាល់កុលឬជែលលាងដៃ វាស់កម្ដៅ និងរក្សាគម្លាតសុវត្ថិភាពដល់អតិថិជន។
ជាមួយគ្នានេះដែរ រដ្ឋមន្រី្តមហាផ្ទៃ បានណែនាំឲ្យជំរុញអាជ្ញាធរមូលដ្ឋាន ឲ្យផ្សព្វផ្សាយដល់ពលររដ្ឋតាមមូលដ្ឋានពីការបង្កើនការប្រុងប្រយ័ត្នការពារខ្លួនពីជំងឺកូវីដ-១៩ ដោយគោរពតាមគោលការរក្សាអនាម័យនិងគម្លាតសុវត្ថិភាព។
ចំណែក លោក ម៉ម ប៊ុនហេង រដ្ឋមន្ត្រីក្រសួងសុខាភិបាល កាលពីថ្ងៃទី២៧ ខែកក្កដានេះ ក៏បានចេញលិខិតទៅកាន់រដ្ឋមន្ត្រីក្រសួងសាធារណការ និងដឹកជញ្ជូន រដ្ឋមន្ត្រីក្រសួងទេសចរណ៍ និងអភិបាលរាជធានី-ខេត្តផងដែរ ដើម្បីស្នើឲ្យចូលរួមអនុវត្តវិធានការរបស់ក្រសួងសុខាភិបាល ក្នុងការការពារជំងឺកូវីដ-១៩។
relate 93751
ចំពោះការធ្វើដំណើរ ពលរដ្ឋទាំងអស់ ត្រូវជៀសវាងការប្រើប្រាស់មធ្យោបាយសាធារណៈ ដែលផ្ទុកមនុស្សច្រើន។ បើករណីចាំបាច់ ក្នុងការធ្វើដំណើរ ត្រូវពាក់ម៉ាស់ ដាក់ទឹកអាល់កុលឬជែលលាងដៃតាមខ្លួន ហើយរក្សាគម្លាតពីគ្នាយ៉ាងតិច១ម៉ែត្រកន្លះ។ រីឯ ម្ចាស់យានយន្តត្រូវ ត្រូវរៀបចំរថយន្តឲ្យមានខ្យល់ចេញចូល ជៀសវាងប្រើម៉ាស៊ីនត្រជាក់ និងលាងសម្អាត់រថយន្តឲ្យបានជាប្រចាំ៕
Tag:
កូវីដ-១៩
© រក្សាសិទ្ធិដោយ thmeythmey.com
