ជាតិ
កីឡាជាតិ
កីឡាអន្តរជាតិ
ថៃ ឈ្នះជើងឯក BIDC Cup 2013 ក្រោយឈ្នះ មីយ៉ាន់ម៉ា ២ – ០ វគ្គផ្ដាច់ព្រ័ត្រ
× ក្រុមជើងឯករងឆ្នាំចាស់ ថៃ បានក្លាយជាម្ចាស់ជើងឯកពានរង្វាន់ Mekong Region Youth U23 BIDC-Cup 2013 ក្រោយបំបាក់ក្រុមជើងឯកឆ្នាំចាស់ មីយ៉ាន់ម៉ា ក្នុងលទ្ធផល ២ ទល់ ០ ក្នុងវគ្គផ្ដាច់ព្រ័ត្រ នៅរសៀលថ្ងៃទី ១០ វិច្ឆិកា ឆ្នាំ ២០១៣ ដែលរៀបចំនៅទឹកដី កម្ពុជា។
ក្រុម ថៃ សងសឹកបានសម្រេចដោយថ្វីជើងខ្សែប្រយុទ្ធ Wanit Jaisaen បន្ទាប់ពីការប្រកួតចាប់ផ្ដើមបានត្រឹម នាទី ៦ តែប៉ុណ្ណោះ ស្របពេលកីឡាករ Chotanan Veerapattarapong បន្ថែមមួយគ្រាប់ទៀតនៅនាទី ៧៧។
លោក Gerd Horst គ្រូបង្វឹកក្រុមមីយ៉ាន់ម៉ា បានសម្ដែងការខកចិត្តថា៖ "ខ្ញុំសោកស្ដាយដែលមិនអាចការពារដំណែងជើងឯកបាន ប៉ុន្ដែកីឡាករយើងបានខំប្រឹងអស់ពីលទ្ធភាពទៅហើយ។ គេជាឈុត U23 តែយើងជា ឈុត U19 ព្រោះឈុត U23 យើងជាប់ហ្វឹកហាត់ត្រៀមខ្លួនធ្វើជាម្ចាស់ផ្ទះស៊ីហ្គេម”។
ចំណែក លោក Pairoj Bovonwatanadilok គ្រូបង្វឹកក្រុមជើងឯក ថៃ បានបង្ហាញអារម្មណ៍រីករាយថា៖ "កីឡាករយើងធ្វើបានល្អ តាមទម្រង់ដែលយើងរៀបចំ។ ចំណែកឯក្រុមមីយ៉ាន់ម៉ា គេចាញ់យើងមែន ប៉ុន្ដែពូកគេលេងបានល្អ ពួកគេជាយុវជនថ្នាលដ៏ល្អ”។
សរុបទិន្នន័យក្នុងពានរង្វាន់ BIDC Cup 2013 រូមមាន អ្នកចាំទីល្អ បានទៅកីឡាករTossaporn Srirueng ប្រធានក្រុមរបស់ថៃ ទទួលបានទឹកប្រាក់ ១ ពាន់ដុល្លារអាមេរិក។ ចំណែក អ្នកទាត់បញ្ជូលទីច្រើនជាងគេគឺកីឡាករ Khonesavanh Sihavong របស់ឡាវ រកបាន ៣ គ្រាប់ម្នាក់ឯង ទទួលបានស្បែកជើងមាសមួយ និង ទឹកប្រាក់ ១ ពាន់ដុល្លារ។ រីឯ ខ្សែប្រយុទ្ធ Jirawut Saranan របស់ថៃ ជាប់កីឡាករល្អប្រចាំពានរង្វាន់ BIDC Cup 2013 អមដោយទឹកប្រាក់ ១ ពាន់ដុល្លារ។
ក្រុមជើងឯកថៃ ទទួលបានពានរង្វាន់ ១ មេដាយមាសម្នាក់ ១ និង ទឹកប្រាក់ ២ ម៉ឺនដុល្លារអាមេរិក ស្របពេលក្រុមជើងឯករងមីយ៉ាន់ម៉ា ទទួលបានមេដាយប្រាក់ម្នាក់១ និង ទឹកប្រាក់ ១ ម៉ឺនដុល្លារ។
ពានរង្វាន់ BIDC Cup 2013 រៀបចំឡើងចាប់ពីថ្ងៃទី ២ ដល់ ១០ វិច្ឆិកា ២០១៣ នៅរាជធានីភ្នំពេញ ដោយមានក្រុមចូលរួមចំនួន ៦ ក្រុម ចែកជា ២ ពូល រួមមានពូល A វៀតណាម, ថៃ និង មីយ៉ាន់ម៉ា ចំណែកពូល B មាន ម្ចាស់ផ្ទះកម្ពុជា, ឡាវ និង ម៉ាឡេស៊ី៕
© រក្សាសិទ្ធិដោយ thmeythmey.com