សង្គមអន្តរជាតិ
អន្តរជាតិ
បុរសចិនម្នាក់ត្រូវតុលាការរកឃើញថាគ្មានទោសវិញ ក្រោយជាប់គុកអស់២៧ឆ្នាំ លោក Zhang Yuhuan (ឆ្វេង) យំឱបកូនប្រុសនៅផ្ទះលោក ក្នុងខេត្ត Jiangxi នៅថ្ងៃទី ៤ ខែសីហា ២០២០ ក្រោយត្រូវបានតុលាការរកឃើញថាគ្មានទោសវិញ បន្ទាប់ជាប់២៧ឆ្នាំក្នុងគុករួច (China Daily)
× បុរសចិនម្នាក់ ត្រូវបានតុលាការប្រកាសថាគ្មានទោសកំហុសក្នុងបទឧក្រិដ្ឋឃាតកម្មវិញ ក្រោយរូបគេបានចំណាយពេលក្នុងគុកអស់២៧ឆ្នាំរួចហើយនោះ។ តុលាការសុំទោស តែបុរសរូបនេះប្រកាសជំហរប្ដឹងទារសំណង។
លោក Zhang Yuhuan អាយុ ៥២ឆ្នាំ ត្រូវបានជាប់គុកដោយសារសម្លាប់ក្មេងប្រុស២នាក់ ក្នុងឆ្នាំ១៩៩៣។ ក៏ប៉ុន្តែលោកនៅបន្តអះអាងថា លោកត្រូវបានធ្វើទារុណកម្មដោយប៉ូលិស និងត្រូវបានបង្ខំឲ្យសារភាពទោសកំហុស។
បន្ទាប់ពីជាប់គុកអស់ជិត៣០ឆ្នាំ តុលាការជាន់ខ្ពស់ចិន បានប្រកាសនៅថ្ងៃទី ៤ ខែសីហា ថា លោក Zhang គ្មានទោស ដោយលើកឡើងថា គ្មានភស្តុតាងគ្រប់គ្រាន់ដើម្បីគាំទ្រការដាក់ទោសលើលោក។
«ក្រោយយើងបានសើរើឯកសារឡើងវិញ យើងបានរកឃើញថា គ្មានភស្តុតាងដោយផ្ទាល់ណាមួយ ដែលអាចបញ្ជាក់ពីទោសកំហុសរបស់លោក Zhang ឡើយ»។ តុលាការរបស់ប្រជាជនជាន់ខ្ពស់ខេត្តជាំងស៊ី ប្រកាសបែបនេះក្នុងសេចក្តីថ្លែងការណ៍ ដោយបន្ថែមថា៖«ដូច្នេះ លោក Zhang ស្អាតស្អំ»។
យោងតាមការចុះផ្សាយរបស់ទីភ្នាក់ងារព័ត៌មាន Xinhua លោក Zhang គឺជាអ្នកទោសដែលត្រូវបានតុលាការកាត់ទោសខុស ហើយជាប់គុកច្រើនឆ្នាំជាងគេរបស់ប្រទេសចិន។ ម្យ៉ាងទៀត ដំបូងឡើយ បុរសចិនរូបនេះ ត្រូវបានកាត់ទោសប្រហារជីវិត ក្នុងឆ្នាំ១៩៩៥ តែត្រូវប្ដូរទៅជាជាប់គុកពេញមួយជីវិតវិញ ក្រោយជាប់គុក២ឆ្នាំ។
ក្រោយបណ្ដឹងតវ៉ាបរាជ័យជាច្រើនលើក ចុងក្រោយ តុលាការខេត្តជាំងស៊ី កាលខែមីនាកន្លងទៅ បានយល់ព្រមសើរើសំណុំរឿងនេះឡើងវិញ។ បើតាម Xinhua សេចក្ដីថ្លែងការណ៍ខាងលើបន្តថា តុលាការអាចមិនអាចបញ្ជាក់ថា បាវ និងខ្សែដែលត្រូវបានរកឃើញនៅកន្លែងឃាតកម្ម ហើយកំណត់ថាជាឧបករណ៍ក្នុងឧក្រិដ្ឋកម្មនេះ មានជាប់ទាក់ទងនឹងលោក Zhang ឡើយ។
តុលាការបានសុំទោសលោក Zhang ចំពោះការកាត់ទោសខុសនេះ ខណៈមេធាវីរបស់លោក Zhang ប្រាប់កាសែតរដ្ឋចិន China Daily ថា កូនក្តីលោក នឹងប្ដឹងទាមទារសំណង។ លោក Zhang ថា លោកចង់ឲ្យអ្នកដាក់ទោសលោកខុស ដើម្បីឲ្យពួកគេទទួលខុសត្រូវចំពោះទង្វើនេះ៕
Tag:
ចិន
ប្រព័ន្ធតុលាការ
Zhang Yuhuan
© រក្សាសិទ្ធិដោយ thmeythmey.com