ក្រោយអាក់ខានដោយសារកូវីដ-១៩ សាលាខ្លះត្រូវផ្អាកសារជាថ្មីដោយសារជន់លិច

ជាតិ

សង្គមជាតិ

ក្រោយអាក់ខានដោយសារកូវីដ-១៩ សាលាខ្លះត្រូវផ្អាកសារជាថ្មីដោយសារជន់លិច

14, Oct 2020 , 10:29 pm

រូបភាព

ទិដ្ឋភាពទឹកជន់លិចសាលាបឋមសិក្សា ហ៊ុន នាង ព្រែកកំពឹស នៅសង្កាត់ព្រែកកំពឹស ខណ្ឌដង្កោ រាជធានីភ្នំពេញ នាព្រឹកថ្ងៃទី១៤ ខែតុលា ឆ្នាំ២០២០ (រូបភាពពីសហការី ឡាយ សុភាវតី)

ដោយ:

ភ្នំពេញ៖ សាលារៀនខ្លះ ត្រូវបានផ្អាកការសិក្សាវិញ ដោយសារទឹកជំនន់។ នេះបើតាមលោក រស់ សុវាចា អ្នកនាំពាក្យក្រសួងអប់រំ យុវជន និងកីឡា។

លោក រស់ សុវាចា បានបញ្ជាក់ថា សាលារៀនលិចទឹកទាំងនោះ ស្ថិតនៅទីតាំងភូមិសាស្ត្រវាលទំនាប ទើបត្រូវផ្អាកដំណើរការសិក្សាជាបណ្តោះអាសន្នសិន រីឯសិស្សត្រូវត្រឡប់មករៀនតាមអនឡាញជាមួយនឹងគ្រូវិញ។ លោកបានរៀបរាប់ដូច្នេះថា៖«សិស្សកម្រិតទូទាំងប្រទេសគឺគាត់ត្រូវរៀននៅក្នុងថ្នាក់ផង និងរៀនតាមអនឡាញផង។ អ៊ីចឹងករណីគ្រឹះស្ថានសិក្សាទាំងឡាយណា ដែលផ្អាកជាបណ្តោះអាសន្នដោយសារជំនន់ទឹកភ្លៀង គឺសិស្សានុសិស្សនៅតែបន្តរៀនសូត្រតាមអនឡាញ»។

ក្រសួងនឹងនៅតែបន្តកិច្ចសហការជាមួយនឹងអ្នកពាក់ព័ន្ធលើវិធានការទប់ស្កាត់ និងឆ្លើយតបលើផលប៉ះពាល់ដល់គ្រឹះស្ថានសិក្សា ដោយសារគ្រោះទឹកជំនន់ និងជំនន់ទឹកភ្លៀង។

អ្នកនាំពាក្យក្រសួងអប់រំរូបនេះ បានប្រាប់ដូច្នេះថា៖«ក្រសួងអប់រំ យុវជន និងកីឡាមានក្រុមការងារគ្រប់គ្រងគ្រោះមហន្តរាយវិស័យអប់រំ ដែលបានបន្តកិច្ចសហការណ៍ដូច៧ឆ្នាំមុនកន្លងមកដែរ ជាមួយគណៈគ្រប់គ្រងសាលារៀន និងអាជ្ញាធរមូលដ្ឋានផ្ទាល់ដើម្បីត្រៀមលក្ខណៈអន្តរាគមន៍ទៅលើកត្តាចាំបាច់តាមលទ្ធភាពជាក់ស្តែង»។

ក្រសួងអប់រំ យុវជន និងកីឡា បានអំពាវនាវដល់សិស្សានុសិស្ស លោកគ្រូ អ្នកគ្រូ បុគ្គលិកអប់រំ និងគ្រប់ភាគីពាក់ព័ន្ធទាំងអស់បង្កើនការប្រុងប្រយ័ត្ន នារដូវភ្លៀងនេះ ក្នុងការបន្តថែទាំសុខភាព។

គិតត្រឹមថ្ងៃទី១៤ ខែតុលានេះ ជំនន់ទឹកភ្លៀងបានធ្វើឲ្យប៉ះពាល់ដល់សាលារៀនជាង៤០០នៅទូទាំងប្រទេស ។ ក្នុងនោះមានខេត្តពោធិ៍សាត់ បាត់ដំបង បន្ទាយមានជ័យ ឧត្តរមានជ័យ ប៉ៃលិន ព្រះសីហនុ ស្វាយរៀង សៀមរាប ព្រះវិហារ កំពង់ចាម មណ្ឌលគិរី កោះកុង កំពង់ឆ្នាំង កំពង់ធំ តាកែវ កំពង់ស្ពឺ ព្រៃវែង កណ្តាល និងភ្នំពេញ។ នេះបើតាមលោក ឃុន សុខា អ្នកនាំពាក្យគណៈគម្មាធិការជាតិគ្រប់គ្រងគ្រោះមហន្តរាយ ដែលបានបញ្ជាក់ប្រាប់អ្នកសារព័ត៌មានថ្មីៗ ។

«សាលារៀននោះ វាលិចអស់ហើយ មិនអាចឲ្យក្មេងទៅរៀនបានឡើយ»។ នេះបើតាមការបញ្ជាក់ពី ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ។

គួរបញ្ជាក់ថា ក្រសួងអប់រំ បានអនុញ្ញាតឲ្យសាលារៀនទូទាំងប្រទេស បានបើកដំណើរការវិញ ក្រោយពីពិនិត្យឃើញថា ស្ថានភាពកូវីដ-១៩ នៅកម្ពុជា មានសភាពថមថយ។

គិតត្រឹមថ្ងៃទី១៤ ខែតុលានេះទឹកជំនន់ប៉ះពាល់ដល់ពលរដ្ឋ ជិត១៦ម៉ឺននាក់ ក្នុងនោះមានពលរដ្ឋចំនួនប្រមាណ១ម៉ឺននាក់ ត្រូវបានជម្លៀសទៅទីទួលសុវត្ថិភាព។ ចំណែកផ្ទះជាង៣ម៉ឺន៩ពាន់ខ្នងលិចលង់ ក្នុងនោះផ្ទះខូចខាតទាំងស្រុង ចំនួន៣០ខ្នង។ ស្រូវជន់លិចមានជាង១១ម៉ឺន៦ពាន់ហិចតា ខូចខាតជិត៥ពាន់ហិចតា ដំណាំរួមផ្សំមានជាង៥ម៉ឺន៥ពាន់ហិចតា ខូចខាតអស់ជាង៦ពាន់ហិចតា និងមានមនុស្សស្លាប់ចំនួន១២នាក់ដែលបានស្លាប់ក្នុងហេតុការណ៍គ្រោះទឹកជំនន់។ នេះបើតាមលោក ឃុន សុខា អ្នកនាំពាក្យគណៈគម្មាធិការជាតិគ្រប់គ្រងគ្រោះមហន្តរាយ៕