COVID-19
ជាតិ
COVID-19៖ ៥ករណីទៀតនៅកម្ពុជា មានខ្មែរ៤នាក់មកពីប៉ាគីស្ថាន និងជនជាតិឥណ្ឌូណេស៊ីម្នាក់
×![]()
ក្រសួងសុខាភិបាលនាព្រឹកនេះ បានប្រកាសពីការរកឃើញអ្នកឆ្លង COVID-19 ចំនួន៥ករណីទៀត ដែលក្នុងនោះមានពលរដ្ឋខ្មែរ៤នាក់ដែលជាអ្នកដំណើរមកពីប៉ាគីស្ថាន និងជនជាតិឥណ្ឌូណេស៊ី១នាក់មកពីឥណ្ឌូណេស៊ី។ កម្ពុជាកើនអ្នកជំងឺសរុបឡើងដល់២៣៩នាក់ និងសះស្បើយ១៦៤នាក់។
តាមសេចក្តីជូនព័ត៌មាន បុរសជនជាតិខ្មែរ៤នាក់ត្រូវបានដាក់ឲ្យសម្រាកព្យាបាលនៅមណ្ឌលសុខភាពចាក់អង្រែ។ ពួកគាត់ស្ថិតក្នុងចំណោមអ្នកដំណើរ១២០នាក់ (ខ្មែរ៨០នាក់) ដែលទើបមកពីប៉ាគីស្ថាន បន្តជើងហោះហើរនៅម៉ាឡេស៊ី ហើយមកដល់កម្ពុជានៅថ្ងៃទី៣១ ខែកក្កដា។ ហើយអ្នករួមដំណើរ ១១៦ ដែលមានលទ្ធផលតេស្ត អវិជ្ជមាន ត្រូវបានដាក់ចត្តាឡីស័កចំនួន១៤ថ្ងៃ នៅបុរី១០០ខ្នង និងសណ្ឋាគារមួយនៅភ្នំពេញ។
រីឯបុរសឥណ្ឌូណេស៊ីអាយុ១៨ឆ្នាំ ដែលត្រូវដាក់ឲ្យសម្រាកព្យាបាលនៅមណ្ឌលសុខភាពចាក់អង្រែផងដែរនោះ ទើបមកពីឥណ្ឌូណេស៊ី ឆ្លងកាត់ម៉ាឡេស៊ី ហើយមកដល់កម្ពុជាជាមួយអ្នកដំណើរ១២០នាក់ទៀត។ ហើយអ្នកដំណើរ១២០នាក់ ដែលមានលទ្ធផលអវិជ្ជមាន ត្រូវបានធ្វើចត្តាឡីស័កចំនួន១៤ថ្ងៃ នៅអនុវិទ្យាល័យពោធិ៍ចិនតុង និងសណ្ឋាគារមួយនៅភ្នំពេញ។
សូមជម្រាបថា កម្ពុជាមានអ្នកឆ្លងជំងឺកូវីដ -១៩ ចំនួន ២៣៩ នាក់ ក្នុងនោះមាន១៦៤នាក់ ជាសះស្បើយ។ អ្នកសម្រាកព្យាបាលនៅក្នុងមន្ទីរពេទ្យរដ្ឋ ចំនួន៧៣នាក់ និងអ្នកសម្រាកនៅបន្ទប់ដាច់ដោយឡែកក្នុងស្ថានទូតអាមេរិក ចំនួន២នាក់៕
© រក្សាសិទ្ធិដោយ thmeythmey.com
