បទយកការណ៍ / បទសម្ភាសន៍
ជាតិ
សេដ្ឋកិច្ច
បទយកការណ៍៖ ម្ហូបខ្មែរទទួលបានការគាំទ្រនៅកូរ៉េខាងត្បូង ក្រុងសេអ៊ូល ៖ ម្ហូបខ្មែរ មិនត្រឹមតែជាអាហារប្រចាំថ្ងៃរបស់ប្រជាជនខ្មែរទូទៅនោះទេ ប៉ុន្តែក៏ជាផ្នែកមួយដែលបង្ហាញពី អត្តសញ្ញាណវប្បធម៌ដ៏យូរលង់ និងសម្បូរបែបនៃប្រជាជនខ្មែរផងដែរ។ ក្នុងស្មារតីលើកកម្ពស់ និងអភិរក្សម្ហូបខ្មែរ និស្សិតខ្មែរដែលកំពុងសិក្សារនៅប្រទេសកូរ៉េខាងត្បូងបានរៀបចំដាក់បង្ហាញម្ហូបខ្មែរមួយចំនួននៅក្នុងកម្មវិធី ម្ហូប និងវប្បធម៌អន្តរជាតិមួយ ដែលរៀបចំឡើងដោយ សាកលវិទ្យាល័យ KDI School of Public Policy and Management ដែលប្រព្រឹត្តទៅកាលពីថ្ងៃសុក្រទី៨ ខែ វិច្ឆិកា សប្តាហ៍មុននេះនៅទីក្រុងសេអ៊ូល។
នៅក្នុងកម្មវិធីដែលមានការបង្ហាញម្ហូបជាច្រើន នៃបណ្តាប្រទេសនានាលើសកលលោក ម្ហូបខ្មែរចំនួនពីរមុខ និងបង្អែមមួយមុខ ត្រូវបានដាក់បង្ហាញ ដោយក្នុងនោះរួមមាន ម្ជូរគ្រឿង មាន់ដុតទឹកឃ្មុំ និងបង្អែមល្ពៅ។ អ្នកចូលរួមដែលក្នុងនោះមាន ព្រឹទ្ធបុរស សាស្ត្រាចារ្យ និស្សិត និងអ្នកចូលរួមដែលមកពីបណ្តាប្រទេសនានា ត្រូវបានអនុញ្ញាតអោយភ្លក់រសជាតិ នៃម្អូបពីគ្រប់ប្រទេសទាំងអស់។
កញ្ញា Lee Sunme ជនជាតិកូរ៉េខាងត្បូង ដែលកំពុងឈរភ្លក់ម្ហូបខ្មែរ បានអោយដឹងថា កញ្ញាចូលចិត្តរសជាតិម្ហូបខ្មែរ ហើយនេះប្រហែលជាមកពីគ្រឿងផ្សំធម្មជាតិពិសេសដែលប្លែកពីអ្វីដែលប្រទេសកូរ៉េមាន។ កញ្ញា Lee ដ៏ដូចជាអ្នកចូលរួមផ្សេងទៀតដែរ នាងចូលចិត្តបង្អែមល្ពៅរបស់ខ្មែរ។ ដោយឡែក លោក Thula Maleka Chirwa ជាអ្នកចូលរួមម្នាក់មកពីប្រទេស Malawi ដែលកំពុងតែឈរកាន់ចាន និងស្លាបព្រាតូចមួយ តំរង់ជួរនៅមុខស្តង់ម្ហូបខ្មែរនោះ បានអោយដឹងថា លោកមក ស្តង់នេះ ជាលើកទី២ហើយ ដោយសារតែរសជាតិឆ្ងាញ់ប្លែកនៃម្ហូបពីប្រទេសកម្ពុជា។
ស្លៀកសំលៀកបំពាក់បែបប្រពៃណីខ្មែរ ជាមួយនិងក្រមារចងចង្អេះផងនោះ លោក អ៊ុំ វណថារិទ្ធ និស្សិតខ្មែរ ដែលបានចូលរួមរៀបចំកម្មវិធីនេះ បានអោយដឹងថា នេះជាឳកាសមួយ ដែលខ្មែរយើងអាចបង្ហាញនូវវប្បធម៌ខ្មែរតាមរយៈម្ហូបទៅជនជាតិបរទេសដែលមកពីបណ្តាប្រទេសជាច្រើន នៅលើសកលលោក ហើយក៏ជាឳកាសជួបជុំនិស្សិត និងបងប្អូនខ្មែរដើម្បីពិសារម្ហូបពីស្រុកកំណើតខ្លួន ក៏ដូចជាម្អូបពីបណ្តាប្រទេសជាច្រើនទៀត។
លោក នុត នារក្ស មន្ត្រីមកពីក្រសួងទេសចរណ៍ ដែលបានចូលរួមកម្មវិធីនោះដែរ បានអោយដឹងថា លោកពេញចិត្តនឹងការដាក់បង្ហាញម្ហូបខ្មែរនេះដោយលោកបានបញ្ជាក់ថា នេះមិនត្រឹមតែជាការចូលរួមលើកកម្ពស់ និងអភិរក្ស វប្បធម៌ខ្មែរប៉ុណ្ណោះទេ ប៉ុន្តែដោយសារតែម្ហូបជាផលិតផលទេសចរណ៍មួយផងនោះ កម្មវិធីនេះជាការចូលរួមចំណែកយ៉ាងសំខាន់ ក្នុងការលើកម្ពស់វិស័យទេសចរណ៍កម្ពុជាផង ដែលវិស័យទេសចរណ៍កំពុងតែរួមចំណែកយ៉ាងសំខាន់ក្នុងការលើកកម្ពស់ជីវភាពប្រជាជន និងសេដ្ឋកិច្ចកម្ពុជា។
ដោយឡែក នៅប្រទេសកម្ពុជាឯណេះវិញ ម្ហូបខ្មែរត្រូវបានគេសង្កេតឃើញថាបាននិងកំពុងបាត់បង់ប្រជាប្រិយភាពបន្តិចម្តងៗ ដោយសារតែម្ហូបបរទេស ដូចជា ម្ហូបកូរ៉េ ចិន ជប៉ុន និងអឺរ៉ុប បាននិងកំពុងវាយលុកមកលើទីផ្សារកម្ពុជា៕
រាយការណ៍ដោយ លោក ប្រុញ សុភាណា ពីទីក្រុងសេអ៊ូលប្រទេសកូរ៉េខាងត្បូង
© រក្សាសិទ្ធិដោយ thmeythmey.com