អន្តរជាតិ
មានករណីបាញ់នៅក្រៅសេតវិមាន ខណៈលោក ត្រាំ កំពុងធ្វើសន្និសីទព័ត៌មាន ប្រធានាធិបតី ដូណាល់ ត្រាំ ត្រូវបានអង្គរក្សហែហមចេញពីបន្ទប់សន្និសីទព័ត៌មានរបស់សេតវិមានអាមេរិក នៅថ្ងៃទី ១០ ខែសីហា (AFP)
× ប្រធានាធិបតី ដូណាល់ ត្រាំ ត្រូវបានអង្គរក្សអញ្ជើញចេញពីបន្ទប់សន្និសីទព័ត៌មានរបស់សេតវិមានអាមេរិក នៅថ្ងៃទី ១០ ខែសីហា ភ្លាមៗក្រោយមានករណីបាញ់មួយកើតឡើងនៅក្រៅអគារនេះ។ ប៉ុន្មាននាទីក្រោយមក លោក ត្រាំ ត្រលប់មកវិញ ហើយបញ្ជាក់ពីហេតុការណ៍នេះ ។
«វាមានករណីបាញ់មួយនៅក្រៅបរិវេណសេតវិមានអាមេរិក»។ លោក ដូណាល់ ត្រាំ និយាយដូច្នេះប្រាប់អ្នកសារព័ត៌មាន ដោយបន្តថា យ៉ាងណា ហេតុការណ៍នេះស្ថិតក្រោមការគ្រប់គ្រងយ៉ាងល្អ។
លោកប្រធានាធិបតី ត្រាំ បញ្ជាក់ទៀតថា ជនសង្ស័យដែលមានប្រដាប់ដោយកាំភ្លើងម្នាក់ ត្រូវបានបាញ់ដោយកម្លាំងសន្តិសុខសម្ងាតដែលការពារសេតវិមាន ហើយរូបគេត្រូវបានបញ្ជូនទៅកាន់មន្ទីរពេទ្យហើយ។ លោក ត្រាំ ក៏បានលើកសរសើរការឆ្លើយតបយ៉ាងលឿនរហ័សនិងមានប្រសិទ្ធភាពរបស់កងអង្គរក្សប្រធានាធិបតី។
ម្យ៉ាងវិញទៀត លោកអះអាងទៀតថា លោកមិនច្បាស់ថាជនសង្ស័យមានចេតនាអាក្រក់អ្វីមកលើលោកទេ។ ត្រង់នេះលោកនិយាយដូច្នេះ៖«វា (ការបាញ់) ប្រហែលគ្មានពាក់ព័ន្ធអ្វីជាមួយលោកទេ ព្រោះវាកើតឡើងនៅខាងក្រៅបរិវេណសេតវិមានអាមេរិក»។
ក្រោយហេតុការណ៍ កងអង្គរក្សប្រធានាធិបតីអាមេរិក (USSS) បានសរសេរលើ Twitter ដូច្នេះថា៖«ការស៊ើបអង្កេតលើមន្ត្រីនៃកងអង្គរក្សប្រធានាធិបតីអាមេរិក កំពុងធ្វើឡើង។ បុរសម្នាក់ និងមន្ត្រី USSS ត្រូវបានបញ្ជូនទៅកាន់មន្ទីរពេទ្យ»៕
Tag:
សហរដ្ឋអាមេរិក
ដូណាល់ ត្រាំ
© រក្សាសិទ្ធិដោយ thmeythmey.com