ជាតិ
ស.ស.យ.ក ដាក់ដំណើរការប័ណ្ណសមាជិកភាព និងកម្មវិធី App ដែលផ្ដល់អត្ថប្រយោជន៍ជាច្រើនដល់សមាជិក
លោក ហ៊ុន ម៉ានី នាកម្មវិធីបើកដំណើរការប័ណ្ណសមាជិកភាព និងកម្មវិធី App ស.ស.យ.ក
×![]()
ភ្នំពេញ៖ នៅល្ងាចថ្ងៃទី២៨ សីហានេះ សហភាពសហព័ន្ធយុវជនកម្ពុជា បានដាក់ឲ្យដំណើរការប័ណ្ណសមាជិកភាព និងកម្មវិធី App ស.ស.យ.ក។ កម្មវិធីបើកដំណើរការប័ណ្ណសមាជិកភាព និងកម្មវិធី App ស.ស.យ.ក នេះ រៀបចំឡើងក្នុងគោលបំណងបង្ហាញប័ណ្ណសមាជិកភាពទម្រង់ថ្មីដែលរចនាយ៉ាងពិសេសប្រកបដោយភាពទាក់ទាញសម្រាប់ផ្តល់ជូនដល់សមាជិក រួមជាមួយនឹងកម្មវិធី App ស.ស.យ.ក. ដែលនឹងក្លាយជាបណ្តាញទំនាក់ទំនងថ្មីមួយ មានមុខងារផ្សេងៗបម្រើអត្ថប្រយោជន៍ដល់សមាជិក។
បើតាមសហភាពសហព័ន្ធយុវជនកម្ពុជា ការរៀបចំជាប័ណ្ណសមាជិកភាពទម្រង់ថ្មី និងកម្មវិធី «App» ស.ស.យ.ក. នេះ ធ្វើឡើងក្នុងគោលបំណង ថ្លែងអំណរគុណ និងទទួលស្គាល់ចំពោះការចូលរួមឥតស្រាកស្រាំរបស់សមាជិកគ្រប់ៗរូប ដែលខិតខំប្រឹងប្រែងរួមគ្នាលើដំណើរបេសកកម្មក្នុងបុព្វហេតុជាតិ មាតុភូមិកន្លងមក និងទៅអនាគត។ ជាមួយគ្នានេះ ដើម្បីផ្តល់ជាវេទិកាថ្មីមួយ ផ្សារភ្ជាប់យុវជន សមាជិក ស.ស.យ.ក. ទៅនឹងដំណើរវិវត្តនៃបច្ចេកវិទ្យា ក្នុងបរិបទបដិវត្តន៍ឧស្សាហកម្មទី៤។
សហភាពសហព័ន្ធយុវជនកម្ពុជា បន្ថែមថា ប័ណ្ណសមាជិកភាពទម្រង់ថ្មី និងកម្មវិធី «App» ស.ស.យ.ក.នេះ ក៏បង្ហាញពីមោទនភាពរបស់ក្រុមគ្រួសារ ស.ស.យ.ក. ចំពោះអតីតកាល និងសមិទ្ធផលរបស់ខ្លួននាពេលកន្លងមក និងការបោះជំហានទៅអនាគត ជាមួយទំនើបភាពបច្ចេកវិទ្យា ជីវភាពបែបថ្មី ក្នុងបរិបទបដិវត្តន៍ឧស្សាហកម្មទី៤ និងអនាគតប្រកបដោយក្តីសង្ឃឹមរបស់កម្ពុជា។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើងថា៖ « កិត្តិនាម ការទទួលស្គាល់ និងភាពភាពជោគជ័យរបស់ ស.ស.យ.ក. គឺកើតចេញពីការចូលរួមរបស់សមាជិក សមាជិក ស.ស.យ.ក គ្រប់ៗរូប ក្នុងការផ្តល់ក្តីស្រលាញ់ លះបង់ពេលវេលា ធនធានផ្ទាល់ខ្លួន មកចូលរួមជាមួយគ្នាសម្រេចនូវស្នាដៃមួយដែលកើតចេញពីការស្ម័គ្រចិត្ត ជាពិសេសការរួមដំណើរជាមួយគ្នា ក្នុងបេសកកម្ម បុព្វហេតុជាតិ មាតុភូមិកន្លងមក និងទៅអនាគត»។
សូមបញ្ជាក់ថា បណ្ណ័សមាជិកភាព ស.យ.យ.ក. ដែលបានដាក់ឱ្យដំណើរការនេះ គឺជាប័ណ្ណសមាជិកភាពដំបូងគេ នៃអង្គការ/សមាគម ដែលមានទម្រង់ជាប័ណ្ណសម្គាល់ខ្លួនផង និងជាប័ណ្ណដែលអាចបម្រើឱ្យការទូរទាត់ចំណាយនានាផងដែរ។ លើសពីមុខងារជាប័ណ្ណផ្លូវការសម្រាប់សម្គាល់នូវអត្តសញ្ញាណរបស់សមាជិក សមាជិកាផ្ទាល់ ប័ណ្ណសមាជិកភាពនេះត្រូវបានរចនាឡើងជាទម្រង់ Pre-Paid UNIONPAY Card ដែលអនុញ្ញាតឱ្យអ្នកប្រើប្រាស់ទាំងអស់អាចប្រតិបត្តិការសម្រាប់ការទិញទំនិញនានា នៅបណ្តាហាងទំនិញ ភោជនីយដ្ឋាន ដែលជាដៃគូរសហការជាមួយនឹងការបញ្ចុះតម្លៃតាមលក្ខខណ្ឌដែលបានកំណត់៕
© រក្សាសិទ្ធិដោយ thmeythmey.com
