PSG ព្រមព្រៀងស្ពនស័រជាមួយក្រុមហ៊ុនអេឡិចត្រូនិកចិន Hisense ទោះមាន COVID-19

COVID-19

កីឡាអន្តរជាតិ

អន្តរជាតិ

PSG ព្រមព្រៀងស្ពនស័រជាមួយក្រុមហ៊ុនអេឡិចត្រូនិកចិន Hisense ទោះមាន COVID-19

11, Aug 2020 , 5:03 pm

រូបភាព

ដោយ: ទេព ពិទូរ្យ

ក្លិបយក្សបារាំង Paris Saint Germain បានចុះហត្ថលេខាលើកិច្ចព្រមព្រៀងឧបត្ថម្ភ (Sponsor) រយៈពេលច្រើនឆ្នាំជាមួយក្រុមហ៊ុនចិន Hisense បើទោះមានបញ្ហាដោយសារ COVID-19 រៀងខ្លួន។ នេះបើតាមការប្រកាសរបស់ក្រុមហ៊ុនអេឡិចត្រូនិក និងឧបករណ៍ប្រើប្រាស់ក្នុងផ្ទះ Hisense នៅថ្ងៃទី១០ ខែសីហា។

កិច្ចព្រមព្រៀងរវាងក្រុមហ៊ុនចិន និងក្លិបម្ចាស់ជើងឯកបារាំង Ligue1 នេះ កើតឡើងនៅពេលដែលក្លិបកីឡាបាល់ទាត់កំពូលៗនៅអឺរ៉ុបដទៃទៀត កំពុងសម្លឹងរកការបង្កើនទីផ្សារនៅប្រទេសចិនដែលអាចឲ្យពួកគេរកចំណូលបានកាន់តែច្រើន។ នេះបើតាមការផ្សាយរបស់ទីភ្នាក់ងារព័ត៌មានចិន Xinhua។

លោក Marc Armstrong នាយកផ្នែកឧបត្ថម្ភរបស់ក្លិប PSG និយាយថា៖« យើងរីករាយក្នុងការស្វាគមន៍ក្រុមហ៊ុន Hisense មកកាន់ក្រុមគ្រួសារ Paris Saint-Germain និងចាប់ផ្តើមភាពជាដៃគូដើម្បីដើរឆ្ពោះទៅមុខជាមួយគ្នា»។

បង្កើតឡើងក្នុងក្រុង Qingdao ខេត្ត Shandong ឆ្នាំ ១៩៦៩ ក្រុមហ៊ុនលំដាប់ពិភពលោក Hisense បានឧបត្ថម្ភដល់ក្រុមកីឡា និងព្រឹត្តិការណ៍កីឡាធំៗជាច្រើនក្នុងប៉ុន្មានឆ្នាំចុងក្រោយ ដូចជាក្រុម Red Bull Racing នៃក្របខណ្ឌ Formula One, ការប្រកួតបាល់ទាត់ពិភពលោក FIFA World Cup ឆ្នាំ ២០១៨, Euro ឆ្នាំ ២០១៦ និងកីឡាវាយកូនបាល់អូស្ត្រាលី Australian Open ជាដើម។

PSG ទទួលបានជោគជ័យយ៉ាងខ្លាំងទាំងផ្នែកកីឡា និងពាណិជ្ជកម្មចាប់តាំងពីអ្នកជំនួដែលជាសេដ្ឋីសញ្ជាតិកាតាទិញយកក្លិបនេះក្នុងឆ្នាំ ២០១១។ រយៈពេល៩រដូវកាលចុងក្រោយ ក្លិបយក្សបារាំងមួយនេះឈ្នះពានរង្វាន់សរុបចំនួន១៨ ក្នុងនោះពាន Ligue 1 បារាំងចំនួន៧សម័យ។

Paris Saint-Germain ក៏នឹងត្រូវប្រជែងពានអឺរ៉ុបរដូវកាលនេះ ដោយត្រូវតតាំងជាមួយក្រុម Atalanta ក្នុងការប្រកួតក្របខណ្ឌ Champions League វគ្គ៨ក្រុមផងដែរ។ នៅវគ្គ៨ក្រុមនេះ តម្រូវឲ្យក្រុមប្រកួតតែ១ជើងប៉ុណ្ណោះនៅទឹកដីកណ្តាលក្នុងប្រទេសព័រទុយហ្គាល់ ដ្បិតមានបញ្ហាដោយសារជំងឺឆ្លង COVID-19។ ក្រុមពីរនេះ នឹងត្រូវជួបគ្នានារាត្រីថ្ងៃទី១២ ខែសីហា វេលាម៉ោង ២:០០នាទីអាធ្រាត្រ [ម៉ោងនៅកម្ពុជា]៕