ប្រធានសហព័ន្ធកីឡាការ៉ាតេ ស្នើឲ្យធ្វើកំណែទម្រង់ការវិនិច្ឆ័យ និងដាក់ពិន្ទុ

កីឡាជាតិ

ជាតិ

ប្រធានសហព័ន្ធកីឡាការ៉ាតេ ស្នើឲ្យធ្វើកំណែទម្រង់ការវិនិច្ឆ័យ និងដាក់ពិន្ទុ

28, Oct 2020 , 9:29 pm

រូបភាព

ដោយ:

ប្រធានសហព័ន្ធកីឡាការ៉ាតេកម្ពុជាលោក អូន ព័ន្ធមុនីរ័ត្ន បានបង្ហាញពីផែនការយុទ្ធសាស្ត្រជាច្រើនក្នុងដំណើរឆ្ពោះទៅប្រជែងដណ្តើមមេដាយក្នុងការប្រកួតកីឡាស៊ីហ្គេមឆ្នាំ២០២៣។ ទន្ទឹមនឹងនេះ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុរូបនេះ ស្នើឲ្យធ្វើកំណែទម្រង់លើការវិនិច្ឆ័យ និងដាក់ពិន្ទុរបស់អាជ្ញាកណ្តាលចៅក្រម ដើម្បីធានាភាពយុត្តិធម៌ជូនកីឡាករកីឡាការិនី។ ជាក់ស្តែងការប្រកួតជើងឯកថ្នាក់ជាតិឆ្នាំ២០២០ សហព័ន្ធនេះ បានបំពាក់ឧបករណ៍អេឡិចត្រូនិកក្នុងការដាក់ពិន្ទុ។

លោក វ៉ាត់ ចំរើន អគ្គលេខាធិការនៃសហព័ន្ធកីឡាការ៉ាតេកម្ពុជាបានបញ្ជាក់ថា ឧបនាយករដ្ឋមន្ត្រី អូន ព័ន្ធមុនីរ័ត្ន ប្រធានសហព័ន្ធកីឡាការ៉ាតេកម្ពុជា បានជំរុញឲ្យសហព័ន្ធធ្វើកំណែទម្រង់លើប្រព័ន្ធកាត់ក្តីរបស់អាជ្ញាកណ្តាលចៅក្រម។ ការជំរុញបែបនេះ មិនមែនមានន័យថា ការកាត់ក្តីកន្លងមកមានភាពមិនប្រក្រតី ឬអាជ្ញាកណ្តាលចៅក្រមពុំមានសមត្ថភាពក្នុងការកាត់ក្តីនោះទេ។

បើតាមអគ្គលេខាធិការនៃគណៈកម្មាធិការជាតិអូឡាំពិកកម្ពុជារូបនេះ ការជំរុញរបស់ប្រធានសហព័ន្ធ គឺចង់ធ្វើយ៉ាងណាឲ្យការកាត់ក្តីប្រកបដោយយុត្តិធម៌ និងស្របតាមស្តង់ដាអន្តរជាតិ។ ម្យ៉ាងទៀត វាជាផ្នែកមួយក្នុងដំណើរឆ្ពោះទៅត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២ឆ្នាំ២០២៣។

លោក វ៉ាត់ ចំរើន មានប្រសាសន៍ដោយស្រង់សម្តីរបស់ឧបនាយករដ្ឋមន្ត្រី អូន ព័ន្ធមុនីរ័ត្ន យ៉ាងដូច្នេះថា៖«ការប្រកួតជើងឯកថ្នាក់ជាតិឆ្នាំ២០២០ របស់សហព័ន្ធកីឡាការ៉ាតេ គឺការណែនាំរបស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឲ្យធ្វើកំណែទម្រង់លើការវិនិច្ឆ័យរបស់អាជ្ញាកណ្តាលចៅក្រម ដែលជាកំណែទម្រង់មួយឈានទៅរក Fair Play»។

រូបភាពពី Cambodia SEA Games 2023

លោក បានបន្ថែមថា ការកាត់ក្តីប្រកបដោយភាពយុត្តិធម៌ មិនលម្អៀង ក៏ជាផ្នែកមួយក្នុងការចូលរួមចំណែកធ្វើឲ្យមានការបង្រួបបង្រួមគ្នាក្នុងគ្រួសារកីឡាការ៉ាតេ និងភាពសុខដុមរមនីយកម្មការ៉ាតេឡើងវិញផងដែរ។ ព្រោះការកាត់ក្តីមិនយុត្តិធម៌ និងប្រកាន់បក្ខពួក វាជាចលករអាក្រក់ក្នុងការធ្វើឲ្យមានការបែកបាក់សាមគ្គីភាពផ្ទៃក្នុង សាមគ្គីភាពរវាងក្លិបនិងក្លិប និងធ្វើឲ្យកីឡាករបាក់ទឹកចិត្តក្នុងការហ្វឹកហាត់ជាដើម។

