អន្តរជាតិ
ព្យុះម៉ូឡាវ បង្កឲ្យមនុស្ស២នាក់បាត់បង់ជីវិត និង២៦នាក់បាត់ខ្លួននៅវៀតណាម
រូបភាព៖ VnExpress
×![]()
ដោយ: ធៀន ភារិន្ទ
ប្រជាជនវៀតណាមយ៉ាងហោចណាស់២នាក់ បានបាត់បង់ជីវិត និង២៦នាក់ទៀតបានបាត់ខ្លួន ដោយសារតែព្យុះម៉ូឡាវ ដែលបានបោកបក់មកលើភាគកណ្តាលរបស់វៀតណាមនៅថ្ងៃទី២៨ ខែតុលា។ 
ព្យុះម៉ូឡាវ បានចាប់ផ្តើមបោកបក់មកលើភាគខាងកណ្តាលនៃប្រទេសវៀតណាម នៅថ្ងៃទី២៨ ខែតុលា។ កម្លាំងខ្យល់ អាចមានល្បឿនរហូតដល់ ១៤៥គីឡូម៉ែត្រ ក្នុងមួយម៉ោង។ ប្រជាជនវៀតណាម ប្រមាណ ៣៧៥០០០ នាក់ ត្រូវជម្លៀសរកកន្លែងសុវត្ថិភាព ចំណែកជើងហោះហើរត្រូវបានលុបចោល។ តាមការចុះផ្សាយរបស់ទូរទស្សន៍វៀតណាម VTV អាកាសយានដ្ឋានយ៉ាងហោចណាស់៥ ត្រូវផ្អាក សាលារៀននិងសេវារថភ្លើងត្រូវបិទ។
ទាក់ទិននឹងកម្លាំងខ្យល់ខ្លាំងបែបនេះ មនុស្សយ៉ាងហោចណាស់ចំនួន ២នាក់ បានបាត់បង់ជីវិត នៅក្នុងខេត្តQuang Ngai ក្នុងអំឡុងពេលអ្នកទាំងនោះ កំពុងការពារផ្ទះសម្បែងរបស់ខ្លួន។ កម្លាំងព្យុះដ៏ខ្លាំង ដែលមិនធ្លាប់កើតមាននៅវៀតណាមក្នុងរយៈពេល២០ឆ្នាំចុងក្រោយនេះ ក៏បានបង្កឲ្យមនុស្សចំនួន ២៦នាក់បាត់ខ្លួនផងដែរ នៅក្នុងខេត្តBinh Dinh ដោយសារតែលិចទូក។ បើតាមអាជ្ញាធរវៀតណាម អ្នកទាំងអស់នោះ គឺជាអ្នកនេសាទ។
បន្ថែមពីលើនេះ ផ្ទះសម្បែងមួយចំនួន ក៏បានបំផ្លាញក្នុងព្យុះម៉ូឡាវនេះផងដែរ។ បញ្ហានេះ អាជ្ញាធរវៀតណាម បានប្រាប់ប្រជាជនឲ្យនៅក្នុងផ្ទុះ ដើម្បីជៀសវាងគ្រោះថ្នាក់ណាមួយ។
អង្គការកាកបាទក្រហមបានព្រមានថា មនុស្សជិត ១,២លាននាក់ កំពុងស្ថិតក្នុងស្ថានភាពគ្រោះថ្នាក់ និងត្រូវការជំនួយ។ បើតាមការអះអាងរបស់លោក Nguyen Thi Xuan Thu ប្រធានកាកបាទក្រហមវៀតណាម ខ្យល់ព្យុះ និងទឹកជំនន់ឥតស្រាកស្រាន្ត បានបង្កឲ្យបាត់បង់ជីវិតមនុស្សជាច្រើន ហើយថែមទាំងបំផ្លាញទ្រព្យសម្បត្តិ និងលំនៅដ្ឋានរបស់ពួកគេថែមនេះ។
ចំណែកអ្នកនាំពាក្យកាកបាទក្រហមអន្តរជាតិ លោក Christopher Rassi លើកឡើងថា ភាពឥតស្រាកស្រាន្តនៃព្យុះនេះ គឺជាឧទាហរណ៍នៃផលប៉ះពាល់ដោយសារការបម្រែបម្រួលអាកាសធាតុ។
សូមបញ្ជាក់ថា វៀតណាម ទើបតែរងគ្រោះដោយសារ ព្យុះ និងទឹកជំនន់នាពេលថ្មីៗនេះ ហើយមានប្រជាជនចំនួន ១៣៦នាក់ បានបាត់បង់ជីវិត និងមនុស្សមួយចំនួនបន្តបាត់ខ្លួន ខណៈទ្រព្យសម្បត្តិជាច្រើនត្រូវបំផ្លាញ៕
Tag:
វៀតណាម
ព្យុះម៉ូឡាវ
© រក្សាសិទ្ធិដោយ thmeythmey.com
