ការប្រកួតបាល់ទាត់ក្របខណ្ឌមិត្តហ្វូនខេមបូឌានលីគនៅថ្ងៃអាទិត្យនេះ មានចំនួន៣គូ ក្នុងនោះយុវជនអាយុក្រោម១៨ឆ្នាំបាទីស្វាគមន៍សូលទីឡូអង្គរ ខណៈអាស៊ីអឺរ៉ុបទទួលបឹងកេត មុនព្រះខ័នរាជស្វាយរៀងតទល់ជាមួយនគរបាលជាតិ។ អង្គរថាយហ្គឺរធ្វើឲ្យណាហ្គាវើលស្គាល់បរាជ័យលើកទីពីរ រីឯកងយោធពលខេមរភូមិន្ទធ្វើឲ្យអ្នកគាំទ្រភ្នំពេញក្រោនខកចិត្ត ខណៈអគ្គិសនីកម្ពុជាចែកគ្នាម្នាក់១ពិន្ទុជាមួយគីរីវង់សុខសែនជ័យ នាការប្រកួតកាលពីថ្ងៃសៅរ៍។
ក្រុមព្រះខ័នរាជស្វាយរៀងត្រូវការឈ្នះនគរបាលជាតិនៅល្ងាចនេះ ដើម្បីបន្តគ្រងកំពូលតារាង និងរក្សាគម្លាតពីការប្រជែងរបស់បឹងកេត។ អ្វីដែលកាន់តែពិសេសទៀតនោះ គឺដើម្បីរក្សាកំណត់ត្រាមិនស្គាល់ចាញ់។ បច្ចុប្បន្នក្រុមមានមូលដ្ឋាននៅខេត្តស្វាយរៀងមួយនេះ ស្ថិតនៅកំពូលតារាងមាន២៨ពិន្ទុ ខណៈនគរបាលជាតិស្ថិតនៅលេខរៀងទី៩មាន៧ពិន្ទុ។
១០ប្រកួតកន្លងមករបស់ព្រះខ័នរាជស្វាយរៀងមិនទាន់ស្គាល់ពាក្យថា បរាជ័យឡើយ ក្នុងនោះក្រុមក្រោមការដឹកនាំរបស់លោក Conor Nester យកឈ្នះ៩ និងស្មើ១។ ចំណែកនគរបាលជាតិទើបស្គាល់ជ័យជម្នះពីរលើកប៉ុណ្ណោះក្នុងចំណោមប្រកួត ក្រៅពីនេះចាញ់ទាំងអស់។ បើវាយតម្លៃតាមរយៈលទ្ធផល គឺព្រះខ័នរាជស្វាយរៀងមានភាគរយឈ្នះខ្ពស់ នាការប្រកួតក្របខណ្ឌមិត្តហ្វូនខេមបូឌានលីគនៅម៉ោង៦ល្ងាចថ្ងៃទី១៦ ខែសីហា ឆ្នាំ២០២០នេះ នៅកីឡដ្ឋានខេត្តស្វាយរៀង។
ចំណែកក្រុមប្រជែងកំពូលតារាងបឹងកេត ត្រូវតទល់ជាមួយអាស៊ីអឺរ៉ុបនៅម៉ោង៣:៣០នាទីរសៀល នាកីឡដ្ឋាន អេ អ៊ី យូ។ បឹងកេតត្រូវការ៣ពិន្ទុនៅថ្ងៃនេះ ដើម្បីរក្សាគម្លាតក្នុងការប្រជែងដណ្តើមកំពូលតារាងជាមួយព្រះខ័នរាជស្វាយរៀង។ ក្រុមឈរលេខ២មាន២៦ពិន្ទុមួយនេះ ក៏ត្រូវការឈ្នះដើម្បីរក្សាកំណត់ត្រាមិនស្គាល់ចាញ់របស់ខ្លួនផងដែរ ខណៈ១០ប្រកួតកន្លងមកឈ្នះ៨ ស្មើ២។ បច្ចុប្បន្នអាស៊ីអឺរ៉ុបស្ថិតនៅលេខរៀងទី១១មាន៧ពិន្ទុ ក្រោយឈ្នះ២ស្មើ១និងចាញ់៧។
នៅម៉ោង៣:៣០នាទីរសៀលនេះដែរ ក្រុមមិនទាន់ស្គាល់ជ័យជម្នះយុវជនអាយុក្រោម១៨ឆ្នាំបាទី ត្រូវតទល់ជាមួយក្រុមសូលទីឡូអង្គរនៅកីឡដ្ឋានមជ្ឈមណ្ឌលសាលាបាល់ទាត់ជាតិបាទី។ ១០ប្រកួតកន្លងមកក្រុមប្រើប្រាស់យុវជនខ្មែរសុទ្ធមួយនេះស្គាល់ស្មើ២លើកនិងចាញ់៨ ខណៈសូលទីឡូអង្គរឈ្នះ១ ស្មើ១ និងចាញ់៨។
សម្រាប់ការប្រកួតនៅថ្ងៃសៅរ៍ ទី១៥ ខែសីហា ឆ្នាំ២០២០ ក្រុមអង្គរថាយហ្គឺរបានធ្វើឲ្យអ្នកគាំទ្រវិស័យកីឡាបាល់ទាត់កម្ពុជាមានការភ្ញាក់ផ្អើល ក្រោយពួកគេបានយកឈ្នះណាហ្គាវើល ២-០ នៅលើទឹកដីខ្លួន។ នេះជាបរាជ័យលើកទីពីររបស់ណាហ្គាវើល បន្ទាប់ពីពួកគេប្រកួតចាញ់ព្រះខ័នរាជស្វាយរៀង ២-០ នាជំនួបសប្តាហ៍ទី១១។
ចំណែកក្រុមកងយោធពលខេមរភូមិន្ទបានធ្វើឲ្យអ្នកគាំទ្រភ្នំពេញក្រោនដែលរំពឹងទទួលបាន៣ពិន្ទុលើទឹកដីខ្លួនរងការខកចិត្ត បន្ទាប់ពីពួកគេបានយកឈ្នះភ្នំពេញក្រោន ៣-២។ នេះជាជ័យជម្នះលើកទី៦របស់ទ័ព តែវាជាបរាជ័យលើកទី២របស់ភ្នំពេញក្រោន។ រីឯក្រុមអគ្គិសនីកម្ពុជាចែកគ្នាម្នាក់១ពិន្ទុជាមួយក្រុមគីរីវង់សុខសែនជ័យ ក្រោយចប់ការប្រកួតពួកគេរក្សាលទ្ធផលស្មើ ២-២៕