លោក មៀច សុផាន់ណា នឹងលាលែង បើវិញ្ញាសាបាញ់កាំភ្លើងមិនបានមេដាយស៊ីហ្គេមឆ្នាំ២០២៣

កីឡាជាតិ

ជាតិ

លោក មៀច សុផាន់ណា នឹងលាលែង បើវិញ្ញាសាបាញ់កាំភ្លើងមិនបានមេដាយស៊ីហ្គេមឆ្នាំ២០២៣

22, Sep 2020 , 10:59 pm

រូបភាព

លោក មៀច សុផាន់ណា ប្រធានសហព័ន្ធកីឡាបាញ់កាំភ្លើងកម្ពុជា(ស្តាំ)ថ្លែងក្នុងសន្និបាតបូកសរុបការងារឆ្នាំ២០១៩ និងលើកទិសដៅសម្រាប់ឆ្នាំ២០២០

ដោយ:

លោក មៀច សុផាន់ណា ប្រធានសហព័ន្ធកីឡាបាញ់កាំភ្លើងកម្ពុជាបានប្រកាសថា លោកនឹងលាលែងពីតំណែងបើសហព័ន្ធខ្លួនមិនដណ្តើមបានមេដាយក្នុងការប្រកួតកីឡាស៊ីហ្គេមលើកទី៣២ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ បច្ចុប្បន្នសហព័ន្ធនេះ កំពុងស្ថិតនៅក្នុងតំណែងជាប្រភេទកីឡាត្រៀមបម្រុងសម្រាប់ព្រឹត្តិការណ៍កីឡាស៊ីហ្គេមនៅកម្ពុជា។

នាសន្និបាតបូកសរុបការងារប្រចាំឆ្នាំ២០១៩ និងលើកទិសអនុវត្តសម្រាប់ឆ្នាំ២០២០ លោក មៀច សុផាន់ណា ប្រធានសហព័ន្ធកីឡាបាញ់កាំភ្លើងកម្ពុជា បានប្រកាសយកតំណែងជាប្រធានរបស់ខ្លួន ដោះដូរជាមួយមេដាយស៊ីហ្គេមនៅឆ្នាំ២០២៣។ លោកអះអាងថា លោកនឹងលាលែងពីតំណែង បើសហព័ន្ធកីឡាបាញ់កាំភ្លើងមិនទទួលបានមេដាយណាមួយក្នុងការប្រកួតកីឡាស៊ីហ្គេម ដែលកម្ពុជាធ្វើជាម្ចាស់ផ្ទះ។

នៅចំពោះមុខសមាជិកប្រតិបត្តិ គ្រូបង្វឹក និងកីឡាករកីឡាការិនី លោក មៀច សុផាន់ណា បានបញ្ចាក់ដូច្នេះថា៖«នៅស៊ីហ្គេមឆ្នាំ២០២៣ ខ្ញុំអត់និយាយទេ គឺប្រកាសជាផ្លូវការ បើអត់បានមេដាយ ខ្ញុំសុំឈប់ហើយ(goodbye my love baby)។ សម្រាប់គ្នាយើងស្តាប់ឲ្យហើយ ខ្ញុំទុកឲ្យលោកឯងធ្វើ អ្នកណាធ្វើប្រធានថ្មីទៀតទៅ កុំឲ្យខ្ញុំនៅទៅ វាអត់បានការ ចោលម្សៀតដដែល»។

តែយ៉ាងណា ប្រធានសហព័ន្ធរូបនេះ ជឿជាក់ថា លើសមត្ថភាពរបស់មន្ត្រី គ្រូបង្វឹក និងកីឡាកររបស់ខ្លួនអាចធ្វើបានលទ្ធផលល្អក្នុងការប្រកួតកីឡាស៊ីហ្គេម បើពួកគេរួបរួម និងសាមគ្គីគ្នាបានល្អ។ ទន្ទឹមនឹងនេះ លោក ជំរុញឲ្យពួកគេខិតខំប្រឹងប្រែងទាំងអស់គ្នា ដើម្បីអភិវឌ្ឍន៍សមត្ថភាពឲ្យកាន់តែប្រសើរ សម្រាប់ត្រៀមប្រជែងដណ្តើមមេដាយពីព្រឹត្តិការណ៍កីឡាស៊ីហ្គេម។

ប៉ុន្តែមកទល់ពេលនេះ គេមិនទាន់ប្រាកដថា វិញ្ញាសាបាញ់កាំភ្លើងអាចមានវត្តមានក្នុងការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះនៅឡើយទេ ខណៈបច្ចុប្បន្នកីឡានេះកំពុងស្ថិតក្នុងប្រភេទកីឡាត្រៀមបម្រុង។

នៅក្នុងសន្និបាតវិសាមញ្ញកាលពីថ្ងៃទី២១ ខែកញ្ញា នោះដែរ សហព័ន្ធកីឡាបាញ់កាំភ្លើងកម្ពុជាបានសម្រេចបង្កើតក្រុមការងារចំនួនបីរួមមានក្រុមការងារជំរុញ និងដឹកនាំការប្រកួតកីឡាបាញ់កាំភ្លើងកម្ពុជាថ្នាក់ជាតិ, ក្រុមការងារជំរុញ និងដឹកនាំការប្រកួតកីឡាបាញ់កាំភ្លើងអន្តរជាតិ និងក្រុមគ្រូបង្វឹកដែលមានលោក Thomas Bovet និងលោក Sylvain Vogel។

ក្រុមការងារទាំងបីមានតួនាទីរៀបចំវគ្គបណ្តុះបណ្តាល កម្មវិធីហ្វឹកហាត់សម្រាប់កីឡាករកីឡាការិនី ជ្រើសរើសនិងអភិវឌ្ឍន៍ក្រុមដែលមានស្នាដៃខ្ពស់សម្រាប់វិញ្ញាសាបាញ់កាំភ្លើង សម្របសម្រួល និងរៀបចំក្នុងការបញ្ជូនកីឡាករទៅចូលរួមការប្រកួតនៅក្រៅប្រទេស និងក្នុងស្រុក។ លើសពីនេះ សិក្សា និងរៀបចំឯកសារពីផែនការយុត្តិសាស្ត្រក្នុងការត្រៀមខ្លួនសម្រាប់ព្រឹត្តិការណ៍ស៊ីហ្គេម គ្រប់គ្រងធនធានសម្រាប់បណ្តុះបណ្តាល និងអភិវឌ្ឍន៍ក្រុមជម្រើសជាតិ និងទទួលភារកិច្ចដែលប្រធានសហព័ន្ធផ្តល់ឲ្យ៕