«ខ្នងផ្សា» មានទេសភាពស្រស់ស្អាត ខ្យល់អាកាសល្អបរិសុទ្ធ បានធ្វើឲ្យភ្ញៀវទេសចរជាច្រើន ចាប់អារម្មណ៍ងាកមកធ្វើដំណើរកម្សាន្តបែបផ្សងព្រេង ដែលជាសក្ដានុពលទេសចរណ៍ធម្មជាតិផងដែរ។ «ខ្នងផ្សា» ពេលព្រឹក ភ្ញៀវទេសចរអាចទស្សនាព្រះអាទិត្យរះ អមដោយអាកាសធាតុត្រជាក់ និងពលល្ងាច អាចទស្សនាថ្ងៃលិចពីលើខ្នងភ្នំ។

 

អ្នកទេសចរ ស្គាល់ខ្នងផ្សាកាន់តែច្រើន នាអំឡុងកូវីដ-១៩។ តែទន្ទឹមនឹងកំណើនទេសចរ លោកជា យុទ្ធា ក៏មើលឃើញថា នៅមានទេសចរមួយចំនួនតូចនៅមិនទាន់ទុកដាក់សំរាមរបស់ខ្លួនឲ្យបានល្អនៅឡើយ។ ទោះជាសាទរបានឃើញទេសចរ តែអនុប្រធានការិយាល័យឧទ្យានជាតិជួរភ្នំក្រវាញរូបនេះស្នើឲ្យអ្នកទេសចរទាំងអស់ ចូលរួមថែរក្សាបរិស្ថាន និងកុំបោះចោលសំរាមផ្តេសផ្តាសនៅតំបន់ទេសចរណ៍ដែលខ្លួនបានៅទៅ។

 

បើតាមរបាយការណ៍របស់មន្ទីទេសចរណ៍ខេត្តកំពង់ស្ពឺគិតត្រឹមថ្ងៃទី ១៧-២១ ខែសីហា ឆ្នាំ២០២០ កំពង់ស្ពឺមានភ្ញៀវទេសចរទៅកម្សាន្តនៅទូទាំងខេត្តប្រមាណ ៤ ម៉ឺននាក់ ក្នុងនោះមានភ្ញៀវអន្តរជាតិ ៤២៦នាក់។ សម្រាប់តំបន់ដែលមានទេសចរទៅកម្សាន្តច្រើនជាងគេគឺ ខ្នងភ្នំគិរីរម្យ និងតំបន់កសិទេសចរណ៍ ម៉ុង ឫទ្ធី សែនជ័យ៕