អាជ្ញាធរ រុះរើខ្ទមជាង៤០ ដែលសង់ខុសច្បាប់នៅតំបន់អូរត្រាវ ខេត្តព្រះសីហនុ

ជាតិ

អាជ្ញាធរ រុះរើខ្ទមជាង៤០ ដែលសង់ខុសច្បាប់នៅតំបន់អូរត្រាវ ខេត្តព្រះសីហនុ

30, Jul 2020 , 10:59 pm

រូបភាព

សកម្មភាពអាជ្ញាធរចុះរុះរើខ្ទមរបស់ពលរដ្ឋដែលសង់លើដីកម្មសិទ្ធឯកជន (រូបពីមន្ទីរបរិស្ថានខេត្តព្រះសីហនុ)

ដោយ: ឡាយ សុភាវតី

ភ្នំពេញ៖ អាជ្ញាធរខេត្តព្រះសីហនុ ចុះរុះរើខ្ទម៤៣ខ្ទម និងបំផ្លាញបកូនឈើទើបដាំថ្មីៗជាច្រើនដើម នៅលើដីកម្មសិទ្ធឯកជន និងមិនស្ដាប់តាមការណែនាំរបស់អាជ្ញាធរ។ នេះបើតាមសេចក្ដីប្រកាសព័ត៌មានរបស់ក្រសួងបរិស្ថានថ្ងៃទី២៧កក្កដា។

គណៈបញ្ជាការឯកភាពខេត្តព្រះសីហនុនិងមន្ត្រីឧទ្យានុរក្សានៃមន្ទីរបរិស្ថានខេត្ត បានចុះអនុវត្តវិធានការរដ្ឋបាលរុះរើខ្ទម៤៣ខ្នង រួមទាំងដកកូនស្វាយជាច្រើនដើមនៅតំបន់អូរត្រាវ សង្កាត់លេខ១ ក្រុងព្រះសីហនុ បន្ទាប់ពីម្ចាស់ខ្ទមសន្យាជាមួយអាជ្ញាធរថានឹងរុះរើដោយខ្លួនឯង ហើយមិនឃើញមានការរុះរើ។ អាជ្ញាធរ ចាត់ទុក ខ្ទមនិងកូនឈើទាំងនោះ ថាជារបស់ក្រុមអនាធិបតេយ្យ។

កន្លងមកអាជ្ញាធរខេត្តឃើញប្រជាពលរដ្ឋមួយក្រុមសាងសង់ទីជម្រកអនាធិបតេយ្យនៅដីកម្មសិទ្ធិឯកជនមួយកន្លែង ប៉ុន្តែត្រូវបានម្ចាស់ដីបណ្ដេញចេញហើយក៏ទៅតាំងទីលំនៅសង្កាត់លេខ១ ក្រុងព្រះសីហនុ។ បន្ទាប់មកកាលពីថ្ងៃទី១៤កក្កដា អាជ្ញាធរខេត្តក៏ចុះអប់រំនិងណែនាំឲ្យរុះរើចេញ។ ជាមួយគ្នានេះដែរ ក្រុមដែលសង់ខ្ទមទាំងនោះ ក៏បានសុំរុះរើដោយខ្លួនឯង។

លុះដល់ថ្ងៃទី១៧កក្កដា អាជ្ញាធរបានចុះពិនិត្យមិនឃើញមានការរុះរើឡើយ ហើយថែមទាំងបានសាងសង់ផ្ទះនិងខ្ទមបន្ថែមទៀត។ ទើបដល់ថ្ងៃទី២៧កក្កដា ក្រុមអាជ្ញាធរចុះអនុវត្តវិធានការរដ្ឋបាល រុះរើខ្ទម៤៣ខ្ទមនិងបំផ្លាញកូនឈើថ្មីៗជាច្រើនដើមតែម្ដង៕