COVID-19
ជាតិ
សង្គមជាតិ
ក្រសួងសុខាភិបាល និងប្រៃសណីយ៍ បង្កើតប្រព័ន្ធឆ្លើយតបស្វ័យប្រវត្តិពីចម្ងល់នៃកូវីដ-១៩ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងមន្ត្រីពាក់ព័ន្ធផ្សេងៗទៀត
× ភ្នំពេញ៖ ក្រសួងសុខាភិបាល និងក្រសួងប្រៃសណីយ៍ និងទូរគមនាគមន៍ បានរួមគ្នាកែប្រែ និងដាក់ដំណើរការប្រព័ន្ធទូរស័ព្ទ១១៥ថ្មី ដែលអាចឆ្លើយតបដោយស្វ័យប្រវត្តិទាក់ទងនឹងការចោទសួរអំពីចម្ងល់ផ្សេងៗទាក់ទងនឹងជំងឺកូវីដ-១៩។
លោក មាស ប៉ូ អ្នកនាំពាក្យនៃក្រសួងប្រៃសណីយ៍ និងទូរគមនាគមន៍ បានបញ្ជាក់ប្រាប់អ្នកសារព័ត៌មានថ្មីៗតាមទូរស័ព្ទថា ប្រព័ន្ធឆ្លើយតបដោយស្វ័យប្រវត្តិនេះ នឹងជួយសម្រួលដល់ពលរដ្ឋអាចខលចូលសួរអំពីការសង្ស័យនៃជំងឺកូវីដ-១៩ បានទាន់ពេលវេលា និងអាចទប់ស្កាត់ជំងឺកូវីដ-១៩ប្រកបដោយសុវត្ថិភាព និងប្រសិទ្ធភាព។
លោក មាស ប៉ូ បានពន្យល់អំពីវិធីប្រើប្រាស់ដូច្នេះថា៖«បើយើងខលទៅ១១៥ ដោយអត់មានអ្នកទទួលទេ ដោយសារលេខហ្នឹងជាប់សន្ទនាជាមួយអ្នកផ្សេងមុនហើយ។ អ៊ីចឹងលេខទូរស័ព្ទរបស់យើងនឹងចូលទៅក្នុងប្រព័ន្ធសារជាសំឡេង ដូច្នេះសារហ្នឹងឆ្លើយភ្លាម ហើយនឹងសួរសំណួរទៅយើងភ្លាម ដោយសួរយើងថាមានបញ្ហាអ្វីទេ។ ដូច្នេះយើងអាចឆ្លើយឆ្លងជាមួយសារនោះភ្លាម។ ឧទាហរណ៍ថាយើងអត់ស្រួលខ្លួនទេ ដូចជាក្អក។ បើយើងក្អក យើងចុចតាមសារសំឡេងដែលគេណែនាំ ឬឆ្លើយទៅតាមសំណួរដែលគេចោទសួរហ្នឹង»។
បើតាមលោក មាស ប៉ូ ប្រព័ន្ធឆ្លើយតបស្វ័យប្រវត្តិនេះក៏សម្រួលក្នុងការប្រមូលព័ត៌មានទាក់ទងនឹងស្ថានភាពសុខភាពរបស់អ្នកចត្តាឡីស័កផងដែរ។ លោក និយាយដូច្នេះថា៖«ប្រព័ន្ធនោះយើងអាចគ្រប់គ្រងអ្នកចត្តាឡីស័ក និងទទួលបានទិន្នន័យនៃអ្នកធ្វើចត្តាឡីស័ក១៤ថ្ងៃ ដោយដឹងថាគាត់នៅឯណា សុខភាពគាត់មានការប្រែប្រួលបែបណា គឺយើងអាចដឹងទាំងអស់ ដោយសារយើងបានទទួលការខលរបស់គាត់»។
គិតត្រឹមថ្ងៃទី៣១កក្កដា កម្ពុជាមានអ្នកឆ្លងកូវីដ-១៩ សរុប ២៣៤នាក់។ ក្នុងនោះ មាន១៦៤នាក់ បានជាសះស្បើយ ដែលស្មើនឹងជាង៧០ភាគរយនៃចំនួនសរុប។ ដោយឡែកអ្នកជំងឺកូវីដ នៅសល់៧០នាក់ទៀត កំពុងសម្រាកព្យាបាលបន្ត៕
© រក្សាសិទ្ធិដោយ thmeythmey.com