ក្នុងឱកាសធ្វើជាអធិបតីភាពក្នុងពិធីបិទការប្រកួតកីឡាការ៉ាតេជ្រើសរើសជើងឯកថ្នាក់ជាតិឆ្នាំ២០២០ កាលពីថ្ងៃទី២៥ ខែតុលា ឆ្នាំ២០២០ ឧបនាយករដ្ឋមន្ត្រី អូន ព័ន្ធមុនីរ័ត្ន បន្តដាស់តឿនឲ្យថ្នាក់ដឹកនាំ មន្ត្រី គ្រូបង្វឹកនៃសហព័ន្ធ ក្លិបសមាគមរួបរួមសាមគ្គីភាព ឯកភាពផ្ទៃក្នុង និងខិតខំប្រឹងប្រែងអភិវឌ្ឍន៍លើជំនាញរៀងៗខ្លួន ដើម្បីឈានទៅសម្រេចគោលដៅនៅឆ្នាំ២០២៣។

ប្រធានសហព័ន្ធរូបនេះ ក៏បានបង្ហាញពីផែនការយុទ្ធសាស្ត្រមួយចំនួនក្នុងការអភិវឌ្ឍវិស័យកីឡាការ៉ាតេកម្ពុជាផងដែរ។ ផែនការទាំងនោះរួមមាន សហព័ន្ធនឹងរៀបចំការប្រកួតពីរចំនួនពីរនៅចុងឆ្នាំ២០២០ និងការត្រៀមខ្លួនធ្វើជាម្ចាស់ផ្ទះការប្រកួតកីឡាការ៉ាតេជ្រើសរើសជើងឯកអាស៊ីអាគ្នេយ៍ឆ្នាំ២០២២។ ការប្រកួត Pre-SEA Games នេះ ធ្វើឡើងក្នុងគោលបំណងដើម្បីវាស់ស្ទង់សមត្ថភាពកីឡាករកីឡាការិនី ក៏ដូចជាមន្ត្រីអាជ្ញាកណ្តាលចៅក្រមកម្ពុជា ក៏ដូចជាវាស់ស្ទង់សមត្ថភាពកីឡាកររបស់ប្រទេសជិតខាងជាដើម។

ឧបនាយករដ្ឋមន្ត្រី អូន ព័ន្ធមុនីរ័ត្ន និងសកម្មភាពប្រកួតក្នុងជើងឯកថ្នាក់ជាតិប្រចាំឆ្នាំ២០២០, រូបភាពពី Cambodia SEA Games 2023

លើសពីនេះ ដើម្បីត្រៀមប្រជែងដណ្តើមមេដាយក្នុងការប្រកួតកីឡាស៊ីហ្គេមឆ្នាំ២០២១ នៅវៀតណាម និងស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ សហព័ន្ធ បានហៅគ្រូបង្វឹកបរទេសចំនួនពីររូប គឺជនជាតិអ៊ីរ៉ង់១រូប និងជនជាតិជប៉ុន១រូប មកបង្វឹកនៅកម្ពុជា។ គ្រូបង្វឹកជនអ៊ីរ៉ង់ Hassan នឹងបង្វឹកលើវិញ្ញាប្រយុទ្ធ ខណៈគ្រូបង្វឹកជនជាតិជប៉ុន Shoki Toyarma បង្វឹកលើវិញ្ញាសាមេគុន។

បើតាមលោក វ៉ាត់ ចំរើន បើស្ថានភាពជំងឺកូវីដ-១៩នៅលើពិភពលោកមានភាពធូរស្បើយ សហព័ន្ធ នឹងស្វែងរកឱកាសជាមួយប្រទេសជាមិត្ត ដែលមានសក្តានុពលលើប្រភេទវិញ្ញាសាការ៉ាតេ ដើម្បីបញ្ជូនកីឡាករទៅហ្វឹកហាត់រយៈពេលវែងនៅទីនោះ។ តែបើស្ថានភាពមិនអំណោយផល កម្ពុជា នឹងបន្តហៅគ្រូបង្វឹកបរទេសដែលមានគុណភាពខ្ពស់មកបង្វឹកនៅកម្ពុជា។

សម្រាប់ការប្រកួតជើងឯកថ្នាក់ជាតិកីឡាការ៉ាតេឆ្នាំ២០២០ មានប្រតិភូ អត្តពលិកចំនួន២៣៦នាក់មកពី២៣ក្លិបសមាគមចូលរួម ដោយពួកគេប្រកួតប្រជែងគ្នាលើ៣៤វិញ្ញាសា។ ក្រោយឆ្លងកាត់ការប្រកួតរយៈពេល៣ថ្ងៃចន្លោះពីថ្ងៃទី២៣-២៥ តុលា អត្តពលិកទទួលបានការវាយតម្លៃខ្ពស់ពីលោក អូន ព័ន្ធមុន្នីរ័ត្ន លើភាពរីកចម្រើនផ្នែកសមត្ថភាព និងបច្ចេកទេស៕